!!..رحلة تخييم مذهله في احدى الغابات الاستوائية..!!

مذهله · #1

في يوم من الأيام الهادئة وتحديدا في الصباح كان ابوي الله يحفظة يتقهوى هو والمعزبة (( امي ))

وهو يشوف التلفزيون وكان على قناة الـ mbc وكان فية دعاية سياحة في احدى الغابات الأستوائية ------ جازتلة الوالد الفكرة

ومير ياخذ التلفون ويدق على البرنامج وماقصروا قالوا يالله حيهم هذي الساعة المباركة نحتريكم يوم الأربعاء

عاد حنا تجهزنا وركبنا الطيارة واقلعنا للموقع وهم استقبلونا احلى استقبال وهم طاقين الخيام واجهزة التصوير حول المخيم

المكان مرة حلو رحت اتمشى بين الأشجار وانا مستمتعه بأصوات العصافير

فجأة التفت يمين ويسار مافي احد والتفت وراي مافيه الا انا والأشجار كلها متشابهة

واجلس تحت شجرة واقول انـــا ضــعت

ياربييييه وين ارووووح وكل يديني جرووووح الاشجار مخشتني لين قالت بس

قمت امشي بين الاشجار المتشابكه اللي كنها كشة عبده

ولقيت مفترق طرق

علقت شرابي على اكبر جذع في مفترق الطرق ودخلت طريق لقيت دوار (ماعندهم حرفT)

علقت فردة شرابي الثانيه عنده ومشيت شوي لقيت فردة شرابي الاولى ياااااااااا لهوتي

جتني صقطتون مصدمه عصبين وانفجعت فجعتون

رجعت لنفس الطريق مالقيت الفردة الثانية

وجع وجعين وين راحت وادووووور ادوووووور في دوائر مع ذلك مالقيتها شلون يعني تبخرت

واطلع الجوال وارعص المفاتيح اطلب خدمة البحث عن صديق (انا بوب فردة الشراب)

واحتري احد يقول وييييييييييييييييينك

ويلزقون اعلانات على جذوع النخل (تائهه يرجى المساعده)

وانا مغير اقول انا ضايعه الحقوني

وذاك الخبل ينط يقول محلووووووووووووووووله

حتى موجود انتظره يقول الي دخلتاه مدري وشو مهوب عندنا زيه (توصف خاتم)

بس لاحياة لمن تنادي الظاهر الرصيد خلص او الخدمه ماتوصل هنا

وانقلب ثيمي لغابه وشذااااااااا انها مصيييييييبه بل هي كااااااااارثه ويحها من كاااااااارثه

جعلت اصابعي تنكمش من البروده ورموشي تتمدد من الحراره

(لحسة مخ صدق)

تن تن الله رساااااااااااااااااااالة اخييييييييييييييييرا تهي تهي

لا هذي البطاريه فضت والجوال جاع والله النشبه

ويمر الوقت تن تتن وانا افكر تن تتن وافكر تن تتن وافكر تن تتن

وتطلع لي حوريه

من زهره استوائيه تقول قفلي جوالك ازعجنا نبي ننام

واسمع اصوات يمين ويسار واتخيل عيون تناظرني كلما التفت يمين ولا شمال

واحط رجلي واركض واركض واركض واركض طربق طربق

وماادري الا وانا عالبحر لقيت شجرة صغيرة مدري وش تبيع (تكرونيه على غفله

)

طلعت شجرة موووووووز وتنبت في مخيخي المستطيل فكرتون عبقريتون

قطفت الموز المستوي مسوووووود وكليته همن كتبت عالشاطئ (SOS) بقشوره

وتغرب الشمس على صوت زقزقة الضفادع ودموع التماسيح

وهمس الحيايا

ومقصات ابوجلمبو وجريان المجاري في مجاريها واريوس للغابه قلت اصوات النمل ارحم

تن تتن مازال الجوال صامد وادق على آخر رقم حق مدير الرحله الا وينشق الاتصال

ويصيبني فقر ذاكره

وتوصلني رساله تقول اقم صلاتك قبل مماتك تنعم بحياتك

وتحدد لي اتجاه القبله وصليت المغرب والعشا وجمعت وقصرت بعدها جعت وعطشت

وتسلقت شجره ادور جوز هند اشفطه ولا حتى خطيب حصه

مالقيت الا مووووووووز

واخضررررررر خضار المنتخب (بتصفقين) وازرطه زرط قلت لنفسي منتيب احسن من طرزان

مادريت الا بطرزان (ذكرت القرد قام يرد) ااااواااااااااوااااااااااوااااااااااوااااااااا

طااااااااااير متعلق بحبل ينقز بين الاشجار وراه قروده يلحقونه واناديه تعال يا طرزان ما عرفتاني

انا جييييييين

الا ومعاه جين تناظرني بطرف عين (الله من الغيره تكفين

)

قلت هوووو اقصد انا امك الي ماتت ءءءءءءء قصدي ما ماتت قصدي ماقصديش (توهقت)

سفهني وكمل مناقزه بين الاشجار فكرت وقلت مابدهاش لازم اسوي مثله

عالاقل اشوف الغابه من فوق واتسلق شجرة ولا اشوف شيء من اوراقها

واتسلق اكثر ولا اشوف الا اوراق وارقى وارقى

مافيه الا شجر طوله طول ابليس

وامسك حبل واسحبه وارمي نفسي بكل قوتي للشجرة الثانية واتطوطح قدام وورا

ابي اطمر واتمسك في الشجرة الثانية ماقدرت ويوقف الحبل في النص بين الشجرتين

وابلش بعمري وجع شلون يسويها طرزانووووه القررررررد

ولد الغوريلا (حمقانه عليه)

في الاخير تسلقت الحبل ووصلت للغصن اللي المربوط فيه وتزحلقت على جذع الشجره

ونزلت تيتي تيتي مثل مارحتي جيتي بس مصابعي جاها مصع وفتاق وانفهاق

يالله هو اني احرق الغابه علشان تصلع ومايصير فيها شجر واقدر اشوف خيام اهلي وينها

بس مالقيت كبريت ولا ولاعه والحصى رطب لو اصقعه ببعض بوب مطلع شرار استخرت ربي وهونت

مشيت ومشيت واسمع ذيابه تعوي وتذكرت ماوكلي فتى الادغال يعني اكيد اكيد الذيابه حليوه

واذا حاصرتني بقول انا اخت ماوكلي

الي طلعت في الجزء الجديد (فقشه ساكنه على الوحوش المتحركه)

وعلى قولة ليلو لستيتش الوحش احنا كلنا اوهاااااااانااااااااا يعني عيله وحده (مخفه

)

ولقيت غصن مرمي عالارض مسكته وحكيته بضروسي ليما قال ربي الله وسنيته صار مشرط

وثبت في بدايته بروش بالعلك

وخليت حديدته مفتوحه (على بالي راس السهم دبوس)

وقطعت مغاط ربطة شعري وربطته في عود ثاني وطلع قوس (روبن هود في غابة شيروود)

شفت ظل ريشه تتحرك وراي وقفت ووقفت الريشه التفت وراي حسيت بخيال يختفي

يمممممممه لاتكون اشباااااااااااااح او جناااااااانوه يماااااااااااتي

او يمكن ادهى وامر

يمكن اكلة لحوم البشر ولا الزومبي او سحرة الفادو (مدمنة قصص خيال علمي)

خفت وصرت انطل الموز بقشر وبدون قشر وراي علشان اللي وراي يزلق فيه ويتعكر

ونطلت القوس والسهم ورا ظهري وسديت اذني (تحسبه قنبله تذبه ويشتغل من نفسه

)

وامشي اسرع واديها هروله تركن تركن واشوف نار من بعيييييد قلت بس اوااااادم

اخيييييييرا واركض لهم ويشوفوني ويركضون لي ويصايحون هونقرا بونقرا هونقا بونقا

وتتقاطر دموعي من الفرحه وفي لحظة سحبوني وكتفوني

وربطو يديني على ورا في عمود

وهم يدورون علي ويناقزون ويبوبزون ويصفقون

دبببببببببكه وينك يافتووووو تشوفينهم

تعلمينهم اصول الطق تشششششك (بطني يصوصو تذكرت الفشفاش والبيبسي)

ويصفقون يديهم ببراطمهم اواواواواواواوا قلت لعنبوهم بوب سهلين يعرفون بوس الواوا

وكل واحد منهم متحزم ولا متعصم بشجر قلت يمكن اهل هاواي خليني اكلمهم بلغتهم

الووووها هاللللوووووللللوووووووياااااااااا ماحولك احد كني اكلم فرنسي باللبناني

واشوف واحد متفصخ بس حول خصره سعفة نخله واخبط يديني على عيوني

واخزياااااااااااااه

عمى عمى يعميه مايستحي اتاريه رئيسهم ويجي يطل في وجهي ويتمققققققققققل

لو انهم ماربطوني كان عطيته كف يخليه يمشي مليونين قدام

وبوكس يخليه يرجع مليونين ورا

ومسك رموشي مستغرب وش مطها بغيت اتفل في وجهه

بس مافيني سعابيل تسوىمن العطش

وقام يخربط بعدين مسك يدي ورفعها على فوق يعني وافق علي وغمضت عنوناتي

يااااااااااربي ارفض الخطاب الي جابتهم لي ليمونه سابقا شريره خلف الكواليس حاليا

صافين طابور مدرسه اثنين اثنين واخذ هالبرميل ابو كرشه تركض قدامه ووراه

لااااااااااا لااااااااااااع لاااااااااااع

اصوم اصوم وافطر على قرعه (الا بصله بس راسه مقرع)

وهاجت القبيله وطامرت وناقزت

كنهم في حفل افتتاح المونديال وطلعت زيرانهم

والله لو اني بوب مربوطه لاقوم اطامر واتنكس معهم

(هذا وهي مخطوفه ومخطوبه غصب خخخخ)

ابي اغني مااريدوووووه غصبوووووني زوجوووووني شااااااااايب مايطيق الصبراااااااااااااا

بعدين هجدو وحطو عندي حارس يراقبني لا انحاش وين انحاش وقد اوثقتو الحبالاااااااا

وامسكه برموشي

(اقول روحي منااااااااااااك ثقلتيها بزيااااااااااااده)

اقصد امسكه بمصابع رجولي (يقال لك هالحين خففتيها وبيصدقونك

)

قلت يالاخو تكفى والله اني مييييته جوووووع عندك شي ينوكل هم هم وادخل اصبع رجلي في فمي ابيه يفهم

قام رما لي قطع لحم الله لايوريكم حاط قطع لحم هذا كبرها ولا بعد عالارض تقل قطوه عندهم

لو ما ربطوني كان لعنت جدفه وصفقته تصفيق لايحمد عقباه (ياكثر الاشياء الي كنتي بتسوينها لو ماربطوك)

جلست ادعي عليه من قلب والظاهر يحسبني اغني له هداده رقاده وعلطول خنت رقبته وشخر

شوي واشوف ظل ريشه تتحرك وراي ياربيييييييييييييييه متى بيخلص هالعذااااااااااااااب

مادريت الا بقطعة جلد تكمم فمي واحس بشي يلمس يديني ويفك الحبل ويمصعني مع يدي

ويركض بي ويركض ويركض وانا خبله اركض معه مدري منهو بس قلبي ارتحلووووووو

اهم شي يخلصني من هالمجانين الي بيزوجوني غصب بابي اعرس باااااابي

وصلنا لخيام كثيره وانا ادعي ما يكونون مفاصيخ وعوووووك حامت كبدي من ذوليك

وعععععي

شفت ناس اكابريه لابسين جلود ومحترمين ومعلقين ريش على روسهم باطوال مختلفه

فكرت هممممم

ااااااهااااا اكيد هنود حمر يعني هنود ريشهم وخدودهم حمرررررر

ذيك الساعه تركني المنقذ والتفت وشفت وجهه وفوقه ريشه طوييييله طول برج العنود

(طاااااخ خبطت عالكيبورد يوم تذكرت شكله

) ههههه اجل اول ما شفتيه وش سويتي احم احم

امممممم نرجع لبؤبؤ السولوفه عرفت انه كان يراقبني قبل مايمسكوني بعدين انقذني منهم

واحتفالا بي رقصو السامبا على طبولهم الي كنها براميل واستنزلت معهم

باللي احفظه

ماطلع الفجر الا وهم حافظين سي ياهل اللللدا سي ياااااااااهل اللللدااااااااااااا

ويانا الهوا ياااااااااااااانا يانا من زنجااااااااااااااااار

(اخبر زنجبار عند خط الاستواء يعني حولنا)

اللللللللللللللللللللللللللللللللللللللللللله اكبررررررررررررررررررررررررررر

الا والردح وقف وواحد منهم حاط يديه ورا اذنيه ويكبر ماشالله مسلمييييييييين زين على زين

ينفع ناخذ منهم وياخذون منا (شناويه عليه) لا لا اكيد حمولتن طيبه

مافيها كلام

ونصلي ونجتمع على الضو نشرب حليب بالزنجبيل ونفصفص قريض محموس

واطالعهم واحد واحد واتمقل تمقل

ابي اطلع اشباه اي هندي شفته في حياتي

وجربت اناديهم كومار راجو اميتاب باتشان راهول شيروخان ريثيك خخخخخخخخخ محد حولي

واقول اتشا نهي بروبلم مشكل هي جلدي وصرمه تصرم عدوكم

محد يفهم شقول

ويناظروني ويضحكون علي ولا احد فيهم نطق بحرف اللهم الا في الصلاة وهم يقرون

حطوني في خيمه لحالي ومن الصبح صاح الديك وقمت وطليت من السحاب اتطقس

واشوفهم مجتمعين عند الرماد طلعت وجلست معهم وافطرت عيش وملح

اشرو لي لخيمه كبيييييييييييييره كنها خيمة سيرك خيمتي عندها كنها غطا قدر

ويدزوني لمها يبوني ادخل واخبط بيدي على جدار الخيمه (مؤدبه

) وينفتح السحاب

ويدخلوني على ملكتهم عرفتها من تاجها وجلست عندها وانا خايفه

وتقرب لمي وانا ابعد وادنق وهي تمسك راسي وترفعه لحووووول شتبي ذي

وتجي تطل في وجهي وتتمقل وتشاهق بالصياح وتبطبط دموعها اربع اربع

قلت خلااااااااص رحت في خبر ان وخواتها مذبوحه مذبوحه

الله لايعوق بشر

وتسحبني توريني صوره معلقه على جدار الخيمه لبزر في مهده مدري ولد ولا بنت

قلت لاتكون هالمخبله مشبهه علي اني خاطفه بزرها ولا ذابحته شر ذبحه

واحلف لها باغلظ الايمان وابل مصبعي بسعابيلي

وارسم سيفين على رقبتي

واقسم لها برب الكعبه والمصحف انه بوب انا الي خطفت ابتهال الله يردها لاهلها

وهي تاشر علي وتخمني وتكمل صياحها وتخرق اذني وترشح ملابسي دموع

وتحبحب شعري كنه الحجر الاسود

وتمسحه لين تلبد وصار مدهن ماقصرت ليصته

وتجلسني على كرسي جنب كرسيها وتلبسني تاج من قشور الموز

وحلق عناقيد عنب معصوره

وشحاطه من جلد الثعابين المسلوخ

وتفرك خدودي بقشر رمان وتلطخ براطمي بتوت بري وتليص جفوني ببخارى

وتهديني ببغا شعره اشقر مموج وذيله فسفوري وعيونه مثل اللولي (تتلامع)

وانا الي احب يديها وخدودها وجبهتها وراسها وتاجها وفصوصه ياكبرها كبراااااه

ماصدقت انها مهيب قايله لعشماوي يذبحني ويقص رقبتي بسيف ولا مقصله

واكتشفت ان ذاك المنقذ ولدها يعني اميييير ويصير اخوي حسااااافه (اقول انفلقي هناك بعد انتي صدقتي انك بنتها)

يوم جا وقت الغدا ويودوني يخت في البحر الا فندق خمس موزات

(معلقينها على بوابة الجسر)

ويعطوني قائمه اطلب منها واناظرها والقاها مكتوبة بلغتهم

مقابل كل طبخه صوره والله لغتهم خيطي بيطي قلت هي خاربه خاربه بطلب كللللللللش

واحوس بيدي على القائمه يعني كلبوها ابيها مافهم وراح يجيب لي كومة قوائم

والقى قائمة طلبات بالعربي وناااااسه بس ماكفتني جوعااااااااااانه حدي

قمت وطلبت من البوفيه المفتوح مالذ وطاب من اللي حط على الطاولات الى الباب

وسفيته وعلي بالعافيه

وجلست احلي ببودنغ ولاسيه وافكر بعممممق (لاتغرقين بس)

هل اعترف للملكه واقنعها اني بوب بنتها عشان مايصير المنقذ اخوي

ولا اسكت عشان يجلس راسي في محله واصير اميره والله اختيار صعب

ويوم قررت اخييييييرا فجاه سمعت صوت صراخ وقنابل ومدافع ورصاص وبنادق

يالاااااااااااهوي طبو علينا القراصنة واستولو عالسفينة انا بعتها بترااااااب وطبيت في البحر

وانحشت للغابه ادور اهلي ابي اموت معهم بابي اموت لحالي اهيييييي اهييييييء

ولحقوني في الغابه قلت وجع يا اسرائيلوه ماكفاك فلسطين ولبنان بعد حاسدتنا على غابتنا

راقبتهم يسوون لهم معسكر حربي مثل كامب ديفيد وجلست افتكر واتفاكر وافكر مع نفسي

ابي خطه تكتوكيه عشان اخلص عليهم

واتذكر اني سارقه بيبسي وفش فاش من البوفيه

تحسبا للظروف الواحد ماصار يامن على عمره يمكن احد يخطفه من ناس خاطفينه

تشششش فتحت قارورة البيبسي وقبيته عن بكرة ابيه حتى آخر قطره وشفطت الفش فاش

بعدين كسرت القزازه وميلتها بزاويه حاده عالقرطاسه اووووووووووبس لحظه لحظه

مابعد لحست القرطاسه

بقي فيها فتافيت تثررررثررررثروووووومممم لحست الباقي

ورجعت اميل القزاز عليها وتشب ضووووو بس ريحتها ياهي ريحه شيييينه دماااااار كوح كوح

شفتهم داخلين في خيامهم ونايمين وحارسهم سكران رايح في خرايطها ونايم

قطعت سوستات سحابات الخيام وصمغتها بسائل من شجرة الصمغ كنت مجمعته

وربطت الحارس وشبيت في برميل الكحول بعد ما غسلت خيامهم بشوي منه

وياناااااااااااااااار شبي

من سكاااااااااااااااارهم حطبكي

ويولع المعسكر ويخبطون الخيام يبون يطلعون ماطاعت السحابات تنفرط هق هق

ويحترقون القراصنه وتشم ريحة شوي بس خياااااااااااااااااس وربي خيااااااااااااااس

الحين عرفت ليه سموها الغابه الاستوائيه علشان كل شي فيها يصير مستوي

حتى انا استويت من الحر وش ذا فرن ولا ميكرويف ولا ساونا ولا جاكوزي

وماهي الا لحظات واشوف اهلي ومدير رحلتنا جايين يتراكضون على وجيهم

يشوفون وش هالنار الي سودت السما بغيوم ودخان (توالناس كان ابطيتو زياده

)

ويتلقفوني بالاحضان وانا اللي احلف اننا نرجع للرياض اليوم واحلف اشفر الـmbc

واحلف اقاطع أي غابة استوائية واحلف مااكل موز من كثر ماانغثيت منه قرده حشا

واحلف معد شوف طرزان ولا ماوكلي ولا روبن هود ولا حتى ليلو وستيتش

وفيما انا احلف سالوني وش هالسفينه واتذكر منقذي

اللي مااعرف وش اسمه

وانا اللي اهون واحلف اننا مانرجع للرياض اليوم (ياكثر حلفاااااااانها)

علمتهم وش السالفه بكلمه وحده (بعدين خخخخخخخ) ورجعنا للسفينه العائمه

وحررنا الرهائن المربطين ورديت لمنقذي الدين وخذيت ببغائي معي

ونزلنا للغابه

بعد كل هالاهوال ماكان ودي ارجع لاهلي (اللي يشوفها هالحين مايشوفها اول ماضاعت)

بصراحه استانست على طبول ذوليك هع هع (اييييييه هيييين معروفه وشوله تبين ترجعين لهم)

وابوي يجرني الا ومنقذي يسحبني بعيد عنه

حسباله مغصوبه اروح مع الفاذر حقي

ابتلشت شلون افهمه وش اسوي وش اسوي ماابي هالاثنين يتذابحون بالذات هالاثنين

احمممممم بكره الضحى ورانا مسيار لقبيلتهم احمحم توهقت ولقطت راس ابوي وحبيته

وجريت ابوي وراي

عشان يفهم ان ماعندي مانع اروح معه (عليك اسلووووووب

)

من بكره الفجر مشيت في الغابه مع ابوي عشان يمدينا نوصل الضحى

بس ما لقينا مكانهم ضيعت الطريق حاولت اضيع نفسي بس مافيه فايده

عيت نفسي تضيع

كلما رحت لمكان رجعت للمخيم (يوم بغيت اضيع ماضعت)

وانتهت رحلتنا للاسف مع اننا مددناها على امل نتلاقى لو صدفه لو نظره لو جبر خاطر

لكن بعد اشهر وسنين من المحاوله اليائسه ضفينا عفشنا ورجعت للرياض وقلبي هناك

اك اك

هكذا يقول صديقي الببغان ابو سن ذهبي وذيل رمادي زي القوشطه

(الشي اللي ماعرفته بطلة القصة اللي هي انا ان فردة الشراب الثانيه عند المنقذ!!!!!!!

)

المهميشن من الرحله

اول حاقه: اذا بتشتري جوال اشتر جوال فضائي مايعتمد عالابراج وبطاريته شمسيه

عشان الامطار

خخخخخخخخخخ

ثاني شي: مكياج الطبيعه مافيه مثله ماطاع يروح لا بصابون ولا منظفات

ثالث ملاحظه: أي واحد يحب يجرب مطاعم ختيييييره لا ينسى مطعم بوم الاستواء

رابع ملحوظه: البيبسي والفشفاش سلاح فتاك يحفظ بعيدا عن ايدي الاطفال

خامس جيم: لا عمرك تنام في خيمه لها سحاب وسوسته

سادس هام: اسرائيل مصيرها بتحترق ان شالله

سابع مهم: لا تحلف واجد بعدين تكفر وتطعم عن كل حلفان

ثامن آخر: ببغا في اليد ولا ظل حيطه

وانتهينا
طن طط طن

النـــهاية THE END

معا الى الابد ~ توقذر فور ايفر

~ د.رهف وريوف دوت كم ~

الشـاكي · 19-07-2006, 02:56 PM

السلام عليكم

حياك الله اختي العزيزة مذهلة

وما قصرتي بوضعك استكر المشاركة

موضوع جميل وروعة

وسوف تعرض لأعضاء اللجنة

لتقيم الموضوع

وبتوفيق ان شاءالله

ودمتي لنا بخير

رومنصي مشاكص · 19-07-2006, 02:56 PM

يعطيك العافيه على الموضوع الجميل

بأنتظار تقييم اللجنة

بالتوفيق يارب

تقبلي تحياتي

ιέмσήā · 19-07-2006, 03:49 PM

الهـللللللللي يابعد حيي

اليوم عندنا عرس <<<<<< طيب لا تقطعين خخخخخخ

لي عوده مع الحَب والفصفص ولا يهون الكراث والخس خخخخخ

تحياتي التس والقير عادي

ايه صح

سويت نيو لوك خخخخخ

الاقشر · 19-07-2006, 04:07 PM

<-------<< هذا المستخدم قرا القصه واعجبته

][المـؤيـد الهـادي][ · 19-07-2006, 04:31 PM

أختي مذهله ..

مذهلة بكل المقاييس ..

يسلموووو على هيك صرقعة ..

تونست معك ..

بس لا عااااااااد تتأثري بـ الاعلانات ..
فاهمة ..

بس تعالي ليش ما عزمتيني معكم على الرحلة ..

مني لو أني في لجنة المسابقة أرشح موضوعك الفائز بلا منازع ..

تحيتي

كتكوتة الرياض · 19-07-2006, 09:05 PM

مذهله

احولّيت

و انطرمــت

من موزوعكـ

جونااااااااااااااااااااااان

روووعــــــــــــــــــــــــــــــــــة

يسمنوا يالغلا

بالتوفيق ان شاء اللـه

سي يو

كتكت

صدى الكلمة · 20-07-2006, 05:17 PM

الله عليك اختي مذهلة

وانتِ مذهلة في موضوعك وصرقعتك

وانتظري التقييم

وبالتوفيق للجميع

وتقبلي تحياتي

عريس المجالس · 20-07-2006, 05:54 PM

ههههههههههههههههههههههههههههههههه

الله يرجك رجاْ مبرحاْ

وش هالرعب

حشا ماراح ينام الليلة هع

بالتوفيق خيتوووووووووو

تقبلي تحياتي

اخوك عريس

دمعة المقهور · 20-07-2006, 06:34 PM

اجل اخت ماوكلي الجديدة

هههههه

ياهوووووووووه

ازحف تنحف مع مذهلة

بالتوفيق أختي

!!..رحلة تخييم مذهله في احدى الغابات الاستوائية..!!

رومنصي ابن فرناس

شطحات

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق