لاتصرع فـ فيصك أمانه00 (( تابع لحملة بلا حوادث ))

يعطيك ألف عافية أخوي رومنصي

فكرة رائعة جدا

هذا اللي تعودناه منك << يريش بالمراقب

أبأذكر الحادث اللي تعرضت له يوم كنت (بزير)


الماكـــــــــــسيما MAXIMA



كنت في الصف الاول ثانوي مزعج أهلي اشتروا لي سيارة... أبي ماكسيما << واالله يا اني غثيث .....

كنت أهدد أهلي وأقول لهم ... والله ما أروح بوكرة للمدرسة اللين تشترون لي ماكسيما <<< طلعت لعبة مو سيارة

كنت وقتها لو تقول لي تبي بي ام والا ماكسيما قلت لا أبي ماكسيما <<< علي مخ

أبوي يقول لي وأنا أبوك أذا خلصت من الثانوي أبأشتري لك ان شاء الله .... وش تبغى بالسيارة اللحين مدرستك والحمد لله قريبة خطوتين وأنت فيها

أذا قال أبوي كيذا أروح لامي << نقطة ضعف أبوي .... وأزعجها أبي ماكسيما ...... قسم بالله اذا ما شريتوا لي سيارة لاغيب اسبوع عن المدرسة <<< غب وأحد ما سك

كنت أروح لأخوي الصغير << اخر العنقود (الدلوع) ..... وأقول له رح قل لابوي يشري ماكسيما عشان أوديك للي تبي <<< ايه هين

المهم ... نتيجة للضغوط الكبيرة اللي مارستها على أبوي الله يطول بعمره شراء لي الماكسيما <<< فلة وناسة

جاء العيد ورحنا في أجازة العيدة كالعادة الى الديرة ( شمال غرب الرياض )<<< تكفى يا باريس .... طبعا قال لي أبوي : ملك لا تأخذ سيارتك <<< خايف من العين ........ قلت له : لا ياشيخ لازم أخذها عشان مقاضي العيد<<< وأنا أقول في نفسي وشو له شاري السيارة الا عشان أبز بها قدام عيال عمي وعيال خالاتي وعيال أخوالي

رحت بالماكسيما للديرة وهناك استقبلوني عيال الديرة بالحفاوة << اركد يا الملك الصدزي

طبعا من أول ما أقوم من النوم اللين أرجع أنوم وأنا فرفرة بهالسيارة << لو معك بانوراما وش بتسوي

كانت ليلة العيد ليلة مأساوية بالنسبة لي ..... طلعت أنا وولد خالتي كالعادة ندور بسيارتي .... وهو كل دقيقة يقول : تكفى عطني دورة يا ملك ........ عاد أنا أبأذله شوي <<< الله من النذالة .... كنت أقول له : أحسن هماني أقول لك قل لابوك يشتري لك سيارة بس أنت رخمة <<< قسم بالله اني حقير

وبينما كنا نتمشى بالسيارة قررنا الذهاب مع احد الطرق الزراعية << أموت عالفصحى ...... الساعة كانت الثانية ليلا ....

شغلت المسجل على احدى الأغاني اللي تريش بالواحد .... وسرعة السيارة كانت في ازدياد الى أن وصلت الى 180 <<< اخر شيء كنت أشوفه قبل الحادث

وأذا بأمامي منعطف .... دخلت على المنعطف وأنا أمشي 180 .... لاحظت أن السيارة بدأت بالانحراف ... وما قدرت أسيطر على السيارة .... كنت أسمع ولد خالتي يقول لي : ملك انتبه ... لا تقرب الفرامل ... ردها نمرة <<< متأثر بالتفحيط

زحفت السيارة الى خارج مسارها وانقلبت تقريبا أربع قلبات ... وما ردنا الا شبك مزرعة

طبعا أنا فقدت الوعي على طول حتى القلبات ما أتذكرها <<< ياي دلوع ..... أما ولد خالتي فقد استطاع الخروج من السيارة والمشي وبعدها طرررررررررررراخ على وجهه

النتيجة كانت : كسور متفرقة في الرجل وفي القدم وبعض القزاز اللي في وجهي << طلع وجهي خريطة من القزاز

ولد خالتي ما جاه شيء ولله الحمد <<< قطو أبو سبع أرواح ... بسم الله عليه

السيارة كلفتني قصدي كلفت أبوي 30 ألف ريال

طبعا بعدها ما قدرت أسوق لمدة 6 أشهر ... كنت كل ما ركبت سيارة أقعد أنتفض << يستنزل الاخ

أبوي و أمي وأهلي ما خليتهم يتهنون بالعيد ذيك السنة << قايل لكم أني حقير

ما يستفاد :

• من أكبر الاخطاء أنك تعطي ولدك سيارة وهو توهــ بزر << مثل حالتي
  
• أذا ما فكرت في نفسك أثناء تهورك فكر في الناس اللي ينتظرونك
  
• ليست المفخرة بالسرعة والتهور الفخر كل الفخر بالتروي و الحذر << هذي متعوب عليها
  
• أذا كنت في طريق أول مرة تجيء معه ... فلا تسرع لانك باختصار لا تعرف ماذا سيكون أمامك
  
• مهما كانت براعتك في القيادة .... فلا تقول بأني أستطيع السيطرة على السيارة عند السرعات العالية

طانكيو رومنصي

والله لا يورينا ما نكره <<< دعوة أبوي