كل الطرق تؤدي إلى استورياس

قاصد · #1

وقفت لساعات انتظر صديقي مرزوق أن ينهي إجراءات تختيم جوازاتنا بالمطار وذلك لحضور زواج ولي العهد الأسباني فيليبي وقد أزف الوقت ولم يبقى إلا عدة دقائق لنتوجه بعدها إلى البوابة رقم 18 حيث كنا في حيرة من أمرنا . . ياترى ما الهدية الأنسب التي سنقدمها للعروسين .

اقترحت انا على مرزوق أن يضع كلاً منا خمسمية ريال في مضروف خاص لنسلمها للعريس حال مقابلتنا له . . قاطعني مرزوق قائلاً :

بلاك متعود على قصر افراح الربيع والا قصر سلطانه . . وين ياخوي . . أية خمسميه وأية مضروف ؟ وش رايك نشتري سواكني من مدريد ونوديه يم المعرس . . منها نحفظ الفلوس ومنها نمد مثل الرياجيل ؟

أخذت مكاني في الطائرة وإذا بالأمير سلمان بن عبد العزيز يقف شامخاً في إحدى ممرات الدرجة الأولى فنظرت إلى مرزوق وقلت له : ويحك يامرزوق . . مو بذا الأمير سلمان ؟

قال : ايو الله انك صادق. . تعال خنا نسلم عليه . . قلت :

أقعد الله لا يسلم فيك مطق ابره . . هالحين يشوفنا ويقول وش موديكم يم اسبانيا يالدشير؟ خل لين الطياره تظهر من السعوديه بعدين نسلم زي ماتبي . . اسمع كلامي وخنا نقزر لزومنا بستر ومصونه ولا نتنقد مع الرجال اللي عازمنا . . انت ناسي انه جا في عرس خالك حمد ؟ قال :

في هذي معك حق . . تدري انا بروح الحمام وانت صرف نفسك لا يشوفك . . عندها أخرجت من حقيبتي مجلة فواصل وأخذت أقرأ شيئاً من قصائد بشاير الشيباني .

حانت ساعة الإقلاع والكل ربط الأحزمه وبدأت الطائرة ترقى على متن الهوى . . قلت لمرزوق :

الله يامرزوق . . تذكر ايام كنا جنود نمسك خفارات على البوابة . . ضحك مرزوق ملء فاه وهو يستشعر تلك الفترة التي قضيناها مع بعض في إحدى سرايا الجيش . . ثم أردف قائلاً :

الله يخرب كيف ياشيخ . . هالحين هذا وقته ؟ يعني لازم تغثي على كبدي وتذكرني بالسهر والنكد . . ياخي لا تضيع علينا فرصة الاستمتاع بالرحله الله يخلي لك علي واخوانه برحمة والديك . . اسكت بس اسكت والا دورنا من السوالف اللي تشرح الخاطر .

قلت : ياخي انا ما فاجر نحري مثل العريف غرم الله اللي من يوم يشوفني تقول ابليس راكبه . . قاطعني مرزوق :

اييييييييييييه يهبا وانت ماتهبا . . والله ان ودي يوم ادعسه بالسياره واريح الناس منه . . عندها بدأ مرزوق يأخذ منحىً آخر للسوالف . . وقال :

كم معنا من الدراهم ؟ قلت :

انا معي الراتب برباطه ماصرفت الا قيمة التذكره يعني 2700 ريال . . وانت كم معك ؟

قال : انا معي . . فأخرج من جيبه المحفظة وبدأ في عد النقود . . عندها رفعت نظري إلى أعلى لأرى سمو الأمير سلمان وهو واقف بجانبنا وينظر إلى مرزوق وهو منهمك في عد امهات ميتين محدثتاً صوتاً يبدد الهدوء بداخل الكابينة . . فنكأت مرزوق بمرفقي محاولاً لفت انتباهه للموقف . . ولكن لا حياة لمن تنادي . . أكمل الأمير سلمان مسيره وأضنه كان ينوي الذهاب إلى دورة المياة . . عندها التفت إلي مرزوق وقال : انا معي 3200ريال اشتريت منها ثلاثه كروز مالبورو من المطار يبقى معي 5047 ريال . . قلت :

طيب الامير توه متعدي من جنبنا وشافك وانت تعد الدراهم . . وش رايك اذا رجع لمكانه نقوم نسلم عليه . . قال : تم .

عاد الأمير سلمان إلى مقعده وبدأنا مرزوق وأنا نتأهب للسلام على سموه . . وبعد السلام طلب منا أن نجلس نجانبه . . وأخذ يسألنا عن سبب رحلتنا هذه . . فأخبرناه بما كان منا وما سيكون . . واستشرناه في ما سنقدمه لولي العهد فيليبي .

ضحك الأمير بملء فاه . . ثم قال : طيب يوم جاكم الامير فيليبي في عرس حمد وش جاب معه ؟

قال مرزوق : أبد ماجب شي .

قال سمو الأمير : طيب خلاص المسأله محلوله . . انتم مايلزمكم شي .

نظر مرزوق إلى وقال : وش رايك ياخوي . . قلت صن !! قال مرزوق : لا أشكل . . تستخف دمك انت ووجهك قدام الامير ؟

قلت : صن يامرزوق يعني تم . . خلاص مابعد كلام الامير كلام . . والمسأله محلوله انتهينا .

===================

المشهد الثاني

في كنيسة المودينا بمدريد جلست مرزوق وأنا نتابع وقائع مراسم العرس في جو ماطر لم نعش مثل تلك اللحظات طوال عمرنا فالمشهد يعد غريب والجموع قد التحمت تود القاء التحية على العروسين . . وحان دورنا لإلقاء التحية . . فتقدم مرزوق وبدأ يحيي العروسين ويأخذ الصور التذكارية معهم وقبل أن يهم بالإنصراف سأله الأمير فيليبي :

وين خالك حمد ماني شايفه ؟

أجاب مرزوق : والله الرجال يعتذر منك ياسمو ولي العهد . . تخبر مدارس واختبارات . . والا والله الرجال مايكره العلوم الطيبه . . ويقول سلم لي على الامير كثير السلام . . وبلغه العذر .

نظرت ليتيسيا قرينة ولي العهد إلى مرزوق وقالت : سلم على خالك حمد وقله . . خل عنك التعالي واتركك منه .

أومأ مرزوق إيماءة متخاذلة محاولاً الابتسامه وانصرف لا يلوي على شيء .

ألقيت التحية ثم تبعت مرزوق وأيقنت بأنه لن يعزم على مثل تلك الرحلات فقلت له :

وش رايك في ماربيا بعد العرس ؟ ناخذ منها سواكنيات للديره .

فأخذ يركلني بقدمه وهو يقول اصحى . . اصحى قوم خفاره . . ففتحت عيني لأجد غرم الله يعينيه المحمرتين ينظر إلى ساعته وهو يقول هيا قوم البس بدلتك ياعسكري واستلم خفاره على البوابه .

قمت فتعوذت من الشيطان الرجيم وذهبت إلى البوابة لأجد مرزوق يهم الذهاب إلى غرفتي التي أتيت منها ليخلد إلى النوم .

قحشة مصاقيل · 25-05-2004, 01:51 AM

هلا والله وغلا بالقاطع قـــــــــاصد

يا مرحبا ترحيبتن مهيب سهله

مالك حس ولا خبر يا القاطع عسى منتب زعل بس<< كل تبن فيه اختراع اسمه رسائل خاصة

موضوعك رااااااااايق من جد منفقع من الاقلاع والاستلكاع والابداااااااااع

اقتباس


	انتظر صديقي مرزوق أن ينهي إجراءات تختيم جوازاتنا بالمطار وذلك لحضور زواج ولي العهد الأسباني فيليبي

يلعن ابووووووو القوه

مالقيت الا ولي عهد اسبانيا

لوك قايلن زواج القذافي كان صدقتك

اقتباس


	اقترحت انا على مرزوق أن يضع كلاً منا خمسمية ريال في مضروف خاص لنسلمها للعريس حال مقابلتنا له

هههههههههههههههههههههههههههههههه
هههههههههههههههههههههههه
ههههههههههههههه
ههههههه
هه
ه

اقتباس


	أخذت مكاني في الطائرة وإذا بالأمير سلمان بن عبد العزيز يقف شامخاً في إحدى ممرات الدرجة الأولى

كيف الحال

اقتباس


	هالحين يشوفنا ويقول وش موديكم يم اسبانيا يالدشير؟

هههههههههههههههههههههه مقلع بقوه الله يرجك

اقتباس


	والله ان ودي يوم ادعسه بالسياره واريح الناس منه

اشوى انه ما سمعك ولا كان طقك بواحد عقاب يحبه قلبك

اقتباس


	انا معي 3200ريال اشتريت منها ثلاثه كروز مالبورو من المطار يبقى معي 5047 ريال

ههههههههههههههه اقلاع على حبه ونص تحشيش

اقتباس


	نظرت ليتيسيا قرينة ولي العهد إلى مرزوق وقالت : سلم على خالك حمد وقله . . خل عنك التعالي واتركك منه

مهيب عاقله ليتيسيا بنت عود بن مرواس

ههههههههه شكله والله العالم به عرق قصمنجي اللي تعرف خل عنك التعالي

اقتباس


	فأخذ يركلني بقدمه وهو يقول اصحى . . اصحى قوم خفاره

هههههههههه اما اصحى قوم خفاه ... تسني به من ذيك الديار

ههههههههههه صح النوم يا قاصد

موضوعك مقلع بجد

وابدااااااااع معهود منك يابعدي

ولا تحرمنا طلاتك يالغالي

ولاهنت

Nasser · 25-05-2004, 04:47 AM

قاصد

هههههههه

مشكور وما تقصر

اجل كل ذا الحوسه لسفره

وكل ذا القعاد في الطياره

وكل ذي السواليف

وكل ذا المطاق اللي بينكم

وكل ذا اللقاءات اللي صارات مع الامير ومع ولي العهد حق اسباني >> عاد خلص

يعني كلها في الحلم

هههههههههههههه

والله انه حلماً جيد

بس والله القومه شيء

تشويت وبعدها مسكت الخفاره

تسلم على ذا الحلم

الله لا يحرمنا منك

والله يعطيك العافية

تحياتي

بنت النور · 25-05-2004, 05:28 AM

والله اني صدقت على بالي صدق حاضر عرس فيليب ذا مدري وش اسمه

لانه توه معرس وكاتبين ف الجرايد الامير سلمان يحضر عرسه بس مدري وش هديته بالضبط

الله يرجك اثاريه حلم

ياكثر حلومكم ياعضاء الرياض خخخخخخخخخخخ

لك اجمل تحيه من بنت النور

قاصد · 25-05-2004, 11:33 AM

لاهان غاليك اخوي ولد الرياض . . تسلم ياقمر .

قاصد · 25-05-2004, 11:37 AM

يسلم عمرك اخوي ناصر . . وش تقول في الحلم اللي ماله خاتمه ؟

قاصد · 25-05-2004, 11:42 AM

اقتباس


	والله اني صدقت على بالي صدق حاضر عرس فيليب ذا مدري وش اسمه

اما عاد . . لا ماهي للدرجه هذي

اقتباس


	ياكثر حلومكم ياعضاء الرياض خخخخخخخخخخخ

للتصحيح فقط . . هذا الحلم من جده

تسلمي على المرور اختي بنت النور

المجهول · 25-05-2004, 02:40 PM

^
^
^
حلوه هذا الحلم من جده هههههههههههههههههههههههههههههههههههههههههههههه

يعطيك العافيه على هالحلم الأكثر من رائع

تقبل تحياتي...

قاصد · 25-05-2004, 08:03 PM

تسلم اخوي المجهول وسعدت بمرورك

الزعيم · 29-05-2004, 02:36 PM

ههههههههههههههه
ههههههههههههه
ههههههههههه
هههههههه
هههههه
ههههه
هههه
ههه
هه
ه

يا حبي لك يا قاصد

ضحكتني والله في يوم السبت ! <<<<< مو بالعاده!!

تسلم هاليدين يالغالي

كل الطرق تؤدي إلى استورياس

أمي ابو خليل

من بادي الوقت

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق