زوااااااااااج معيض ......قصه جديدة

Heart · #1

معيض از بااااااااااااااااااااااااااااااا ااك

عــــــــــدنــــــا لكم بقصه جديده بطوله محبوب الجماهير معيض

هذي القصه تتكلم عن الزواج والعادات الغريبه والتقاليد اللي للاسف الايام هذي صارت بالمركز الاول ونسو او تناسو الناس الدين وتعالميه السمحه

‍‍ وصار التقاليد هي الاهم ..والادهى من هذى هو نفوس الاهالي الشينه والتفكير السطحي !!!

لا اعم احد بالقصه لكن اخص فئه معينه بالمجتمع كلنا نشوفها ونقول متى تنتهي هذي الظاهره ؟؟

القصه طوووووووووووووووووووويــــــــله حيل ..يعني افصل واقرى

بـــــــــــــــــــــــــــــــ ــــدأنـــــــــــــــــــا

معيييييييييييييييضضضضضضض قم قام عليك جدار يخلعك من سريرك يالهيس الاربد

معيض يفتح عيونه بالموت ويناظر وهو يحسب انه الحرب قامت ولا زلزال صار ويلقى امه هي اللي تناديه ومجهزة الاسلحه الخفيفه ( مويه بارده) ومستعده لرمي الصواريخ من علو شاهق !!

معيض : خلاااااص يممممممه بقوووووم بقوووووم بس وخري المويه

ام معيض : وجججججع يوجعك يالدب وراك ما تقوم بسرعه لازم كل يوم اقومك كذه مالت عليك وعلى اللي يجيب عيال ويربيهم

معيض : طيب وراكم ما مشيتوها بوس ذاك اليوم ؟؟ يعني الا تسوها وتندبون حظكم وتطلعون الحره فيني ؟؟

ام معيض : وشووووووو وش تقوووول انت ؟؟

معيض : ولا شئ يمه اقول خلاص قمت وباروح اغسل واجيكم المجلس

معيض قام من الفراش وهو يتمتم بعبارات غامضه غير مفهومه مثل : خمس دقايق بس ...حلم بن يهود ...جينفر لوبز.. فستان احمر ..اه ويلااااااه ,,, معيض يكمل التمتمه وهو يغسل وراح المجلس وبدا يتقهوى مع ابوه وامه ويبدون برنامج الصباحي لليوم ..لانه اليوم هذا حافل لمعيض ..
هذا يوم اللي يروح يخطب فيه بنت جارهم ابو مجدل

ابو معيض : هاه يا ولدي جهزت نفسك وجبت ثيباك من المغسله وكويت الغتره وكل شئ ؟؟

معيض : ايه يبه كل شئ تمام وخلاص وموعدي معاه بعد صلاه المغرب انشاءالله ...بس يمه انتي اكيد شفتي البنت وحلوة هي ؟؟؟؟

ام معيض : ايه ووجع ..هذا اكبر همك بس يا الهيس اربد ؟؟

معيض : طيب وراه الشايب التنك ذا ما يوافق اني اروح اشوفها بنفسي ..منيب انا رايح اخطب وعلى سنه الله ورسوله ؟؟ وراه كذه مسوي فيها بنته جينفر لوبز على غفله خايف اشوفها ؟

ام معيض وابو معيض بنفس الوقت : منهي جنين الوزرة هذي يا الهيس ؟؟ ما تبطل مغازل انت ببنات الناس ؟؟؟؟ ما تبطل جرياتك مع بنات الحموله ؟؟ ما تبطل ...... الخ .....الخ ......الخ

معيض : .........

ابو وام معيض : هذا و وراك خطبه ......الخ .....الخ

معيض : .........

ابو وام معيض : وهذا انت تبي تفتح بيت .....الخ ....الخ

طبعا بعد المحاضره الطويله هذي معيض راح شرب دلتين قهوة علشان يصحصح ولا يجيب العيد قدام اهله وقام يسب ويلعن باليوم اللي حلم فيه بجينفر لوبز ..

على وقت الصلاه المغرب معيض لبس ملابسه وتعطر بدهن عود صارله سبع سنوات لدرجه انه طلع فيه طحالب خضرا ..بس المهم الريحه من قوتها ما صار معيض يعرف هي حلوة ولا شينه !!

ابو معيض : يلا يا ولدي بالتوفيق انشاءالله ..رح وقابل الرجال واجلس معاه وتكلم علوم رجال ولا تفشلنا مالت عليك اخبرك راعي جريات مالها داعي واتفق معاه على كل شئ علشان اجي معاك اذا اتفقتهم ونخلص الموضوع

معيض : ابشر يبه .

ام معيض وهي تصيح : الله يوفقك يا ولدي وانشاءالله افرح بعيالك ..

معيض : انشاءالله يمه

ابو معيض : معيض لا تنسى تلبس جزمتك يا لوح هههههههه طالع من البيت وانت حافي ؟؟ هههههههههه

معيض من كثر ماهو متوتر طلع ناسي يلبس الجزمه ....المهم يلبسها على عجل ويطلع يمشي لبيت ابو مجدل وهو يفكر وش يقول وكيف يتكلم وكيف يقنع اللوح هذا انه يشوف بنته وهو جالس يفكر الا شئ يصفق بوجه (طاااااااااااخ )
معيض من الصدمه وطبعا من الخرعه لما غترته طاحت على الارض قام يسب ويلعن باللي رمى الكوره الا يشوف انه مجدل يلعب كوره بالحاره حافي وقاعد يطالع فيه ويضحك

معيض طبعا ما يقدر يتكلم لانه الزفت هذا بيصير ابو نسب مستقبلا وقام يضحك له وهو داخله يسب ويلعن بس معيض جاته فكره وبسرعه نادى مجدع

معيض : مجدددددع ...حبيببببببي تعال يا شطوووووور ابيك بكلمه راس

مجدع : وجع شطور بوجهك يا الضب الاحول وش شايفني انا ؟؟؟ وش تبي شايفني ما افهم الحركات هذي ؟؟ مهب ناقص الا تقول تعال اوريك الديك اللي يغني فوق السطح ؟؟

معيض : هههههههههه الله يرجك ذكرتني بايام اول ..لا حبيبي بس بغيت اسئلك عندك صوره لاختك ؟؟

معيض ما امداه يقول الكلمه هذي الا حسب انه الحرب بدت والعراق بدت ترسل السكود على حارتهم واكتشف انه هذا حصى من الشارع مجدع يرميه فيه

معيض : وجع يا لوح تراني باخطب اختك يعني عادي اشوفها !!!!

مجدع : تشوفها على جثتي ما بقى الا تشوف محارمنا يا الخنفسانه المدعوسه

معيض لاحظ انه الموضوع هذا بيطول ولاهو مستعد انه يوقف ويشرح للزفت هذا السالفه لانه متأكد انه بيطلع تنك مثل ابوه وغير انه الحصى بدت تقرب بشكل خطير من وجهه ففضل الانسحاب من المعركه ويركض على بيت ابو مجدل قبل لا يتاخر وتصير سالفه ثانيه

معيض وصل لبيت ابو مجدل ودق الجرس وجلس يعدل الغتره على المنظره المعلقه على الباب وفتح له بزر صغير هو اخو مجدل ومعيض توهق ما يعرف وش اسمه ذا الورع !!

معيض : اممم هلا حبيبي وين الوالد ؟؟

الطفل المجهول الهويه : من يبيه ؟؟؟

معيض : قله معيض ولد بو معيض يبيه لو تكرمت ( على باله اخلاق مع اهل العروس )

الطفل المجهول الهويه : طيب كم تعطيني علشان اناديه ؟؟

معيض : ههههههه دمك خفيف مره ..يلا حبيبي رح نادي البابا بسرعه تراه منتظرني

الطفل المجهول الهويه وهو يناظر معيض نظره طويييييييله

وبعدها يعطيه بوكس

...طبعا بحكم انه طفل ومعيض اطول منه فمكان وصول البوكس هذا كان مكان جدا حساس ..معيض جاه البوكس هذا وركع من قوه الضربه وهو حاس انه وده يرجع معدته ووحدة من الكلى ودوخه كبيره وقام يتمتم

معيض : يبن الكل........

الا يطلع صوت من البيت ينادي ويقول من على الباب ؟؟؟؟؟

معيض بصوت مبحوح مرررره : اننننااا معييضض يبووو مجدلل

ابو مجدل : هلا هلا وراك تأخرت ووجع ؟؟؟؟؟ اقلط اقلط

معيض دخل المقلط وجلس مع بو مجدل وقام بو مجدل يقهويه قهوة بارده ومعيض لسه بطنه يعوره من البوكس المذكور سابقا ..وبو مجدل دخل بالموضوع على طول وقام يسئل معيض

بو مجدل : كم عمرك ؟

معيض : 29

بو مجدل : وين تشتغل ؟

معيض : ارامكو

بو مجدل : كم راتبك ؟

معيض : 8500

بو مجدل : عندك بيت او شقه ؟

معيض : لا بس اذا الله تمم انشاءالله ب....

بو مجدل يقاطعه : المهم 150000 عدا ونقدا وكاس ولا نقبل الشيكات ولا بطاقات الاعتماد مهر بنتي ساره

معيض وقتها كان يحس كانه بفلم عصابات وانه المحقق ماسكه بغرفه مظلمه ونور مليون شمعه على وجهه وهو يجاوب ولما سمع اخر جمله من بو مجدل نسى الام البوكس وبدت الام المحفظة

معيض : ميه وخمسين الف ؟؟؟؟

بو مجدل : عدا ونقدا ‍

معيض : طيب يا عمي مهب كانه واجد المهر وانت عارف اني موظف وما عندي اي تجاره تساندني وانه الحياه صعبه الايام هذي وانه ...

بو مجدل : عدا ونقدا واذا تبي اقساط اوكي بس مافي زواج ولا تدخل الا مكمل المبلغ وتدفع اللحين 30000 عربون وعند الملكه 30000 والباقي تكمله على راحتك بس المهم ما تاخذها الا وانت مكمل الباقي

‍‍‌‌‌‍‍

معيض : طيب وعسى طال عمرك تبي كفيل غارم وصورة من بطاقه الاحوال وصوره من اخر فاتوره تلفون او كهربا ؟؟

بو مجدل : وشو ؟؟

معيض : ابدا سلامتك طال عمرك ...بس يعني غير الكلام هذا مافي ؟؟؟ وهذا انا ولد جيرناكم ؟؟

بو مجدل : شف عاد ..اول شئ انت منت من جماعتنا ولا من نفس العائله ..ثانيا البنت درست وتخرجت واللحين تشتغل مدرسه وانا اخذ راتبها لانه من حقي خاصه بعد اللي صرفته عليها ...ثالثا اذا ما تبي الباب يوسع جمل

معيض : اها ...امممم طيب يا عم عطني بس شهر على ما ادبر لك الدفعه الاولي للسوبر اللي بتبيعه وانشاءالله خير

بو مجدل : هاه وش سوبره ؟؟

معيض : عفوا قصدي لسوير بنتك ..

بو مجدل : اهااا طيب على كذه اتفقنا والمره الجايه اللي بتجي تعال مع الوالد وجيب دراهمك وعلى بركه الله

بو مجدل قال الكلام هذا وقام معلن انتهاء الزياره بس معيض جلس ولا قام

بو مجدل : خير وش تبي بعد ؟؟؟ ترا ريال واحد ناقص منيب منزل لا تحاول

معيض : لا يعمي ..خلاص لا حول ولا قوه الا بالله بس بما اني خاطب بنتك سوير ودي لو اني اشوفها شوفه السنه

فجأه معيض ما يدري ليه في اللحظة هذي تذكر فلم رعب شافه من زمان لما البطل يتحول للوطواط لونه احمر

خاصه وانه بو مجدل فرد ذراعيه بالبشت اللي لابسه ووجه صار لونه احمر وهو يصرخ ويقول :

بو مجدل : وشوووووووووووو ؟؟؟؟ تشووووووووووف مييييييين ؟؟؟؟؟؟؟؟ اطلعععععع بررررررره ما عندنا بنات يكشفونننن على اغراااااب

معيض : يبو الشباب هدي اعصابك منيب غريب انا ...انا انشاءالله بصير زوجها و .......

بو مجدل : برررررره ووجع لما تدفع دراهمك تعااااال وشف زي ما تبي يالسمرمدي

معيض : يا اخ بات مان شوي شوي طيب وانت كذه شكلك بتطير مع البشت هذا خلاص خلاص باطلع

معيض يطلع من البيت ركض قبل لا يجي فنجال القهوة براسه والكوره من مجدل بعد ما رجع البيت وشاف معيض طالع فحاول يشوتها براسه مره ثانيه

معيض يوصل البيت وهو مقفلهههههه معاااااه مليووووووون ويدخل على المجلس وهو يقول :

معيض : يعني لو احلم كل يوم بجنيفر لوبز مهب ارخص لي من الشايب النحس هذا والمهر اللي يبيه ؟؟؟؟

وهو قاعد يتمتم الا ابوه كان منتظره بالمجلس وقاله : هاه بشر يا ولدي ؟؟

معيض : وش ابشرك فيه ييبه : شيخ النحس ذا يبي ميه وخمسين الف عدا ونقدا مهر ويبي ثلاثين اللحين وثلاثين عند الملكه والباقي ادفعه اقساط ...حشى باشري سياره ارخص لي ما صار زواج ذا !!!

ام معيض : يا ولدي اذا تبي ترا فيه بنت خالتك مها بنت وش زينها مؤدبه وحلوة وكل شئ اذا خلاص غيرت رايك من سوير بنت بو مجدل تنتظر حتى هي ترجع من فرنسا مع اهلها وتكون خلصت دراستها هناك مع اخوها ويكون زوج خالتك خلص عمله هناك ويرجع يستقر هنا ونخطبها لك ..

بو معيض : يا ولدي شف اذا انك صامل وخلاص تبي تستقر انا مستعد اللحين ادفع عنك الثلاثين الاولي والثانيه وانت خلك الايام هذي وفر من راتبك للباقي ....هاه وش قلت يا ولدي ؟؟؟؟

معيض : لا حول ولا قوة الا بالله ...شكله مافي غير ذا الحل

بعدها بشهر معيض وابوه يروحون لبو مجدل وابو معيض يعطي شيك مصدق من البنك بقيمه ثلاثين الف لبو مجدل

بو مجدل وهو يناظر الشيك : يا هلا والله يا هلا زراتنا البركه يا هلا .....القهوووووة يا ولد

بو معيض : هاه خلاص يبو مجدل اتفقنا على كل شئ انشاءالله ؟؟

بو مجدل وهو لسه يناظر الشيك بحنان غريب : ايه ايه كل شئ تمام التمام ..يا هلا والله يا هلا وغلا

معيض : هاه يا عم كذه رسمي تمت الخطبه اقدر اشوف سوير اللحين ؟؟

بو مجدل فجأه كانه واحد صحاه من حلم بكاس مويه تغلي وبعيون حمر وفرده البشت اياها :

وشوووووووو وشوووووووو تشوف بنتي ووجع يا اللي ما تستحي على وجهك ياللي فيك وما فيك يا ...الخ الخ الخ

معيض يناظر ابوه ويقوم من مكانه وهو ماسك كاس الشاهي وده يروح يصفقه براس بو مجدل بس ابو معيض يمسكه ويسحبه بقوة يجلسه ويقول له :

خلاص يا ولدي استح لا تفشلنا قدام الرجال ...خلاص كلها كم يوم وتملك عليها وتصير حرمتك وشفها لين ما تشبع و ..

بو مجدل يقاطع بو معيض : قصدك لين ما يكمل باقي الميه وخمسين الف عدا ونقدا

بو معيض وهو بدت تقفل الاخلاق معاه : لما يملك يبو مجدل ويجيب الشيك الثاني يشوف البنت يبو مجدل ولا نمشي اللحين والغي الشيك اللي بيدك

معيض وقتها انتفخ صدره من ابوه وقام يتبسم بعد ما شاف روعه بو مجدل على الشيك واخيرا وافق على الشوفه لما يجي الشيك الثاني ولما قام بو معيض يستأذنون قام لهم بو مجدل

بو مجدل : افا وين كذه بدون ما تتعشون ؟؟؟ الا تتعشون اول

معيض كان جوعان ولا يجيه نفس للاكل من كثر ما يبي يشوف سوير لما درى اخيرا بيشوفها انفتحت نفسه للاكل وقال : ما نكسر بخاطرك يبو مجدل وخلاص بس خلنى اكلم الوالده اقولها بنتعشى هنا .

بو مجدل : ايه كلمها وقلها انكم بتتعشون مع انه العشى مهب قد المقام وكله صحن فول صغير وثلاث ارباع تميس بر كان باقي من الصباح بس اقلطو ..اقلطو على ما اجيبه لكم العشا ونتعشى كلنا

بو معيض ومعيض بنفس الوقت : امممم لا خلاص الله يسلمك يبو مجدل نخليها وقت الملكه انتم تتعشون عندنا انشاءالله ..بس تذكرنا اللحين فيه موعد مهم لازم نروحله

بو مجدل : على راحتكم والله ما نبي نلزم عليكم دامكم مشغولين ويلا نشوفكم انشاءالله لما تزهبون باقي الدراهم ...اقصد وقت الملكه .

تمر الايام ومعيض وفر مبلغ حلو من راتبه ويقول لابوه : وش رايك نملك اللحين يا يبه وانا خلاص وفرت مبلغ زين وباكمل باقي الاقساط بعد الملكه ؟؟

بو معيض يسوي اتصالاته مع بو مجدل ويحدد وقت الملكه ويروح البنك علشان يصدق الشيك ويروحون بيت بو مجدل بعد ما جابو الشيخ وتتم الملكه بعد ما استلم بو مجدل الشيك ويقول يا هلا والله يا هلا وغلا والله فيكم

وبعد العشاء اللي طبعا كان ببيت معيض راح معيض لبو مجدل وحب على راسه وقاله : هاه يبو مجدل كل شئ تمام والامور ماشيه صح ؟؟

بو مجدل : ايه افا عليك يا ولدي لا ماشاءالله عليكم على التايم الاقساط وكل شئ ماشي صح

معيض : طيب يا عم اللحين دام سوير تعتبر زوجتي وحلالي ودي يعني لو تسمح وتكرمت وتفضلت وتنازلت انك تشرفني بشوفه ام عيال المستقبل انشاءالله واني اتكلم معها واعرفها على زوجها المصون اللي هو انا

بو مجدل : وشووووووووو ؟؟ تبي تشوف محارمنااااا ؟؟؟؟؟؟ تبي ...

معيض يقاطع بو مجدل ويقول : اقولك يبو الشباب لا يكثر عاد ترا الاتفاق تم بينك وبين الوالد ذاك اليوم اني اشوفها واحنا مشينا بالاتفاق والفلوس جاتك واللحين دورك ولا تبي تلغي الصفقه وناخذ دراهمنا ونمشي ؟؟

بو مجدل وهو يناظر معيض بحقد

اممممممممممممم خير انشاءالله مر علينا البيت بكره بعد العصر وخير انشاءالله

معيض يقوم وهو الفرحه مهيب كافيته ومن كثر مهب فرحان نام بدري ولا حتى حلم بجنفير لوبز الليله هذي من كثر ماهو متشوق يشوف زوجته شوفه السنه ...

معيض قام قبل لا امه تصحيه وقعد يدور بالغرفه وهو محتاس مهب عارف وش يلبس ولا وش يقول لساره لما يشوفها وكل شوي يلبس ثوبه وشماغه ويتعطر ويناظر الساعه ويلقى انه لسه باقي ساعتين على الصلاه ...وكل نص ساعه يسوي نفس الحركه الى ان جاء الوقت ويلبس ويطلع بسرعه لبيت بو مجدل والمره هذي بسيارته علشان لا يجيه الحصى اللي مجدل قاعد يحذفه عليه من بعيد ويدق الباب وهو مجهز 5 ريال رشوه للطفل المجهول الهوية علشان يمشيه بسرعه بدون اي حوادث او ضربات تؤدي الى فقدان الذاكره خاصه قدام سوير ..
بعد ما دفع الرشوة وجلس بالمقلط وبو مجدل جالس معاه يناظره بحقد وقرف ويقوله : اسمع ترا عندك 3 دقايق بس وانا باجلس ورا الباب وبتدخل عليك تسئلها عن اسمها وايش دراستها وانت تقول نفس الشئ وبعدين تضف وجهك ولا اشوفك الا بدايه كل شهر ميلادي مع دراهمك ‍‍...سمعت ولا لا ؟؟

معيض : ايه طيب اخلص علينا بس ودخلها بس

بو مجدل يقوم يطلع من المقلط ويسكر الباب وراه ومعيض جالس للمره الالف يفكر وش يقول لها وفتح الباب وتدخل ساره

معيض تنننننننننح وهو ينااااااظر وحلقه طااح من شكلها وهي داخله عليه وهي لابسه بلوزه ابيض واحمر على بنطلون اسود وشعرها تراكتها يطيح على وجهها وهي تناظر الارض ووجهها احمر من كثر مهيب مستحيه منه

ساره بصوت واطي مره : السلام عليكم

معيض : ....... حلق مفتوح

ساره : ........

معيض : ....... حلق مفتوح

ساره : .......

معيض : احم احممم وعليكم السلام يا هلا والله بالسوبر

ساره رفعت عينها ووجهها تغير

معيض : احممم حممم اقصد بالسوير ..هلا هلا وغلا والله بامدام المصون

ساره نزلت عينها مره ثانيه وهي مره مستحيييييييه ووجهها صار مثل لون البلوزه ابيض على احمر

معيض : سبحان الله اللي طلع وحدة زيك من ابو مخيس زي ابوكي والله انك جرح وموت يا سوير

ساره مهيب عارفه وشو تقول خاصه على مقطع الابو المخيس بس بالموت طلعت منها كلمه : شكرا ..

معيض : والله اني باكون اسعد واحد معك يا سوير ..يام عمري انتي ..يا ام عيالي وزوجتي الحلوة

ساره وهي قامت تكشر شوي : احم احم

معيض لسه مدرعم وخااااااق بقووووة : يا روحي بس والله على الزواج وايام الزواج لو انه ابوكي الزفت هذا كان خلاني اشوفك يومه الخطبه كان بعت الموتر والبيت وولد عمي هديه مع البلاي ستيشن علشان ادفع مهرك كله واخذك بالحضن وابوسك بوسه وحدة بس على طول بدل الانتظار هذا كله

ساره كشرت وقامت تحرك رجولها بعصبيه

معيض : اخخخخ بس اشوى اننا تزوجنا وخلاص وكله على شرع الله ورسوله علشان اقدر اناظرك واعبي عيني من جمالك هذا يا بعد قلبي وعمري انتي ومن جد ما عمري شفت حلاه زي حلاكي هذا وكان ودي لو يكمل الحلا هذا بشئ واحد يخليني اتاكد اني صاحي ومنيب راقد واحلم كالعاده مع انه دلائل الحلم المعتاده مهيب موجوده اللحين ...بس من جد حاس اني احلم وودي لو اتاكد ..

ساره وهي لسه ساكته رفعت عينها وهي نص مكشره ونص فضوليه تبي تعرف ..ناظرت بمعيض شوي نظره فضول انه يكمل كلامه علشان تعرف وشلون يبي يتأكد

معيض شاف النظره من عيونها وخقها اكثر مع العيون والاهداب والرموش وقال : ودي لو اتأكد اني بعلم ومنيب بحلم ودامك زوجتي وحلالي ودي لو بوسه وحدة على خدي الاجرب هذا علشان احس انه فيه شئ ناعم لمسه علشان اعرف بس انه صحيح اني صاحي ...

معيض فجأة قام من الخرعه لما سمع صفارات انذار الحرب حقت العراق وبعدها حس بشئ بارد على مقفاه وسمع صوت الباب وهو يتسكر ...معيض وقف مهب مستوعب اي شئ ولا وش صار بس شاف الباب ينتفح مره ثانيه ودخل بو مجدل بسرعه ومعاه عياله يمسكونه ويهدونه ومعيض مسكه مجدل وقام يكافخ فيه بالكوره حقته لين ما طرده من البيت ولما قام من الشارع بعد سدحه مجدل له هناك استوعب انه الصفارات الحرب اللي سمعها كان صوت ساره تصرخ والشئ البارد على مقفاه كان كاس المويه اللي كان على الطواله بعد ما رمته عليه وهي طالعه من المقلط وسكرت الباب !!!

معيض قام مشى للبيت وهو الى الان مهب فاهم وش السالفه ولا ليه صار اللي صار ومهب مستوعب اي شئ ابدا بس لما دخل البيت لقى امه قاعد تكلم تلفون وتقول :

ام معيض : ولدى ما تربى وانا اتفاااهم معاه السمرمدي ذا قليل الخاتمه يلا هذا هو جاء واتفاهم معاه يا ام مجدل ...|

سكرت امه السماعه وراحت عنده وقالت له :
يا اللي ما تستحي يا راعي الفضايح و النكايح يا تبن ....الخ الخ الخ

معيض : وش السالفه يمه وش صار ؟؟؟

ام معيض: هذي ام مجدل تقول انك حاولت تسوي شئ مع البنت يا جعلك الماحي

معيض : وش اسوي يا يمه جلست اكلمها وهي زوجتي وش اسوي معها يعني ؟؟؟ مهيب زوجتي هذي ولا وشو ؟؟؟؟؟

طبعا معيض وهو يتكلم كان خلاص قفلت معاه وعصب وقام يصارخ وامه لما فهمت القصه سكتت ولا قالت شئ وابوه دخل على الصراخ وسمع السالفه كلها من ام معيض وقال لولده :

اسمع يا ولدي خش انت اللحين هدي اعصابك وغسل نفسك من تراب الشارع مالت عليك ما ادري شلون دخلت عليهم كذه وبعدين تعال نتكلم واذا تبي خلاص طلقها دام هذي تصرفات اهلها وتصرفات البنت من اول مره تشوفك فيها .

معيض راح غرفته وغسل وغير ثيابه وقام يفكر حتى روق وهدت اعصابه وفكر دام كذه البنت سوت معاه فمعنى كذه انه البنت هذي مره مالها باي شئ بالدنيا ولسه بريئه مره ولا تعرف اي شئ بالدنيا واكتشف انه تعلق فيها اكثر ولما تذكر اللي صار قام يضحك وهو يفكر والله جننتني البنت هذي ..

طلع معيض لاهله وقال لهم انه لسه صامل والشئ هذا خلاه يتعلق فيها اكثر وانه لسه يبي يتزوجها بس بنفس الوقت هو كان عارف انه شيخ النحس ابوها مهب معديها له بس ما همه الشئ هذا وقرر شئ بباله فراح غرفته وكتب رساله لساره يقول فيها :

ساره ما ادري وش ابوكي قالك ولا وش اهلك مربينك عليه ..لكن اللي اعرفه اني حبيتك ومع انه جاني زكام من المويه اللي حضره سموك تكرمتي بتسبيحي فيها بس لسه احبك وعفويتك هذي خلتني اتعلق فيكي اكثر وكل اللي اطلبه منك هو فرصه وحدة بس اتكلم فيها معك على راحتي وعلشان لا احرجك مع الرساله هذي شريحه جوال باحطها في علبه القلاده اللي بتعطيكي اياها الوالده هديه مني وكل اللي اتمناه منك بس تعطيني الفرصه هذي باني اشرح لك نفسي واعبر عن نفسي بطريقه افضل وباعتبار انك زوجتي اللحين وعلى شرع الله ورسوله ما ارضي انك تتزوجي واحد ما تعرفيه ولا تعرفي اخلاقه او شئ عنه ..ابيكي تعرفي كل شئ عني ووقتها تقولي لي اذا تبين نكمل بالزواج او لا ..وانا من ناحيتي ابي اكمل واني اكون معك وشاريكي ...وانا باعرف موافقتك انك تكلميني اذا ما رجعت العلبه مع الوالده ..واذا احتفظتي فيها باعرف انك ركبتي الشريحه عندك وانتظري اتصال مني على الساعه 1 بالليل بعد ما ينام البات مان بو بشت اللي عندكم ...مع حبي لك زوجك معيض

بعد ما ختم الرساله وحط الشريحه في العلبه راح لامه وقالها :

يا يمه هذي هديه ابيكي توصليها لسوير مع الرساله هذي وابيكي تعطينها الرساله من غير ما احد ينتبه لك وقولي لها بينك وبينها انها تقراها بغرفتها باسرع وقت وتتعلل بالقومه انها تروح تلبس القلاده بغرفتها ...تكفين يا يمه

ام معيض : يا ولدي ما ادري ليه حاسه انه وراك جريه بس ما اقدر اقول اي شئ لانها زوجتك على سنه الله ورسوله وخلاص من عيوني باروح لهم بعد المغرب

معيض : يسلموووووووووووووووووووووووووووو ووووووووو والله يا احلى ام ويمطر معيض امه ببوسات على يدها

ام معيض تروح لبيت بو مجدل وهو يجلس ينتظرها وكل شوي يقول بترجع بالعلبه ولا بدون وكل شوي يناظر الساعه ويناظر الشارع يتاكد اذا هي جت ولا لسه ..حتى اخيرا جت امه ولمح انه يدها فاضيه وقتها قام يناقز ويرقص من الفرحه

بالحوش ....
وينتظر حتى الساعه 1 بالليل ويدق على الجوال ويلقاه يرن ويجلس ينتظر حتى احد يرد حتى يفصل الخط
ويرجع يتصل مره ثانيه بعد شوي حتى يفصل الخط
معيض قفلت معاه ويدق مره ثانيه وبعد خامس دقه ينفتح الخط بس ما احد يرد ويسمع صوت ساره تتنفس على السماعه

معيض : الحمدالله انك رديتي ترا خفت انه صار شئ

ساره : ......

معيض : ههههههه شكلك مستحيه مره مني ...ههههه طيب اسمعي خلك على راحتك وانا باتكلم معك وانتي بس اسمعي كلامي ولما تبين تتكلمي تكلمي على راحتك منيب غاصبك على اي شئ ..%%
وبدا معيض يتكلم معها ويسولف عن نفسه وعن عمله وعن جمالها حتى بدا يقول لها عن اللي سوته فيه يوم ما جاء شافها وهو يضحك وهو يتكلم ولما قال لها عن رميته بالشارع الا يسمع صوت ضحكتها وهي تضحك بقوووووة

ساره : هههههههههههههههههههههههههههههههه هههههههههههههههههههههههههههههههه هههههههههههههههههههههههههههههههه هههههههههههههههههههههههههههههههه هههههههههههههههههههه

معيض : اخيرااااااااااا تكلمتي يعني ؟؟؟؟ ههههههههه يعني كان عاجبك شكلي كذه وانا منسدح بالشارع ومجدل اخوكي الزفت يحذف كورته علي ؟؟ ههههههه

ساره بصوت واطي ومره مستحيه

: وش اسوي طيب اهلي قالو لي انتبهي يسوي اي شئ لك ولا يقرب منك وابوي قالي انك واحد من الشباب الصايع والتافه ... بس لما سمعت كلامك حسيت بصدق كلامك بس لما قلت البوسه خفت مره وطلعت ولما امك جت وعطتي الرساله وقريتها حسيت بصدق مشاعرك لي وانك فعلا معتبرني زوجه لك ووقتها وافقت اتكلم معك مع اني ما اعرف وش اقول ولا اي شئ ومستغربه كيف قلت لك الجمله الطويله هذي كلها ههههههه

معيض : هههههههههههههههههههههههههههههههه هههههههههههههههههههههههههههههههه ههه عادي عيوني يا بعد قلبي انتي .....امممم اجل ابوكي قال كذه عني خير خير انشاءالله وشو قال بعد ؟؟

ساره : ......

معيض : امممممم دامك ساكته اجل اكيد قال شئ ...سوير ...حبي ..بعد قلبي وروحي انتي ..انتي عارفه اني احبك وابيكي تكوني معي طول حياتي وانتي عارفه انه خلاص دفعت القسط القبل الاخير لمهرك وباقي الاخير اعطيه لابوكي مع الزواج وانك انتي الان زوجتي دامك كلمتني فمعنى هذا انك موافقه انك تصيري زوجتي ...ولازم اعرف وش قال ابوكي لانه تراه يتكلم على زوجك ..ولا اظن انك ترضي احد يتكلم علي زوجك ..ولا لا ؟؟

ساره : اممممممممم انا بصراحه سمعته يقول لامي انه بيوريك شغلك بالعرس وبيرد لك الذله اللي مسكتها عليه يوم ما ملكت وطلبت انك تقابلني ويوم ما جيت عندي البيت وانا هربت من الغرفه ...ما فهمت وش قال بالضبط بس اللي فهمته من كلامه انه بيخليك تدفع فلوس يوم العرس زياده على المهر وبس ما فهمت غير هذا الكلام لانه امي على طول قالت له لا وقامت تتهاوش معاه ولا حبيت انه احد من اخواني يشوفني اتسمع من الباب ...

معيض : هممممممممممممممم يجيب الله اللي فيه الخير انشاءالله وانشاءالله ربي يقويني على ابوكي البات مان هذا مع بشته هههههههه

ساره : ههههههههه

وجلس معيض وساره يتكلمون الى الفجر وصار كل يوم يكلمها بالليل ساعه ولا ساعتين وصارت مره تحبه ساره وتموت فيه معيض نفس الشئ الى بقى على العرس شهرين قالت ساره لمعيض وهي تكلمه

ساره : معيض ترا ابوي الايام هذي كل ما تجي سيره العرس يغني يا ليل ما اطولك وحاسه انه ناوي علي شئ بس ما اعرف وشو هوو وتراني مره خايفه انه يسوي شئ يفرقنا عن بعض .... (وقامت تصيح )

معيض : لا حول مع ابوكي ذا اللي مهيب جايبها على خير اسمعي عيوني ...ترا انا من قلب حاس انه ابوكي ذا بيسوي مصيبه ولا ادري وشهي هي بس انا عندي حل بس تراه قوي مره وبصراحه ما ادري اذا بتوافقي ولا لا عليه ...

ساره : وشو هو طيب ؟؟ تراني مستعده اسوي اي شئ بس ما تتركني ولا انه ابوي يحاول يفرق بيني وبين زوجي

معيض : .....امممممم .....اححممممم .....اممممم عاد وشلون اقولك بس ؟؟؟ امممم ساره انتي زوجتي وحلالي وعلى سنه الله ورسوله ...صح ولا لا ؟؟

ساره : ايه اكيد يا بعد قلبي انت

معيض : طيب اسمعي بكره ابي احجز لنا غرفه بالمرديان ولما تطلعين معي بكره انت واخوكي هذا اليي ياخذ رشاوي مني والى الان ما عرفت اسمه علشان نكمل مشتريات اثاث الشقه باعطيه فلوس واوديه الملاهي وااواعد ولد عمي يجلس معاه وانا وانتي نطلع الفندق ونجلس بالغرفه وناخذ راحتنا ووووو .... امممم

ساره : خيررررر ووجع وش تبي انت ؟؟؟؟؟؟؟ خير انشااءلله وشو لحالنااااا هذي بغرفه انا وانت ؟؟؟؟؟؟

معيض : اسمعي يا بنت الحلال وشو تراكي زوجتي منيب طالع مع وحدة غريبه وبعدين تنكري انك ودك تجلسي معي لحالنا وكل واحد يعبي عينه من الثاني ....يعني يهون عليكي تصرفات ابوكي هذي اللي ما يخلينا نطلع لحالنا وانا زوجك وابي اتكلم معك وتتكلمي معي واحنا ماخذين راحتنا واللحين تقولي لي ابوكي ذا ناوي يسوي شئ بالعرس !!!؟؟

ساره وهي تصيح : معيض خايفه مره وانا احبك ولا ابي اتركك بس مره خايفه ولا ما ابي يصير شئ يفرقنا ولا ابي ابوي يوقف بوجه سعادتنا وايه نفسي لو اجلس معك واتكلم معك وكل شئ براحتنا بس خايفه مره ...

معيض : اسمعي يا بنت الحلال فكري بالموضوع وانا بكره بامرك وولد عمي بيكون منتظرنا هناك واذا قررتي قولي لي علشان اودي المرتشي اخوكي هذا ونطلع واذا ما تبين نكمل مشاورنا ونروح السوق ...بس ترا منيب مسؤول عن اي شئ يسويه ابوكي اذا انه مخطط لاي شئ يوم العرس ..

ساره اوكي باي ابي افكر اللحين وبكره نشوف ...وقفلت السماعه وهي تصيح

معيض ثاني يوم اتفق مع ولد عمه على الموضوع انه يرمي المرتشي المجهول الاسم بالملاهي ويكون معاه وانه ينتظره عند الملاهي عشان يجلس معاه ويروح هو مع ساره للغرفه اذا وافقت ...بعد صلاه العشا مر معيض على بيت ساره وركبت معاه ورا والمرتشي جلس قدام وقام يتعبث كالعاده بالرادو والدرج ومعيض يناظره وقافله معاه ووده يرميه مع الشباك وهو على الخط السريع ...معيض يفكر الافكار هذي وفجأة صحى من افكاره على صوت ساره وهي تقول لاخوها :

حبيبي ودك تروح الملاهي وتلعب هناك بالالعاب ؟؟

معيض دعس بريك باقوى ما عنده وهو يسمع الكلام ولف وجه بسرعه لورا وناظر ساره وهو منصدم

ومهب مصدق كلامها وعلى طول دعس بنزين باقوى ما عنده وقامت السياره تفحط مكانها وبعدين انطلقت باسرع ما عندها لجهة الملاهي بدون ما ينتظر حتى رد المرتشي اذا يبي ولا لا ...ولما وصل بريك باقوي ما عنده عند البوابه وكان ولد عمه واقف هناك يغازل وحدة تبيع شراخيات ...معيض فتح باب السياره للمرتشي ورماه من السياره ورمي 500 ريال عليه ونادي ولد عمه وقاله

معيض : شليخان استلم العهده وهذي 500 ادخل فيها ولعبه ذا الورع حتى يرقد وانا باجي بعد 3 ساعات واذا قدرت انك ترميه من فوق المراجيح بدون ما ينعرف انك انت اللي راميه لك 500 ثانيه لك ...يلا باااي

معيض يدعس على البنزين باقوى ما عنده ويطلع من الملاهي بعرض يكملها بخمسه وتنطيل على الكورنيش وساره فاقعه ضحك بقوة ورا وهي تصرخ : بطنيييييييييي هههههههههههههههههه شوي شوي يا مجنوننننننننن بطنيييييي ههههههههههههههههههههههههههههه

معيض وقف السياره ببريك وسحبه جلنط قدام المريديان وعلى طول راح اخذ المفتاح الغرفه وطلع وهو ساره للغرفه ودخلو للغرفه ومعيض مفهي مهب عارف وش يقول ولا وش يسوي وساره مره مستحيه

معيض يسكر نور الغرفه ....

ساره تضحك ....

معيض يقول لها ودك تشوفي الديك اللي يغني فوق السطح

ساره تضحك : ههههههه لا انت قلت لي بتعرفني على التمساح الاخضر

صوت ضحك بالغرفه ...

... مقطوع من الرقابه ...

وجع وش تبون ؟؟؟ واحد مع زوجته ....صحيح ملاقيف !!

بعد 3 ساعات معيض كان واقف قدام الملاهي مع ساره وكل واحد شاق البسمه للجبهة

وطلع المرتشي من الملاهي لحاله وركب بالسياره وقال تراني رميت ولد عمك من فوق المراجيح لانه حاول يسرق الفلوس ...

معيض ضحك وهو يقول : المهم انك انبسطت يا حبيبي ههههههه

ساره من ورا : هههههههههه

تمر الايام ومعيض يدفع القسط الاخير وتجي ليله العرس ومعيض يروح العرس من العصر ويجلس بالصاله وهو مهب مصدق انه بيعرس اخيرا من ساره ومعاه اخوياه الفاضيين جو بدري علشان يلعبون بلوت الوداعيه وهم يغنون له : بدنا نتجوز على العيد ...وبدنا نعمر بيت جديد

واللي جالسين على راس معيض يغثونه باسئله بايخه مثل :

هاه وش بتسوي الليله ؟؟

نقدر نجي معك بالزفه ؟؟

تقدر ترمي ارقامنا على البنات اللي بيرقصون الليله ؟؟

معيض يسمع كل شئ ولاهو حولهم ابدا وهو منتظر بس متى يبدى العرس الى ان جاء قبل صلاه العشاء يجي ابوه واعمامه و بو مجدل ومجدل والطفل المرتشي وكم واحد من اقاربهم وبو مجدل على طول بكل وقاحه يروح لمعيض ويقوله

بو مجدل : على البركه يا ولدي الا تعرف تغني يا ليل ما اطولك ؟؟

معيض : الله يبارك فيك و هاه ؟؟ وش اغني ؟؟

بو مجدل : يا ليل ما اطولك هههههههههههه

معيض : وليه اغنيها انشاءالله ؟؟؟

بو مجدل : اسمع تعال ابيك شوي بره الصاله وانا افهمك

معيض طلع بره مع شيخ الزفت والنحس وعلى طول بو مجدل قاله :

اسمع يا السمرمدي ...تحسب انك ذليتني يوم ما غصبتني علشان تشوف ساره بعد ما ملكت ؟؟ اللحين جاء وقت اني اردها لك ...يا تجيب عشرين الف اللحين ولا بنتي مهيب طالعه من البيت وعرس مهب صاير الليله وخلك انت توهق بالتكاليف ومرني بعد اسبوع خذها ...هااه وش قلت ؟؟؟

معيض مهب مصدق اللي سمعه ابدا ويمسك بو مجدل ويطيح فيه طق ويلعن ابو الطيب اللي فيه وينادي ربعه من داخل الصاله

معيض : الفززززززززززززعه يا شباااااااااااب

اخويا

معيض كلهم على طول تركوا الورق والبلوت وقاموا على طول يطقون بو مجدل مع معيض وهم يقولون لمعيض وهم يطقونه

ذا المخيس مهب ابو اهلك يا معيض ؟؟؟

وهم يطقونه الا ابوه وعيال عمه جو وفكو بينهم بالموت ومعيض مسكوه اخوياه قبل لا يذبح بو مجدل والمرتشي متعلق من رجوله يعضعض فيها بس معيض مهب حاس ابدا فيه وقتها وكان بس يبي يمسك بو مجدل ويذبحه ...
وبو مجدل قام يصرخ ويقول :

والله مافي زواج الا تدفع 50000 اللحين ولا اخلي ليلتك ذي مهيب معديه وافشلك قدام كل الناس

وابو معيض يحاول يتفاهم مع بو مجدل وعيال عمه مع اخويا معيض ماسكين معيض ليفلت منهم ويخنق بو مجدل بالبشت تجي سياره بسرعه توقف قدام الصاله وتنزل حرمه كبيره لابسه عبايتها وهي تصرخ :
بو مجدددددددددددددددددددددددددددددد دددل

بو مجدل يتفلت من بو معيض وعيال عمه ويروح يشوف الحرمه وتطلع ام مجدل ويقول لها : هاااااه وش تبين لا يكون جبتي البنت بس ..ترا لو جبتيها تراك طالق ...

ام مجدل : كل تبن بس والحق على المصيبه اللي صارت ..

بو مجدل : وش صاااااااااااااااار ؟؟؟؟؟؟؟؟؟؟ تكلمي يا عجوز النحس

ام مجدل : بنتك ...بنتك سااااره حاااااامل

بو مجدل : هااااااااااه وشووووووووووو مييييييين ؟؟؟؟؟؟؟؟ كيييف ؟؟؟؟؟؟؟؟؟

بو مجدل فجأة يتذكر شئ ويلف وجه لمعيض ويلقى معيض فكوه اخوياه ويناظر فيه وهو مبتسم ويقول للكل

معيض : خلاص يا شباب بو مجدل قرر يلغي الزواج ولا رضى انه بنته تجي الا لما ادفع خمسين الف فوق الميه وخمسين اللي دفعتهم وانا بصراحه فكرت بالموضوع ولا اقدر ادفع وبصراحه اكثر كمان احس اني لسه صغير على الزواج .... وش لي بالزواج والمسؤوليه ...خلها بعد سنيتن ولا ثلاث وعلى العموم يبو مجدل خلاص انت اللي فزت وانشاءالله الاسبوع الجاي ارسل لك ورقه طلاق بنتك ساره ...

بو مجدل : لالالالالالالالالا يا ولدي وش دعوى ليه تطلق وشو انك صغير ومنت قد المسؤليه ..بالعكس رجال والنعم فيك ويشرفنا القرب منك واللحين البنت تروح الكوفير وتجي وتعرس وتروح تاخذها لبيتكم يا ولدي ...

معيض : لالالا انا خلاص قررت اصلا ما عندي فلوس حتى اجيب عشاء بعد ما دفعت المهر هذا كله واللحين فكرت فيها وحسبتها صح لقيت اني ما اقدر اتحمل الزواج وتكاليف الحياه خاصه وانها منتظره مولود ...يعني صعبه بالنسبه لي خاصه على راتبي وغلاء المعيشه الايام هذي ...يعني صعبه سوري وهارد لك ..يلا يا شباب شطبنا بس خلنا نطلع الاستراحه نلعب بلوت

بو مجدل : لالالالالالا يا ولدي وش دعوى لا تخلي الفلوس وهم الغلا الاسعار يخليك ترمي زوجتك وولدك كذه

معيض : خلاص مهيب مشكله منيب مطلقها بس خلها عندك اللحين ونأجل الزواج كذه سنيتن ولا اربع ولا اقولك الى ان احس اني اقدر على المسؤوليه ..يعني كذه كمان قول سبع سنين ولا تسعه والله ما ادري على حسب الاوضاع الاقتصاديه والسياسيه ..

بو مجدل : لا يا ولدي وش دعوي اسمع ترا المهم اللي دفعته هذا هو اكتبلك فيه شيك خذه حلال عليك وعلى اهلك واستعين فيها على حياتك يا ولدي ..

معيض : سوري اونلي كاش عدا ونقدا

بو مجدل : يا ولدي هذي شيك باسمي وباوقع عليه واذا ما طلع فيه رصيد اشتك علي وسوي اللي تبيه بس تكفى يرحم لي والديك لا تفضحنا قدام الناس

معيض : اممممم سوري انكل بس انت كنت طالب كمان خمسين الف زياده على المهر وتعرف انت تربيه المولود صعبه وتكاليف اكله وعلاجه صعبه ويعني بالموت ميتين الف تغطي كل شئ ....

بو مجدل وهو يصيح : خلااااص يا ولدي خذ هذي ميتين وخمسين الف شيك مني بس يرحم والديك اعرس الليله وفكنا ما نبي فضايح على اخر العمر ....

معيض : اممممممممم هممممممممم متين وخمسين الف همممممممم يلا موافق علشان بس لا احد يقول اني استغليت الوضع او اي شئ من الكلام البايخ هذا ..خلاص انا موافق اعرس الليله على ساره

بو مجدل يوقع على الشيك ويغمى عليه ويطيح على الارض وام مجدل على طول تركب السياره ترجع للبيت وتلبس بنتها فستان العرس ويرجعون بسرعه و بو مجدل لسه مرمي بره مغمي عليه وينزف العريس معيض على العروس ساره وهي مدودخة وكل شوي تروح ترجع من اثار الحمل وكل ما ترجع للصاله تجلس تضحك بقوة مع معيض

وهو يوريها الشيك بالفلوس والمعازيم يناظرون العروس والعريس وكل واحد يتحمد ربه على العرس المجانين ذا اللي العروس كل شوي تروح الحمام والعريس يوريها ورقه ويضحكون عليها وبو العروس مغمى عليه بره وجالس معاه الطفل المرتشي يحاول يزور توقيع ابوه علشان يشري حلاو بقر من البقاله القريبه .......

THE END

انتهت القصه وعاش معيض وساره بسلام وحب و وؤام بقيه اعمارهم وجابو دسته عيال وبنات وكل مره يتذكرون شجع وطمع الاب وسطحيه تفكيره واعتراض بالطريقه هذي على زواج اثنين يحبون بعض والتقيد بافكار عفى عليها الزمن انه شوفه السنه ما تصير الا بعد الملكه مع انها مشروعه بوقت الخطبه وانه حتى بعد الملكه بالموت الواحد يقدر يشوف اهله او يتكلم معها ويعرفون بعض وبالاخير اذا صار طلاق يقولون ليه كثر الطلاق عندنا مع اننا مجتمع اسلامي ؟؟؟ يمكن لانه اصلا فيه ناس تنك هنا مهيب معترفه بشرع الله وسنه رسوله وهم سبب تعاسه واحزان اولادهم واحفادهم من بعدهم !!!!

اتمني عجبتكم القصه واسفين على طول القصه الرهيب ..بس اتمنى انه وصل هدفها

ومعيض سوف يعود قريب بقصه جديده انشاءالله

ابو مهند · 24-07-2004, 11:33 AM

قصه .. رائعه .. وتميز يسجل باسمك .. اخوي ( هارت )

يعطيك العافيه وبانتظار المزيد ..

Heart · 24-07-2004, 09:15 PM

الله يعافيك اخوي

والقادم احسن انشاءالله بس بعد اكتمال الردود .. مع استفسار بسيط .. بعض القصص مهيب فكاهيه بالدرجه الاولى هل احطها هنا ولا بقسم ثاني ؟

ابو مهند · 25-07-2004, 10:22 AM

الغالي هارت .. تعتمد على نوعية القصه .. اذا كانت القصه فكاهيه فهذا مكانها

واذا كانت القصه هادفه .. اتوقع والاكيد مكانها .. في مجلس الشعر والخواطر والقصه القصيره..

.. ولك خالص تحيه..

ابو مهنــد

مواضيع ذات صلة
الموضوع	الكاتب	المجلس	المشاركات	المشاركة الأخيرة
فرص جديدة للاستثمار في أسواق مجلس التعاون	الروسونيري	المجلس العام	1	21-01-2007 09:58 AM

زوااااااااااج معيض ......قصه جديدة

قصه معيض ...قصه كل شاب سعودي

شقة اهاااات والمجهول

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق