ملاهي الخيمة وأول خلوة

اللي مايحب يقرى لايدخل من الحين واللي ناوي يقراء يقطع الاتصال اوفرله





في عقد من العقود الماضيه فترة الصيف بعد النجاح الا ماده طبعا زي العاده
العالم تطلع وتنبسط اللي يسافر واللي يجود عندهم خالاتهم شي طبيعي
الصيف لازم يجون يصيفون في قوايل الرياض المهم مرة من الامرار جونا خوالي
من احدى القرى القاحله عاد اذا جونا لازم نمشيهم ونوريهم معالم بلادي الحبيب
قلنا ياولد ماعندنا الا ملاهي الخيمه
طبعا حنا مانروح للملاهي الا اذا جونا خوالي اذا بغينا نروح لازم نخليهم يجون
من الديره عشان تتسنى لنا الفرصه ونطلع للملاهي
لان اخوي البكر الله يطول بعمره خاقن مع وحده من بنات خالتي ولازم يتنيفش قدامها
يعنني تراني بار باهلي وهو من جنبها تشوفه على الصالون الاحمر يتمسمس وطاق
نظارات راغب علامه قبل على عزها طبعا
مالكم بالطويله قعدنا نظبط للطلعه




مقادير الطلعه:-

- زوليه
- سلة شاهي وقهوه
- بسكوت ابو ولد وابو ميزان
- حب شمسي
- ترمس مويه


حملنا الا غراض في الصالون وركبنا 25 نفس في الجمس يمين بالله انواع الخياس
طبعا كنت توني بزر هاك الايام بس نص استواء يعني بديت ادخل سن الرشد
بس اني قزم ودنيء وشكلي ابو 8 سنوات وانا ايامها بالمتوسط بس تلقاني اقعد مع الحريم
<<< يقدر سوالف الحريم ودايم ينطلوني باخر مرتبه طبعا المرتبه اللي ورى
شايلينها عشان تشيل اكثر
ومافيه الا صياح هالمبزره واحد يصيح ووحده تقول يمه شوفيها تلزق العلك بشعري
والثانيه تقول يمه متى بناصل والثالث يشخمط على المرتبه
ووحده تغير خفاظة ولدها وربك الكعبه يالبودر عاج بالصالون تقول انفجار







وصلنا ملاهي الخيمه طلعا قبل ندخل فيه سوداني عير واقف عن البوابه الخارجيه
يقيس طبعا انا مار وكلي غرور لانها على الطول مهوب على العمر وانا قصير مبسوط
( انقهرو يالعيره)
دخلنا طبعا كانت ذيك الايام يحطون اعلان بجريدة الرياض كل اسبوع( الدخول مجانا للعائله حامله هذا الاعلان)
ورجعك مايوفرون يشترون ثلاث جرايد عشان ندخل ثلاثين نفر
دخلنا وقعدنا نطامر مابين سيارات التصادم مرورا بالاخطبوط ومغارة الاشباح
وقف عند مغارة الاشباح ...
شفت وحده ياعيال الخالق الناطق من رانيا برغوث على عزها ايام عز الام بي سي
ومعها اثنين من عيالها << وشدراك انهم عيالها اسمعهم يقولون لها ماما
<<< يعرف يتنقى من صغره والله شفتها وخقيت صراحه تعرفون فتره التغيرات الجسميه
مع البلوغ وانت محشور بين انواع البنات اشي اسود واشي ابيض واشي برونزي
تضيع علومك
قعدة اتميلح عند عيالها واركب وراهم واسمع ولدها يصايح يوم بدة اللعبه
قلت يابابا لاتخاف عادي تراها كذب كلها صور ناظرتني امه بنظره كلها سحر
قالت شوف الشاطر مايخاف خليك مثله(بلهجه بناتيه) قلت يلعن ام الشطاره ياشيخ
نزلنا من اللعبه ونوقف برى قعدت تربط جزمة ولدها وانتم بكرامه
طبعا انا واقف لاني مدقر بقوه قلت ميد ولدها وش اسمك <<< يلعن ام البرائه
نقزت امه قالت اسمه احمد وانت وش اسمك قلت انا سعد القوي والاقر على الله
قالت سعد القوي ايش
* من هنا بدت اللعانه قلت ياولد لازم اعلقها قلت سعد القوي الراجحي وكان وقتها
معي بيجر ابوي واطلع البيجر اشغله واطفيه عشان تشوفه

شافت البيجر وخقت البنت قالت لك قلت ايه هماني قايلك اني ولد الراجحي
طبعا وقتها ما اعرف الا الراجحي لاني كل ماقلت لابوي الله يطول بعمره عطني فلوس
قال شايفني على ميزانية الراجحي فلقمت معي وقتها حسيت ان هذا وقت الراجحي

المهم قعدت اسولف انا وياها ونتمشى وعيالها معنا وانا ماسك واحد وهي ماسكه الثاني
تقول زوجتي ونمر من عند المطعم قلت تعالي عازمك وتقعد تظحك حسيت انها
ماخذتني على قد عقلي قالت يالله ونمر من عند اهلي وهي معي واوريها اهلي
قلت شوفي وشرايك بهالقراوا وتقعد تظحك
<<< يلعن ام القله







والله وندخل هذاك المطعم اللي بالنص كنه خيمه ونطلب عشى الله يديم النعمه
طقني السهال بعدها اسبوع ويوم خلصنا قال ولدها ماما برروح للحمام
قالت روح انت واخوك وتعالو بسرعه انتهزتها فرصه قلت اكيد انها خاقه وصرفت عيالها
تبي الرقم واقعد اناظر عيونها قلت لها تصدقين انك تشبهين رانا برغوث
قالت كثير يقولونه بس انا احلى منها قلت اكيد مابدهاش
قالت انت وين ساكن واسئله واجد تقول جاي اخطب طبعا انا رايح ملح
ماخليت شي ماقلته حتى وصف بيتنا من داخل قلته لها ومشاكلنا وكل شي
فضفضت لها <<< الا قل خرخرت لها حتى رقم البيت ماعطيتها البيجر عشان مايزرفها ابوي
قالت تعال بكره هنا للملاهي بنجي احنا مره ثانيه قلت والله بصراحه
حنا ناوين نطلع بكره لباريس نصيف هناك بس اذا طلع الصالون من الورشه
رحنا وانكانه خربان خلاص جينا مره ثنيه بس ترى مانيب جاي الا عشانك
قالت ربي يسعدك (تراها حجازيه)







المهم جانا ولدها يركض قال ماما ماجاك امين قالت الله يلعن اصلك (باللهجه هذي)
وين اخوك قال دخلت الحمام وخليته عند الباب ومالقيته وتنتفظ امه وتصارخ
وانا اقعد اهدي فيها قلت لها هدي من روعك ياكيلوبترا قالت ياويلي من ابوه
هههههههههههه
ماهمها الا ابوه بقريح الولد
ونقعد نفر الملاهي ندوره ونفر نفر نفر وامر من عند اهلي قلت ماشفتو واحد صغير
اسمه امين وامه حلوه ضايع قالت امي اقول امش اللي يصلحك اخوك عند الباب
واقعد ساعه يمكن ادور انا بجهه والمره بجهه الماريه اني ماعاد شفتها
شكلها لقته وانا قاعد ادور فريت الملاهي فر لين انقطعت جزمتي والبواب ينادي
( الطفل سعد القوي ) التوجه للبوابه الرئيسيه للاهميه يمكن عشر مرات
وانا مطنش مخلص للبنت قاعد ادور ولدها ضايع ياناس لازم القاه
شوي واسمع صوت اخوي ينادي ( سعد ياورع اطلع لاجلدك ) وانا مصر اني القى الود
والله لو انام عندهم ماخليت عامله ماسئلتها ماخليت خاله ماخشيت بعينها
حتى النقاشه سئلتها
فجئه دق البيجر واطنش الولد واقعد ادور تلفون والله الحاله واتصل ويرد علي
اخوي قال تعال ياورع اطلع انا اعلمك وشلون تطنش
من الخوف بغيت انحاش والله واطلع وانا اتنافظ تقول عصفور غاطس بمويه
طبعا الملاهي بدت تطفي انوارها ويوم اقبلت على البوابه الا اخوي واقف
معنز جسمه بيدينه يناظرني وانا جاي قلت خلني اخمه قبل يخمني قلت ماطلع
واحد صغير اسمه امين ظايع قال امين؟؟ ويفصخ العقال وخذ ياتلزيخ
وخذ يامحط وطق ولسب وتكفيخ وامي تفكه وخالتي تسحب الولد والعالم تجمعة
وانا قاعد اصيح دموع ونخارير وينطلني بشنطة الصالون اخر شي وانا متسفط
من الصياح لين نمت ...







بس خلاص


الملخص:-
1- ابي اقول لام احمد انكانها تقرى الموضوع وعرفتني ترى رقم البيجر نفسه ماتغير
2- ترى بالماريه كنت لابس طقم الهلال رقم خمسه (صالح النعيمه)
3- وانتي كنتي لابسه جنز ازرق وقميص سماوي وعيالك لابسين تيشرتات سود الرجل الوطواط
4- احمد ربي اني قصير
5- هذا اكبر سبب لدجتي الحين اني من صغير انحرفت


تحيه عطره للنقاشه