يوميات ..ابو مهنـــــــــد ..و sosah

sosah · 24-05-2004, 07:55 AM

ووصلنا للشرقيه وننزل على الكورنيش وقال ابو مهند هاه وش رايك بالمكان قلت حلو..

ويركض الرجال للسياره وينزل الخيمه<<< معهم خيمه سقطت سهواً في بداية الرحله

ويجلس يدق الاطناب ومدهر الرجال وانا اناظره شوي واتلفت على الناس اللي يطالعونا شوي

واتذكر ان معي تقرير عن حالته يوم كان في شهار..

واطلعه واهفهف به قدام العالم بمعنى..( لا تتشرهون

واجد)

وهالناس من يوم شافوا الورقه هجوا ما بقى احد على الكورنيش بكبره الا انا والمملوح

يوم جا في الليل وينوم ابو مهند برا الخيمه<< الحمدلله

قفل الخيمه ونسى المفتاح جوا

<< وشلون تجي هذي؟؟

يوم جا صباح الغد<< احلى

ويروح ابو مهند بيجيب فطور على قولته يبي يفطر على البحر من يومه بزر

ما سواها..

وجاب فوله ونسى الصحون

<< سعودي رومانسي

وروحه وجيه يبي يصير فطوره كامل مره يجيب الصحون ومره يجيب الملعقه ومره يجيب الشاهي

والنتيجه اننا افطرنا في النهايه بس الفطور كان ينافس دجاج ساديا في الفريزر

ومدري وش نسوي الحين انا الحين معصبه..الشمس احرقتنا والخيمه مقفله...

ابو مهند · 24-05-2004, 03:17 PM

وقفلت على سويسه ..باب الخيمه واخذت المفتاح معي ..

ورحت استاجر دباب بحري ... يوم شغلت الدباب .. ويمر من عندي طائر النورس .. ويذكرني بسويسه

لانها تحب الاغنيه .. وارجع ريوس ..في الدباب ..للخيمه .. وادق جرس الخيمه على سويسه

قالت بصوت عالي .. مين عند الباب ؟ <<< معصبه

قلت .. افتحي انا ابو مهننند

قالت .. الله يلعن ..... قلت ... استغفري لاتلعنين .. افتحي الباب ولا كسرته

قالت .. كانك ولد ابوك اكسره .. والله لاتصل على الشرطه

قلت .. سويسه حرام عليك افتحي الباب .. الناس يتفرجون علينا وبعدين انا باركبك معي في الدباب

قالت .. دباااب .. دباااب .. وينه فيه ؟ <<< تقدر شي اسمه دباب

قلت .. هذاني رابطه بالخيمه <<< تيس مو دباب

وتطلع سويسه من الخيمه واركب الدباب ..وهي وراي .. ونسيت افك حبل الخيمه

وعلى طول .. للبحر .. والدباب يسحب الخيمه ورانا ... يوم ابعدنا .. بدا الدباب .. يصير ثقيل

ويمشي بشويش .. وفي الاخير .. طفا الدباب

وقامت سويسه تصيح .. تهي تهي .. ماعلي منك رجعني .. ابي امي ابي ابوي ابي شغالتنا

( جحدت ابي زوجي ) .... ويوقف الدباب فينا .. وتطفى الشمس ويجي الليل ..

قالت سويسه .. الحين وش بتسوي يالفالح .. من اخذتك وانت من ورطه الى الى ورطه ...

قلت ماعليك ياسويسه .. ترى اللي معك ذيب . عااااااوووووو ... يوم قلت عاااااووووو ... سمعت صوت خرفشه

في البحر ... لبست نظاراتي .. واشوف .. حبل الخيمه زانط .. درفيل .. وساحبه معنا ..

وافك حبل الخيمه عن الدرفيل ... ويجي عندي الدرفيل ودموعه اربع اربع

ضربت على ظهره .. احتريه يروح .. ويحلف اننا نركب على ظهره

قالت سويسه .. لاتقطع حلفه يابو مهند .. خلنا نركب وش ورانا ..

ونركب على ظهر الدرفيل ... وخمس دقايق .. الا هو موصلنا .. للشاطي <<< الحمدلله على السلامه

ونلقى امة محمد في انتظارنا .. ودوريات واسعافات .. وغواصين ..كلهم واقفين ينتظرونا <<عاداتهم

بنت النور · 25-05-2004, 05:31 AM

ومازلنا في انتظار سوسه

على احر من الجمر

والله اني متابعه يومياتكم من طئطئ للسلاموا عليكوا

الله يوسع صدوركم بالعافيه

تحيه عطره من بنت النور

المجهول · 25-05-2004, 03:09 PM

مشالله عليكم شريت فشار مرتين وهذي الثالثه من قوة الفلم

يالله كملوا اخلصوا تراني متحمس

<<<< قروي ودخل سيما<<< سينما بس بالمصري

تقبلوا تحياتي...

بنت النور · 25-05-2004, 08:50 PM

يالسيما كم مره سنترت في مصر يالداج

هههههههههه

sosah · 26-05-2004, 01:28 AM

دايم الكل ينتظرنا يا ابو مهند عشاننا مهمين<<< ترقع

ويستقبلونا العالم وفرقة حسب الله ترن عندنا وكالعاده ابو مهند خش جو وجلس يرقص معهم

زيران لين طاح مغمى عليه

<<< ياكثر ما يغمى عليه

ورجعت للشقه ضايق صدري لأني لاحظت اننا كل ما طلعنا طلعه ارجع للشقه لحالي ويروح هو للتنويم

ويوم جيت بارجع ما لقيت ليموزين يوقف لي..

وأشرت لسياره عاديه وداني الله يجزاه خير للشقه وكأني خشيت مزاجه وطلب يدي وقلت سير علينا بعد 3

شهور<<< ناويه تطلق والعصمه بيدها...

بس ما زلت افكر اطلق والا ما اطلق..

باروح اجيب لي سعفه واقطعها وحده وحده اطلق والا ما اطلق..

لطلق ما اطلق اطلق ما اطلق اطلق ما اطلق يووووه تعبت من العد يكملها عني ابو مهند اذا رجع من المستشفى

بس وش رايكم اطلق والا لا..؟؟

ابو مهند · 26-05-2004, 08:53 AM

احس ان هالحرمه .. ملت مني .. وودها تطلق .. وانا الان اكتب لكم من مستشفى المانع بالخبر .. وارسلت لي

رساله .. على جوالي ... تهددني في الطلاق .. وانا على السرير ( الابيض ) <<< مع ان المفرش اخضر

وهذي نهاية العشره .. والحريم مالهم امان .. يطلقون .. ويتزوجون غيرك بكل بساطه .. واذا . ماودها تطلقك

تزوجت عليك .. وجابت لك (ضرير ) <<< على وزن ضره ....لكن خله ينفعها .. ويقلب حياتها جحيم

وما راح يوديها ماليزيا .. ولا مكه .. ولا سوق البوادي .. ولا حديقة الثلج

وانا الان ( مغتث ) .. و ( حايمه كبدي ) و ( مرتفع عندي الضغط والسكر ) و ( متهيج القولون ) ...

يوم ارسلت لي رساله .. وقالت .. انها بتتزوج علي

وانا جالس اكتب هالرساله لجمعية الرفق بالحيوان ..

وانتظر الطبيب يجي يشوف الضغط .. واذا جت الساعه 9 في الليل .. ومازارتني سويسه

ناوي افك .. لي المغذي .. وهالاسلاك اللي مربطيني فيها ... وانتحر <<< يقدر الموع

sosah · 26-05-2004, 02:33 PM

وانتهت السعفه على كلمة ما اطلق وانقهرت

قلت ليه دايم حظي اقشر كذا؟؟

بعدين قلت يالله ابو مهند مش بطال...

<< اواسي نفسي بس...

وجا اليوم اللي بيطلع فيه ابو مهند من المستشفى واضبط الشقه واضبط الوضع واجهز القوارير خخخخخخخخ

والثلج <<< لا تفهمون غلط عصير تفاح

واولع شموع في كل البيت مع اني ما احب الشموع بس قلت عشان يسحب ابو مهند من هالكربونات

ويموت وافتك منها اني اتحرر ومنها اني اورثه..

<<< امزح والا اقول ما امزح

يوم دخل للشقه والجو كله رومانسي على ضوء الشموع فجأه كل اللي حولي تحول لأبيض ولع الانوار..

الله يرج السعوديين الرومانسيه من جهه وهم من جهه..

عاد انا انقهرت بس عشان مخططاتي راحت وطي..

وقلت يالله خيرها في غيرها وكل تأخيره فيها خيره..

ويجي ابو مهند ويجلس عند التلفزيون ولا كلمني ولا كلمه..وانا استغربت غريبه مهيب عوايده

يطنشني كذا؟؟؟

قلت ابو مهند وش فيك؟؟

قال ما فيني شي..

قلت من جد وش فيك..

قال ما فيني شي

طيب ابو مهند وش فيك؟؟؟؟

<<< تحسفت...

ابو مهند · 26-05-2004, 03:00 PM

وهي جالسه ..تكلمني .. وش فيك .. وش فيك .. وانا ساكت ... وجلست تعتذر ..<< طيبه

وتحسفت على كل المقالب اللي سوت فيني .. وجلست تذكرني .. بالسفريات .. وطلعت البوم

الصور .. نتفرج عليها .. كل هذا .. وانا ساكت بس .. اهز براسي .. مره فوق ..يعني (زعلان واتغلى ) <<< ياشيني

ومره .. اهز انزل راسي تحت .. يعني مبسوط ومتشقق .. وفي الاخير .. عصبت علي .. وقالت : انت هيه .. ياولد الناس

بتتكلم ولا وشلون ؟<< توني اقول طيبه طلعت قشرا ..

وفي الاخير نزلت مني دمعتين .. من كل عين دمعه ..

قالت : وش فيك ؟ تكلم ..

اشرت على لساني .. وفي الاخير .. عرفت سويسه اني قبل ما ادخل الشقه كنت عاض على لساني ..وما اقدر اتكلم

وبكرا ويكند .. وانا عازم سويسه .. في رحله بحريه .. للبحرين ,,

الى اللقاء ,,

الزعيم · 26-05-2004, 03:17 PM

يعطيكم العافيه يا سوسه و ابو مهند

يوميات خياليه صراحه!

مواضيع ذات صلة
الموضوع	الكاتب	المجلس	المشاركات	المشاركة الأخيرة
أحاديث عاشورية غير ثابتة منتشرة في بعض المنتديات	عباس رحيم	المجلس الإسلامي	3	26-01-2007 11:28 PM
شهر محرم ويوم عاشوراء	أختـــ، رجـــالـ، مآ تهابـــ، الرجـــالـ،	المجلس الإسلامي	3	26-01-2007 04:25 PM

يوميات ..ابو مهنـــــــــد ..و sosah

على تسريحة اللبنانيه

المساجله الفرفوشيه..

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق