دعوه لمزيد من الثقافة السعودية

بعد ان حمسني اخوي الناعس اكمل لكم القصة ليكتمل عقد دعوه لمزيد من الثقافة السعودية

ماراح اطول عليكم

وصلنا المانيا ولله الحمد

بس دعوني نكشف كيف نتواصل ثقافيا في الخارج

يعني تيتي تيتي زي مارحتي زي ماجيتي

تصدقون جريش وقرصان في شقة جدتي في المانيا

كأني متكي في البيت وقهوة ..

بصراحة تواصل ثقافي يوم شفت جارت جدتي قالطه عندهم وتقدع والبساط احمدي

ومن بكره ولد خالة الوالد عازم الجيران المان بمناسبة زيارتنا لهم تقول كأني في الحرب العالمية الثانية
وضرب بالخمس وجالسين بشكل بصراحة لوحات فنيه . كل واحد له جلسه غير ولا قاعدين على الارض.

وصاروا يعرفون جريش وقرصان بعد..

وواحد منهم اعطاه ولد خالة الوالد فروه .. والثاني اهداه شماغ صوف

اقولكم كأني كاشت في الثمامه

والادها والأمر...

يوم جاء وقت الجد وروحة المستشفى تثاقلوا وتعيجزوا..


بس يوم رحنا الى العلاقات العامة لشئون المرضى مع جدتي تقولون سفيرة النوايا الحسنه

طاروا فينا وترحيب وشيء اقولكم ماصدقت..

غرفة جدتي جاهزه كأنها حجرتها في بيتها ..

ومشاء الله الجلال والسجادة>> طبعا ولد جدتي الى في المانيا مزهب كل شيء الله يوفقه ويجعلها في ميزان حسناته

وجلسة عربيه بس بديكور الماني >> لاتفلسف يعني تصميم غربي

فــ لذلك كانت رحلتي مع جداني رحلة للتواصل الثقافي

وكيف كانت اخت جدتي قوة علاقات التواصل الثقافي بين السعودية والمانيا

وجت جدتي وزادت من هذه العلاقه خصوصا عندما اهدت جدتي شيله تصدقو ياعالم ..شيله لعنو بو بليستس شيله !!! الى طبيبة الأعصاب في المستشفى

بس عشان ريحتها بخور ومخلط ..

واهداء جدي شماغه البسام الأحمر القديم الى المدلك في قسم المساج ..
وانا فاق ثمي مدري وش اسوي ..

وجدي مهوب لله اعطاه الشماغ عشان يفتك من الجلسات ..والعلاج الطبيعي

وانا استحيت مالقيت احد اهديه الا موظفة الأستقبال والمسئولة عن حالة جداني اعطيتها دلة جدتي رسلان .. يوم رجعنا للرياض جاتني دعوات بسبب هذه الدله لان جدتي تحبها وتموت فيها..هذه الدله تمثل جزء من حياة جدتي.. اقولكم بغيت انحت عليها اسمها.

ورحت سوق الزل واشتريت لها دلة ابو جهل... عشان ترضى والى الان تعيرني فيها..

ابوها من دله ..

رحلة كانت للتواصل الثقافي السعودي..

رجعنا الى الرياض محملين بهدايا من المانيا .. وصور وذكريات

وصدقوني لابوه علاج ولا شيء

بس دق حنك و ضرب بالخمس في الأكل..

وكل مره نروح المستشفى يؤجلون الموعد جدي وجدتي لان مالهم نفس

والا ينحاش جدي من التدليك والعلاج الطبيعي

وجدتي يفغصون عيونها وتدعي عليهم خصوصا , يوم سوو لها جراحة بالليزر

يا انهم جتهم دعوه احسن ان الطاقم كله الان في حالة يرثى لها..





هذه القصه مختصره مره مره

رغم مافيها من قصص واحداث وبلاوي

بس ماابي اطول عليكم .. وكثرة الكلام تملل الواحد

تقبلوا تحياتي..

يا بعدهم يــ الزين كله

وشاكر مرورك وتشريفك لهذه القصة وعقبال ما تتواصل مع جدانك ثقافيا في الخارج..