أوليييييييي (تابع للمسابقة)

(صورة وجه مختزين بعض الشيء اول مره يدخل مسابقة مصرقعه )

بعد شرب القرايات والمسكنات والمهدئات وبعض من المخدرات << ينعن يومها بايعتها << انا سامعتن نواف بعيوني ذي يقول ممنوع تدخين ما قال شي عن الشنق الثاني

طيب نبدا بسم الله ..

مرة من المرر ,, اشتغل مخي بالغلط ,, وفكرت اسافر في اجازة عيد الاضحى,,
واسحب على العالم واتعيد براا ,,

وبعد ما خذت الشاور السنوي.. وظبطت كشتي بالمحش ,,

ورتبت شنطتي ,,

اتجهت للمطار عشان اسافر لـ...............



لـ...........



لـ.......




نواف تعال افقع وجهك

بالله وش المقدمه الخياس ؟؟؟
قسم لو اني بيكاسوا الصرقعه ما عرفت اكتب من ذا المقدمه
من اللي حاطها علمني
هااه تكلم من ؟؟؟؟؟؟؟؟؟

خلاص لا تبسي علينا مليتنا الله يخس العدو
قم انثر خشمك بالحمام









( صورة نواف يدور حذف الموضوع )



لا خلاص قسم توبه ما عاد اعودها
( صورة بزر يلحس اصبعه ويسوي صليب على رقبته )

تذكرونها الحركة ذي ؟؟

والله اول ما كنت اصدق احد الا اذا سواها
وانا طبعاً منيب مثل باقي البزران اصدق اي شي كنت عليله حتى امي احس انهاا كذابه اللين يحلفون<< عقوق الله يخارجنا
يعني اذا ما سواها صار مسيلمة الكذاب حتى بنات خالتي ما أصدقهم
ذاك اليوم جت بنت خالتي اسمها أمل وتحلف وتقسم انها شافت فار(ن) في المستودع


المهم وتجي امل مسفحه مع السيب
وكان برد ذيك الايام وخالتي الله يهديها مصره انها تكشخ بنياتها
وملبستهم فساتين مكشكشه لونها زهري يجيب الحموضه وهي نص كم هممممممممممن تحت ملبستهم ست آالاف ام رقبه << لغير الناطقين بالاكسبرسيه ام رقبة= high neck
والله اللي يشوفها يقول وش الارهابية لابسه حزام ناسف

ومن زود الاناقه لابسين شرابات اللي مكشكشه من فوق قال ايش قال الموضه هذيك الايام شراريب اللي من فوق دانتيل حمد لله والشكر

عاد مع التسفيحه اللي مع ذاك السيب واختنا في الله ما تعترف بجزم ولا بأحذيه ولا حتى بزنوبه وتصفط على ضروسها مسيكينه
اشوا انها كانت مهدمه وما بعد طلعن الجداد ولا كان راحت فيها
بس ولو تناثرت بضع قطرات من الدم على قيشاني خوالي مع كمن نقيطه عالفستان

والبنت فمها يسرب دمان ومصره تعلمني السالفه : والله العظيم قسمن قسمن اني شفت شي يتحرك تحت الفليزر والله عظيم في صلاة امي وابوي قسمن بالله تعالي حتى شوفي بنفسس << انتم تخيلوها تحتسي وفمها يتغرغر بالدم واتسبدييييييييييييه ومع ذالك حماس تيربوا ماشاء الله


انا بكل بروووود : سذابه !

أمل : اقول لس قسسسسسسسم بالله والله العظيم صح انا ما أكذب عليس ابد الأبدين تذكرين يوم حصيصه بنت الجيران قالت لي اتسذبي على سوير وقوليها قلمس ابو ريشه ضاع وانا باخذه صح انا قلت لا لا انا ما اكذب على سوير لا لا وعييت عليها صح صح صح !! << ترا كل ذا الحتسي بنفس واحد

انا : سذابه !


أمل صار لونها بنفسجي منقط أخضر : والله العظيم ( وتسوي حركة الصليب على رقبتها )

انا عاد يوم شفتها سوت الحركه صدقتها :يووووووووووووووووه قولي قسم ياربيييييييه طيب وش نسوي نعلم ابوي عبد العزيز ولا نروح نذبحه ولا وش نسوي ؟؟

أمل : خن نذبحه ( صورة وجه فيه بوادر إجرام )

انا : يالله خن !!

أمل : طيب وش نذبحه فيه ؟؟

انا : نجيب شوزن خالي ناصر ؟( صورة وجه كله إجرام في إجرام )

أمل تصمخني على وجهي مع رفسه في ضلوعي وقبصتن في فخذي : انهبلتي انتي انهبلتي يعني على بالس ما تدرين ان خالس يعد الرصاص عد !! << ولا يعني ما عندهم مانع لو ما كان حريص عالرصاص

(صورة وحده وبنت خالتها يلعبون حبشه بالشوازن )

انا : طيب وش نسوي ؟؟

أمل : خلاص ابسرق انا رصاص من عند خالي محمد وانتي جيبي شوزن خالي ناصر

انا ( وجه من الحماس نسى يصك اثمه): طااااااااااه << طاااه = طاااايب = طيب

ونستعد ونسوي المخطط ونتربص لفار قريح في المستودع
وما امداع المسيكين يوتز برويسه علينا الا انا طاخخخخخخخخخخخخخخته مرتن وحده في مخه
وتناثر دمانه وطشر علينا مخه الله يقرفه وانا اللي على بالي ابتحاشى الطشار واسوي حركة ذا مايتركس واثري منيب لم سالفة واصفط على ظهري

همن تدربيت من السرير وقمت على صوت امي الحنون

قوممممممممممممممي قاااااااامه تقم العدو

<< بالله كيف الحلم الفاشل قسم ماعاد ودك اني انوم ابد

امي : قسمن بالله ياسوير يا عجوز السكن ان عديت الى عشرة ومالقيتس قايمة و مغسلة ومفرشتن سنونتس ومتوضية و مصلية ولا بستن هدومتس وهيلاهوبتس وشراريبتس وملمعتن كنادرتس ولابستها وكادتن كشتس ومزبرقتها بالشرايط ونازله ومسويتن قهوه وشاهي لأروح واخليكم !!!!!!!!


<< يقطع ابو الذل ياشيخه

انا : هاه ؟ << تخبرون الاستيعاب متأخر حبتين عندي << ايه صح حبتين ( وجه كاتم الضحكه )

امي( وهي تتهاوش مع معلاق ناشب في الدولاب يقال انها تبي تصكني به) : الشرهه ميب عليكم يا عيال ابليس الشرهه علي انا اللي على بالي ابمشيكم للشرقيه في ذا العيد انتم كفو تتعيدون في الشرقيه ؟؟
وانا اناظر احتري نهاية المشاحنه بين امي والمعلاق
والمعلاق نااااااشب ومتأزر معي يقول: ميب حاله ذي كل شوي صامخ لي في جبهة واحدن منكم منيب والله ياربي وش ذا الحياة ليتني مفك صلصة اصرف لي
وتناظر امي الا فيه معلاق مقرود على الارض وتلقطة .. وعيكو ما تشوف الا النوووور

ثم بدأ العد العكسي
10

9

8

7

..
وانا اقمز مخترشه ابروح للشرقية من قدي هذيك الايام << هاك الحين كان عمري 12 ولكن عقلي كان توه مدقر في سن ال8 سنوات او أقل..
ومجهزتن شنطتي من ثلات اسابيع كني شغاله متجهزه للنحشه
ولو تشوفون وش اني حاطه فيها ..
اشي صابون على كم علبة شامبوو حجم عائلي على معجون اسنان كرست على سيجنال << يالتسذوب على ايامتس ما كان فيه كرست
وكم قوطي تونه <<< قسم عزبة خكاريا موب شنطة..
واللي يشوف أدوات النظافه يقول ذي تزالق من زود النظافه ما دروا ان السبوح مره بالاسبوع وفيها منه بعد وصيا وطقاق ودراما الله يكافيكم الشر << بالله كيف شكلي وانا اقول دراما ؟؟
اعيدها ثانيه ؟؟
دراااااااامااااا

ويجي اخوي الهقوه كان عمره 15 تقريبا ويزحجل الشنطه المزعومه الى الدرج وهمن يصمخ بها من فوق الدرج الى أخره << يقال ان السبب في ذلك ان عبيد ما يبي يشيل شناط البنات الزوهريه لانها تخدش ذكورته << بعد انتي يا سوير الا غصب تراني بنت ؟؟

وانا اقول : وجع وضربه بشويش عليها ما تشوف لزقة قابل للكسر << يقولون اني سارقتن ذا اللزقة من كرتون جابه ابوي من 4 اسنين من مصر جايبين فيه ثرياات الحمد لله والشكر على بالهم اهلي ان بيتهم سرااااايا عيلة المجدويه بيحطون فيه ثريااات << عيلة المجدوية مسلسل مصري يحكي قصة تعسب رب الاسرة المصري الطحطوح راعي الدراهم من نوعية اللي عندهم سفرجي سوداني ولزمن لزمن يصير اسمه عصمان ولا المخرج ما يكمل المسلسل .. كانت تتابعه امي منيره الله يشفي رجلها قولوا آمين ..

عاد عبيد هو سمع قابلة ولا ما سمع ويمسك الشنطه ويشيلها ويمحط بها ويشيلها ويمحط بها ويشيلها ويمحط بها ..
ومع كل شيله وشيله انا اشيلها بصوتي من الزعاق والصياح
اللين طلعت اممي على حسي وما صدقت خبر..
وتشيييييلني وتمحط بي وتشيلني وتمحط بي هو حاط حيله بالشنطه وامي حاطه حيلها فيني
اليييييييين تقطعت تسبيدتي من الصياح وفقد نعمة الحتسي وانطرمت ..
وبعد انتهاء الزوبعه الله لا يوريكم وش صار في الدرج ..
الشنطه تقطعت بئت تلتوميو مستين مليم حته!!!!
وانا رضوض وكسور وعلامات تقبيص في جميع ارجاء الجسد لو جفن عيني فيه اثر قبصه.. << ما ودك الكذاب يتمسكن يجيب العيد..
واناظر الا الدرج كله صوابين وشااامبوو مكبب على طول الدرج وعرضه والمعاجين تخفست فكنا ربي ان قواطي التونه ما جاها شي ولا كان علووووووم الحمد لله بس

واقوم كني سندريلا الامنها ضيعت كندرتها وقامت تدورها واحاول اجمع باقي شتات الشنطه..

وفي اثناء ذلك ..<< قسم اني اعرف اكتب شي صدقي

يطلع سي المحروس ابويا من غرفته وهو توه متسبح ومتنظف ورائحة الكلونيا تعجعجو منه تقل يبي يعاقبنا فيها الا غصب اشرقوا بها وهـ بس يازين النفاهه..

وما امداه ينزل الدرج برجلوه اليمين .. هووووووووب .... صفطه ثلاثية امامية خلفية جانبية ادت الى تمزق بعض الاربطه وتربط بعض الامزقة مع كسر خفيف في احد الضلوع ( اخر واحد على اليمين)..

وبدال ما نركب السيارة عشان نتعيد بالشرقيه ركبناها وطيران على اسعاف مستشفى ********<< مشفره للتنويه..
المهم اول ما دخلنا مستشفى الشميسي << هاااو؟ توها من شوي مشفره ولا؟
ويقابلنا هاك الدختر ...............
يا سلااااااااااام وش ذا الزين ؟؟؟ من وين ذا طالع ؟؟
تحلف انه طالع من قمقم علاء الدين << ينعن يوم الكلمة قمقم
قسم تحلفون انه يطفوا على الارض ما يمشي من الأوبهه والطعامه يختشي عليه << لاعاد تتفرج اين قلبي !!

ونجي نطلع من السياره وكلنا شايلين ابوي كل واحد فينا شايلت له حته.
اللي شايلن راس واللي يد واللي رجل .. انت وحظك وش طلع لك بالسحب
الحمد لله انا طلع لي اليد اليمنى ...
واشيله واروح ركض لدكتور نبيل <<< ما ودك القراوى يروحون شهر عسل للشام يخربونها فيذاك ويحسبون ولدهم بيغدي شامي ..
<< قازتن اسمه من البطاقة اللي عل الكوت على بعد هااك الاميال منه ( صورة وجه زرقاء اليمامة ) << ابلش ياولد منيبن تجيب صورتها ؟؟

وانا اركض اركض متجهه الى الدختر المزيون نبيل وانا اركض امر على ستالاف دكتور ..
دكتور خالد ودكتور علي ودكتور متحت ودكتور ماهاتير غاندي
بس لاااااااااا والف لا اااا بس دكتور نبيل هو اللي يعرف يزين ابوي ويصلحه ..

ويوم وصلته عاد وابدا اتميلح عنده : لأه لأه لأه لأه لأه الحئني يا دوكوتور ابويااااا ابوييااااااااا << تذكرت اصابع الزمن اييييييه الله يذكرك بالخير يا محمد حمزه براي لله مدري هو عايش ولا مات مير الله يرحمه في كلتا الحالتين
وامد له يد ابوي اللي كن شايلتها .. واناظر .. ادقق .. الا مغير تسم ابوي << تسم = كم
هاه وين ابوي .. والتفت الا تو العايلة الكريمه ما بعد تعدو الرشمبشن..

يووه وش الحالة مافيني روحه وجيه مرتن ثانيه واقعد اجرجر ابو كل ذا المسافه
وانا اللي اطيح غشيانه يعنني مريضه ابي اتعالج : لأه لأه لأه الحئني يا دوكتور حموووووووت واللهي قسمن ..
همن قلت عشان اظبط دور المريضه لازم اسوي غثيان واسوي روحي ابرجع ..
يوم شافني تسذا وتحوم تبده ويجيب غداه امس على احدى هالنيرسرات << نيرسرات = ممرضات
ويييييييع طلع الولد يااااي أوي وما يتحمل
صاروا طلاب سنة اولى طب جايبينهم رحلة للمستشفى والورع ما يستحمل المناظر ذي كشششششششش عليه مير مزدين فيهه أهله يوم سموه نبيل ..

وانا اللي اقوم وادور لأهلي ونروح لهاك الدختر اللي تحلف انه دارسن سنة الامتياز في يثرب

يترااااقل ويالله انه يحتسي ونفسه مقطع بس فيه الخير الحمد لله ..
صرف لأبوي مشد ظهر وكمن مرهم على كم مضاد وراحة خمست اسابيع ..
وطارت السفره مثل ما طار في الهواء شاشي وانتا ما تدراشي يا قدعععع..
وقضت اجازة العيد وحنا مغير نمرخ ابونا ونهمزه ...
وعاقبتني امي على سالفة الشامبووو انها منعتني اني اتسبح الا بتايد لمدة ستت اشهر قسم غدا جلدي حراشف موب جلد آدمي...



(صورة وجه مختزين بعض الشيء اول مره يدخل مسابقة مصرقعه ويقول ترا قضت مشاركتي )



بس اول خن نشوف قوانيكم حنا طبقناهن ولا لا؟؟

اقتباس شروط المساابقه : ( يا ويلكم )

يووووه يمه يمه ياويلنا يووووووه حجر لنا نواف يووووووه وش نسوي يا عيلان ..؟؟

اقتباس عـدم التعرض لأمور الشريعه الاسلاميه على صبيل المزح باي شكل من الاشكال ...

هاه ؟؟؟؟
طيب ذي حركة الصليب وش اسوي بها؟؟

اقتباس المواضيع المنقوله ممنوعه منعاً باتـاً

كتبت المشاركة وحررتها سوير بنت نوير الحصي نور الله دربها واسعدها في يوم الخميس 1 من ذو الحجة من الساعه 2:57 ظهريتاً الى الساعة 3:56 عصريتاً ..

اقتباس اللي يتميلح .. بينطق ..(من الاخير يعني ..)

اشوا ان دختر نبيل اوب مسجل فيذا

اقتباس ممنوع التدخين .. ولا حتى سيجارة وحدة .. وحط كل اللي في جيوبك جنب الكيبورد قبل لا تكتب ..

ايييه بعدي والله البطل .. مزدين فيهم هالشرمه الفاسده اللي يسمون انفسهم مدخنين ...

هاه شفتوووا انه ما قال شي عن ذاك وذاك بس الدخان ممنوع

اقتباس يجب على كل عضو مشارك كتابة ( تابع للمصابقه ) داخل الموضوع

طب مابي اكتبها بالصاد يجوز ؟؟ << ياحبتس للعناد

(تابع للمسسسسسسسسسسسابقة)


( تابع للمصابقه ) << عودت تهون طقتها الحسوفه تخاف ما يقبلون مشاركتها..


يالله عاد قولوا رايكم في مشاركتي ما ابي اجي من الاستراحه الا الموضوع ثلااااااااااثة صفحااات << تكتب لكم على عجل لانها بتروح الاستراحه و لابسه ترنغ عنابي تضامناً مع شعب البحرين الشقيق لما أصابهم في ستار اكديمي من شروق لبعض المواهب الفذه << تقول ادعوا لي افوز في دوري الاستراحه قسمن خالي ناصر يكسر ما يرحم