الرد العملي على مدعي انعدام سناعتي

[c] [/c]
بسم الله الرحمن الرحيم..

السلام عليكم ورحمة الله وبركاته..

أتقدم بخاطرة ملؤها الأسى والألم لكل من

اتهمني بقلة السناعه وقلة الظفارة حيث انه حز في نفسي كثير

فكرة بعض الأعضاء عني بأني غير سنعة ..

وبما اني اعاني من التحدي المستمر لذاتي..قررت ان اثبت للجميع

اني سنعة سناعة موروثه ومكتسبه.. وأنه لا يجب ان تصدق كل ما

تقرأه..

إليكم أول بوادر السناعه..

7
7
7


عصير تانج وتوت مرة وحده في سلة ..يمديكم عليها..

والليمونتين والطماطه المفعوصه مسويه جو ..

<<<مسوية انجاز ينقال لها..

إذا بغيتوا الطريقة قولوا لي..

7
7
7
7


شاهي يعدل الراس..بالمقاس اللي

تبون كبير صغير وسط كبده كلاوي..

7
7
7
7


بيض ارانب توه ما انسلق يحبه قلبك..

سؤال وجيه...الأرانب تبيض والا تولد..؟؟؟

7
7
7


لبن باصلح به ان فضيت باذن الله سلطة خيار باللبن أو باحطه على

السفرة كذا..

<<<شفتوا انكم ظالمينها..

بس وش رايكم في الخيارتين واللبن مهوب كأنها سيفين ونخله..

عندي وطنيه بسم الله علي ..:p وتراني ثبتها بشطرطون شفاف

<<<<بشري الوالده..

>>>>لا توصين حريص..

7
7
7
7


حلى كاسات مسكت بس للأمانه مو انا اللي مصلحته..أختي اللي أصغر مني الله

يخليها ..بس والله انا اللي مصورته..

باجيب لكم الطريقه اذا طلبتوها منيب قاعده أكرف في الكتابه على

الفاضي..

بس باقول اللي شفته من مقاديرها..كيك سويسرول شوكولاطه جاهز

وأعواد رينجو المشكلطه"يعني المغطاة بالشوكولاطه"..والظاهر

كاني منيب واهمه حليب نستله يمكن يمكن مهوب أكيد ودريم ويب

ومدري وشو بس اللي يعاني من البدانه لا ياكله لأنه بينفجر..

وختاماً..

باقول لكم طبخه حلوه حقت سودانيين مهوب قصدي في تقاليدهم

وانما في سرعة الاعداد تنفع للمستعجلين وحلوه أوي بس أول مره

أصلحها وباقول لكم النتيجه بإذن الله..

المقادير..

3شرايح توست..تقطعينها صغار بس مو مره..

علبة جبن كرافت تشيدر متوسطه تقطعينها بعد صغار..

علبة قشطة تقطعينها بعد صغار..

<<<< تبرمجت..

و ملعقة كبيرة بيكنج بودر.. و3بيضات تحطينهم في الخلاط بدون

البيكنج بودر واذا تخالطوا أو تجانسوا حطي ملعقة البيكنج بودر

عليها وخليها تدور دورة وحده بس

بعدين جيبي صينية تيفال مدهونه وصبي الخليط فيها وواسيه

بالملعقه:cool: وحطيه في الفرن وشغلي الضو من فوق وتحت.

<<<< ضو يعني نار لعيال النيدو...

ولا تروحين عنها بعيد لأنها بتتحمر بسرعه فماله داعي تنقهرين

باحتراقه..

المهم تطلعينها من الفرن وبيكون شكلها ان شاء الله أحسن من كذا..
7
7
7

شفتوا اني منظوله..

وبعدين تجيبين ورق التغليف النايلون وتفرشينه على صينيه أو

صحن وتقلبين الصينيه عليها..
7
7
7
7

سبحان مغير الأحوال..انفتحت نفسي يوم شفتها كذا..

بعدين تجيبين جبن مالح أو كريم وتدهنين به الوجه هذا وتحطين

الحشوه اللي انتي تحبينها انا حطيت تونه لأنه ما يبغالها الا شغل

شوي تفتحين العلبه وتكبين كب..

بس بيني وبينكم أخوي ما يحب التونه يقول مدري وشلون تاكلون

أكل قطاوه..

<<<<كلٍ بعقله راضي ياخي...

وبعدين تلفينها على شكل سويسرول بالطول مهوب بالعرض عشان

ما تكون الانثناءات كثيره ويبلش الواحد لين جا ياكل..

وتلفين عليها النايلون وتجيبين قصدير وتلفينه عليها وتحطينها

في الثلاجه لحين وقت التقديم...

حان وقت التقديم حسب التوقيت المحلي لتنزيل الموضوع..
7
7
7

يعني اذا كانت الصورة مهيب حلوه فمشوها لكن الطعم فظيع واذا

كانت الصورة حلوه فما جبتوا شي جديد عارفه ان اي شي أصلحه

بيكون حلو ان شاء االله..

بس ترى في طعمها شي للأمانه يعني حاولوا تحطون نكهه أو زيدوا الملح

شوي..


والسلام عليكم ..أرجو أن يكون في هذا الموضوع الرد الشافي

الكافي لمن اتهمني ظلماً وبهتاناً...

تحياتي للجميع...............



[c] [/c]

ابو مهند..

شفت ان الله ما يقدر شي الا فيه خير دايم...احمد ربك اللي افتكيت مني

عمار..

السناعه..تعني في مصطلح التماسيح السعوديه ان الوحده تكون ربة بيت ممتازه لايك مي اوف كورس

مجنونها..

انت الشيفه <<<< فاهمه غلط

مهاجر..

طيب ركب عوامه....

بنت النور..

انتي وش فهمك في البقدونس هذا عشان يعطي مظهر الحدائق المزهره...

بس والله اسمحي لي اما اصلح الحلى انسي والله اللي ما صلحته...