أنا والكلية

بسم الله الرحمن الرحيم..
هذه الرواية أبطالها حقيقيين وربما تحتوي بعض المبالغات ..إليكم الرواية..
حياتي في الكلية
أبدا يومي بيد أمي تطق الباب يالله قومي الفان يطق البوري ---<<< عاد أميمتي الله يرضى عليها تحب تسوي أكشن دايما..
عاد أقوم وانقز من سريري واشوت هالملابس اللي تحت رجلي وطربق طربق على الحمام بعدين ((جزء من النص مفقود)) وأصلي الفجر.. ثم أدور لي خلق ألبسه وتنورة أمس ماشاء الله على برمتها أمس ألبس الشراب المشقق وشنطتي اللي فيها ميدالية قطوة وتحتوي الآتي: علك عشان ماينصرعون البنات من الريحة ..روج أبو ريالين ولا أحطه بس برستيج في الشنطة ..حلوة برستيج.. قلم رصاص عشان السوالف في الكلية..عطر والحق يقال إني أتنقى أحسن العطور أحب الريح الزين .. وعايلتنا ولله الحمد خالين من داء الصنان القاتل.. عشرة ريال عشان الصبة والببسي وكاكاو بعد الظهر..شباصة من أمس..
ألبس بعد ذلك العباية والغطوة وبينما أنا في غرفتي إذ يداهمني الوقت ويجي الفان وهاك يابواري طااااااااااااط وطااااااااااااط المهم إذا إنصرع السائق السعودي من القهر طلعت أتمذرع.. واركب الفان ولا هو أي فان سيارة المخابز الله يفشلهم المهم أفك شنطتي واجدع العلك في حلقي وأفك البكلة وأمعط هالكشة بالفرشة إلين يطيح نص شعري من كثر العقد اللي فيه .. والحال الصباحي في الفان إما أن أشاخر حتى أصل للكلية وإما أن نتقهوى وإما أن نطلطل على السيارات ونشوف الرايح والجاي ..
أصل لكلية الأحلام وأدخل ...الحمدلله هالبنات فصخت عقولهن وحدة ماطة هالظل (الشدو) إلين إذنيها ووحدة مجعدة شعرها لين صار أندومي ووحدة باخة في وجهها شي تقعد تلامع لين نطلع.. واللبس حدث ولا حرج.. اللي كتوفها طالعة واللي حاطة صورة غيتار على بلوزتها ( أمحق طالبات علم) واللي ماطة البلوزة عشان تبين الماركة واللي مخلقنة من كل شكل البلوزة خضراء والنعال ذهبية والله يستر من الباقي حتى ملابسهم الداخلية يختارونها بالوان فاقعة عشان تبين من تحت البلوزة اللهم لك الحمد...
أرقى لقاعتي و ألقاهم مرتزين بكراسيهم عند الصبورة من الدفارة..
أتحمد وأتشكر وأسحب رجلي إلين ألقى كرسي فاضي وأخبط فيه وتتنوع المحاضرات مثلا عندنا مصرية لا إله إلا الله عليها حنجرة ماقد جاها لوز.. من يوم تطلع الين تدخل- الله من الرجة بالعكس-وهي قرقررقرققرقرقرقرقرق..
وأنا دايم ناشبة في حلقها أستاذة كثير مانقدر نحفظه في الإختبار وتتعذب المسكينة مني للأسباب التالية: أما معارضة على طول المادة أو أستأذنها ولا أرجع لين أتوقع أنها تحضر البنات وإما أشاخر وإما أسولف والأدهى والأمر انني لا أكتب أي محاضرة..
أما السودانية الله –يازول ماترحم عليلٍ يحبك- بس بنت حلال ماتكثر الحسي أبد كلمة ورد غطاها والاسئلة برى المنهج سعة صدر لين شفت ذا الدوافير منصرعين عشان بعض الأسئلة من برى ولا عرفوها..
والأردنية عسللللل تهتم بالطالب كإنسان ليس كحيوان آلي.. الله المستعان..
تجي الفسحة وتشوف ذا العصلان طايرين للكافتريا وجع مدري وين يروح كل ذا الزرط والله أن ذا الهايفات يكسرون أختكم..
أشتري الصبة الحبيبة والببسي حطوه بريالين إضطرينا بعدها لعصير الربيع.
أنطق على الطاولة وأزرط مع زميلاتي وهات يالهذرة ملاحظة: طالبات الكلية مسيكينات مايسولفن إلا في المكياج أو العرس اللي مقطعن قلوبهن وعقولهن..
أما بالنسبة للمكافئة حدث ولا حرج يوم كانت نقدا يسرقون منها عيني عينك لصندوق الزواج------< مسيكينة هي اللي ذابحها العرس..
المهم.. يوم صارت المكافئة سحب آلي بالصراف صار الوضع أسوأ حسبي الله على الظالمين..
وهكذا تمضي عجلة الحياة في الكلية السعيدة .. مابين أيام لك وأيام عليك ...
والسلام عليكم ورحمة الله وبركاته..
طالبة كلية منتهية عندها البطارية..
الله الله بالردوووووووووووود..