الداب والجن والمسبعهـ

سلخير ... لقرائنا مساءا

صلخير ... لقرائنا صباحا

نظرا لاقتراب الاجازة الصيفية ( العطلة الطويلة) وذهاب العديد لاماكن مجهولة أول مرة يروحون لها ..... يعني الواحد يروح لمكان ما يدري وش قصة هالمكان ... يمكن يصير هالمكان مسكون بالجن أو فيهـ قبيلة من الجن وأنت اللهــ يعافيك تطامر في هالمكان وترجم حصا وتكبكب من هالسوائل الحارة ( لا أحد يروح فكرهـ لبعيد تراني أقصد الشاهي والقهوة وأنت ماشي) ويمكن تبغى دورة المياهـ ( عاد الجن بسم اللهـ علينا يقدرون الاماكن هذي ويعتبرونها فندق 5 نجوم يعني الجني اللي في الحمامات هذا جني كاش ) ويا شين اذا صاروا معكم بزران وأنتم ماسكين خط وكل دقيقتن ناتق بزر ويقول : وقف فيني ؟؟؟ وأنت ما ودك توقف ومالن من هالخط وفي نفس الوقت ما ودك هالبزر يخربها في سيارتك في الاخير ما لك الا انك توقف .

قلت أبأسرد لكم هالسالفة اللي صارت لي أنا وخويي ( فهد ) في اجازة الصيف الاخيرة .... وتراها صدز بس غيرت السيناريو وبالتالي صارت ما هيب صدز



الساعة الرابعة عصرا في الديرة :
بيب ... بيب <<< هذي رنة جوالي ومخصصها لخويي فهد وأنتم تذكرون أفلام الكرتون اللي فيها ذاك الثعلب وذيك النعامة اللي كل دقيقيتن شاطفة هالنعامة وتقول بيب بيب وما تشوف الا الغبرة وراها ( طبعا هالنغمة مخصصها لخويي فهد لانهـ مطفوق) ...
توني قايمن من النوم ورديت عليهـ : هلا فهد ..... فهد: هلا ملك أقول تخاويني لمزرعة أبو عبداللهـ ( أبوعبداللهـ هذا خوينا ) تراهـ مزعجني يقول مر ملك وتعال أنت وياهـ .... ملك : طيب خلاص تعال ... فهد: خلاص عشر دقايق وأنا عند بيتكم سلام ... ملك : سلامين .

خمس دقايق والاخ يضرب بواري عند البيت ( قايل لكم مطفوق) وأنا اللي أطلع لهـ ومشينا لمزرعة ابوعبداللهـ ( مزرعة أبوعبداللهـ تبعد 40 كيلو تقريبا من الديرة ) وصلنا المزرعة وجلسنا مع أبوعبداللهـ وتقهوينا وقمنا نسولف ....

أبو عبداللهـ : تصدقون يا عيال اني ماشي على رجليني من هنا الى الديرة .
أنا : أقول أبو عبداللهـ لاقينا يا أبو الشباب لا تقعد تسذب علينا
أبو عبداللهـ : واللهـ العظيم اني ماشي على رجليني وكان أغلب ممشاي في الليل
فهد: أبو عبداللهـ يعني لأننا في مزرعتك لازم تفقش علينا
أبوعبداللهـ : يا حبيبي تدري انك تقدر توصل للديرة مع البر وتقل المسافة الى 10 كيلو.
أنا : ايهـ قلنا كيذا ما غير 10 كيلو شويهـ
أبوعبداللهـ : يا شيخ أتحداك تروح أنت وياهـ
فهد: واذا رحنا كم لنا
أبوعبداللهـ : كل واحد لهـ 5 الاف ريال
أنا قلت في نفسي يا ولد أنت طالب وطفران والجامعة لها سبعة شهور ما صرفت مكافأتنا( التحية كل التحية لجامعة الملك سعود) و5 الاف تفك أزمة
أنا : خلاص فهد يا اللهـ قم مشينا رجليهـ
فهد: قدام يلعن أبو بوش اللي قتل صدام

وفعلا قررنا ان حنا نروح أنا وفهد على رجلينا للديرة بس شرط علينا أبوعبداللهـ شرط وقال لازم تمشون اذا اذن المغرب ( اللهـ من النذالة يبينا نمشي في الليل ) ... وقال لنا : ترى اذا جاكم شيء ما لي دخل فيكم واذا سئلوني أهلكم عنكم ابأقول ما أدري عنهم وترى الطريق مليان شعبان وأودية فيها قبايل جن وفيهـ بعد ما تتعدون الضلع ( الجبل) مسبعة( مسبعة = مكان مليء بالسباع << لغير الناطقين باللغة النجدية) ..

أنا بصراحة بدأ الخوف يدخل قلبي بعد كلامهـ وبغيت أهون بس قلت عيب الرجال متحديك .. وش يقولون العربان عنك <<< قلبها مسلسل بدوي .... فهد نفس حكايتي كان خايف

أذن المغرب ... اتكلنا على اللهـ ومشينا للديرة على رجلينا وفهد ترك موترهـ في مزرعة أبوعبداللهـ ..
في البداية كانت أمورنا عال العال وكان فيهـ شوية نور يعني تو الظلام ما دخل ..... استمرينا بالمشي الى أن حل الظلام بالكامل ( الليلة ذيك كانت ليلة 27 يعني ما فيهـ أي أثر لنور القمر) ....

أنا : وش رأيك يا فهد نرجع مالها داعي يقولون ماتوا في البر بعدين بتتعفن جثثنا اللين يلقونا
فهد: أقول خلك رجال وش هالكلام ... اسكت بس لا أحد يسمعك ( أشوا انهـ كان خايفن أكثر مني )

فجاءة حسينا بشيء يمشي ورانا .... وفهد يناظرني وودهـ يتكلم بس كان ساكت

التفت وراي وأشوف دابة ( حيهـ) سوداء أطول من برج المملكة وأقول لفهد :بدينا بحركات الاستهبال فهد ناظر وراك ... التفت فهد وقال: هلا بالاتي

فهد : أقول اركد ولا تسوي لها شيء تراها مأمورة يعني اذا هي تبينا واللهـ ما يردها شيء
أنا : خلاص خلنا نكمل مشينا ولا تلتفت لها و أذا هي قرصتك تراني أبأنحاش وما علي منك ( أمحق خوي )
فهد : عاد أنا اللي أبأوقف لك اذا قرصتك ( ما اردا من زيد الا مزيد )

كملنا مشينا وهي ورانا ( مستقعدة بس كان بينا وبينها مسافة ) ..... شوي ونلتفت ولا لقيناها .... قلنا الحمدللهـ راحت شكلها كانت مشبهه علينا ...

واصلنا المسير .... و صلنا للضلع اللي قال عنهـ أبو عبداللهـ انهـ مليان جن ... طبعا وحنا نمشي ما فيهـ دعاء ما قلناهـ وما فيهـ اية في القران الا وقلناها ( تصدقون حتى سورة البينة اللي عجزت أحفظها طلعت حافظها وقلتها )

كنت لابس نعال ايطالية ( تكرمون) شاريها من boss اللي بطريق العليا ب 250 ريال وخويي لابس نعال صينية شاريها من طيبة ب 20 ريال ....

نعالي مع المشي تقطعت ونعال خويي ماشية معهـ زي اللوز ( المشكلة ان نعالي لقيتها في البطحاء نفسها ب40 ريال ) (التحية كل التحية لمحلات شارع العليا )

سمعنا صوت أغاني .... قال فهد : شكل الشباب طربانين
أنا : شكل عندهم عرس
فهد: اسكت بس لا يسمعوننا ويجوننا
كل ما مشينا قرب الصوت أكثر اللين ما حسيت ان المراويس عند راسي ( قمت أسمع طنة في رأسي من قوي صفق المراويس ) وحنا ما غير قران وأدعية ( تصدقون المليعين فهد طلع حافظ سورة البقرة كاملة ولا علمني )

شوي ويجينا شايب بعصاهـ ( طبعا ما راح أقول لكم أوصافهـ أخاف ما تنامون بالليل )

الشايب : وش عندك أنت وياهـ هنا
وحنا واصلنا المشي ولا كأننا سمعنا شيء ( صورة رجال يبلع ريقهـ من الخوف ) .... كل ما مشينا نلقاهـ في وجهنا المشكلة انهـ يمشي بدون ما يحرك رجلينهـ زينا

الشايب : ملك وفهد وش عندكم هنا
أنا قامت ركبي تصافق في بعضها كأني مصكوك بكهرب 220 فولت وفهد قام يتحكحك وضروسه تطقطق في بعض وانا أقول في نفسي : يلعن شكلهـ وشلون عرف أسامينا

وقفنا ... أنا احتري فهد يحتسي وفهد يحتريني أحتسي
طبعا وأنواع ترجيم الحصا يجينا من كل جههـ ( بزران الجن قاعدين يطقطقون علينا)
أنا : أبد طال عمرك نبي نروح للديرة
الشايب : ايهـ احمدوا ربكم انكم جيتوا من هالطريق لو انكم حاذفين نص كيلو يمين كان طحتوا في جن يهود وحنا ترانا جن مسلمين
فهد : أحلى يا الجن حتى أنتم عندكم يهود ومسلمين
الشايب : ايهـ بس حنا مهجدينهم وحنا اللي نفرض قرارتنا عليهم ما هوب مثلكم يا الانس يا الرخوم ( التحية كل التحية للمجتمع الاسلامي )

أنا : عاد وش تبيني أسوي ما نيب فاضي بعدين أمريكا هي المسيطرة واللهـ يحشون رجولنا لو قربنا من فلسطين
فهد: يا صديقنا يا الجني وسع صدرك يا ابن الحلال أبشرك حتى العراق خذوها اليهود
االشايب : وصدام وش صار عليهـ ( صدام مشهور حتى عند الجن )
أنا : مات وخذلوهـ شعبهـ وخذلهـ الوطن العربي والاسلامي وما أحد وقف معهـ
الشايب : اللهـ يلعن أبوكم يا الانس ( قفلت معهـ الجني ) قالها وطلع من فمهـ نار من القهر
فهد : المهم يا الجني حنا ورانا مشوار يا اللهـ خلنا نمشي
الشايب : واللهـ ما تمشون لازم نقهويكم وش تبغون العالم يقولون عنا .. تعالوا تقهووا وتعشوا وبوكرة يصير خير ( حتى الجن عندهم سلوم وعلوم )
انا : اللهـ يسلمك يا الجني بس مستعجلين فيهـ 5 الاف تحترينا
الشايب : طيب اذا أنتم ملزمين تمشون فاللهـ يسهل دربكم بس اطلبوا أي شيء وأحققهـ لكم
فهد : يعني نطلب أي أمنية وتحققها لنا
الشايب : ايهـ أحققها لكم ان شاء اللهـ
أنا : أبي النصر يأخذ بطولة
الشايب : يا وليدي تعرف تمش خشمك
فهد : طيب أبي الهلال يأخذ بطولة بدون مساعدة الحكم
الشايب : أقول تيسروا بس اللهـ يستر عليكم ما أصعب من هذا الا ذاك



كملنا مشينا وتعدينا الضلع وللهـ الحمد ودخلنا للمسبعة اللي يقول عنها أبوعبداللهـ ....

أول ما دخلناها وتجتمع علينا كلاب وهاتك يا منابح ويسوون دائرة علينا وواضح انهم جايعين ما تعشوا ولقوا وجبة ولا سبايسي حقت ماكدونالدز

فهد : ملك تشهد وأنا أخوك وان شاء اللهـ وعدنا في الجنة برحمة ربك

أبعدوا عنا الكلاب يوم قال فهد هالكلمة وهجدوا ما قاموا ينابحون

جاءني واحد من الكلاب وقال: يا طويل العمر واللهـ انهـ تشريف لنا طال عمرك حضورك لمسبعتنا ( اثرهم يحسبوني الملك الصدقي )

شوي الا ويجيني كلب ومعهـ ملف علاقي وقال: طال عمرك أنا لي 4 سنين متخرج من البكالوريوس ولا لقيت لي وظيفة الى اللحين وترى مو أنا لحالي الاف من الكلاب ما لقوا وظايف والمشكلة ان معهم شهادات وجامعيين ( التحية كل التحية للمسؤلين اللي يدعون بأن نسبة البطالة عندنا في تناقص )

جأني واحد ثاني وقال: طال عمرك أنا أبوي تعبان ومريض وكل ما رحت لمستشفى قالوا لي : ما فيهـ سرير فاضي ( التحية كل التحية لوزارة الصحة السعودية )

جاني الثالث ومعهـ كلبة طاقتن اللثمة ولابستن مخصر ... وقالت الكلبة : طال عمرك هذا متعرض لي ويتحرش فيني
الكلب : واللهـ هي اللي جابت الشر لعمرها ما لبست كيذا الا وهي تبي الكلاب يتعرضون لها ... بعدين أنا كلب عزوبي وما أقدر أقاوم كل هالاغراءات ( صورة مع التحية لبعض بنات الرياض )

المهم حلفوا الكلاب الا نتعشاء معهم وقاموا وذبحوا لنا 50 رأس قطو وتعشينا وللهـ الحمد بس نصف العشاء ما لمسهـ أحد شبعوا الكلاب وقاموا وكبوهـ ( صورة مع التحية للي يتفشخرون في العزايم )

وللهـ الحمد وصلنا الديرة ورحنا للاستراحة ونومة اللين بوكرة نفس الوقت يعني 24 ساعة من النوم وأبوعبداللهـ لزخ كل واحدن فينا ب 5 الاف وما قعدت معنا يومين الا وهي قاضية ...........


ما يستفاد :

أولا الهياط مالهـ داعي خاصة اذا صرت ما أنتب كفو مثلي أنا وفهد
ثانيا لا تخطي على أحد ما راح أحد يخطي عليك << اللهـ ما زين الحتسي
ثالثا لا تنسون الاذكار


جميع حقوق البتاع محفوظة