كبينة الاتصالات ( الله لايخلينا منها) + ليلة الدخلة

شـرقاوي · #1

حنا واعوذ بالله من كلمة حنا ,, عائلة وش احليلها الى في قلبها على لسانها , عايشين على الفطرة وحماية البيئة , كان الشايب من النوع الحار الى مايحب يترك عيالة يهيتون في الشوارع ويطيحون في الشلل الخربانة والداجة ,
كان الشايب يراقبني مراقبة شديده ويحدد سرعتي في الحارة. ومن اجلس معة ومن احومي معة مع انة واسمني في جبهتي عشان يقزني قز وانا في الشارع ,,

جابني ذاك اليوم وجلسني على ركبي قدامة وقام يطرح على اسئلة مدري وش تبي , المهم قام يقولي كم عمرك قلت الحين من الى جايب الثاني انا والا انت , بعدين سؤالك يابوي غبي,,, ياخي عندك امي اسئلها وهي بتعلمك لانها هي الى جلست تصيح يوم جابتني يعني بتقنعني انها نست , ( غمزة)

قال ابوي طيب السؤال هذا خلة يمشي من قدامي لابوة لابو كلب , من جد احرجتني معك ,, قال ابوي طيب انت يومك تنوم في مرقدك تحس بشي قبل لاتنوم والا وانت نايم ودك بشي , قلت شف يابوي هو يجيني احساس غريب يخليني اقوم اشاهق مشاهق وافز من نومي وانا ازفر , كني ادور لي شي بس اجلس احوس علية وماحصلة حتي ذاك اليوم قمت وانا اصبصب عرق ونبيذ من رقبتي , عشان عجزت وانا اصيح عليك صلح مكيف غرفتي وانت تقول وشولة ياوليدي , والحين شفني معاد ارتاح في نومتي كل ليلة اقوم ادور جيك الموية لان كل الماء الى في جسمي يخلص والظاهر عندي تنسيم واوعدك اني اروح لحقين الرديترات واشوف لي حل ,,

قال ابوي الله يصلحك انا ماقصدت كذا , نغير لك السؤال . انت ان شفت بنت حلوة تمشي في الحارة ماودك تركض يمها وهمن تخمها وتقعد تقرط فيها وتقول ياويلي ويلاة ,, قلت بالعكس يابوي الا ان شفتها اروح اركض من عندها بالكورة عشان تشوفني اني رياضي وبيجي اليوم الى تشوفني فية بالتلفزيون ,

قفلت مع ابوي وقام وحط حرتة في الفستق الى قدامة , قال الحين انت متاكد انك رجال والا فيك عرق من عرق الخكر .. ناظرتة بنظرة حارة وارفع ثوبي قلت هاة , الا يوم رجفني مع بطني الا انا في الجدار وثلاث من السلق تدور فوق راسي , قلت يابوي انت الى نرفزتني ياخي ( بدا يمون علية)

قال شف بس ,,,,ترا بنزوجك فهمت يالفاغر . وانا طيرت عيوني فية قلت الحين جالس تلف وتدور على من اليوم عشان تجيب لي وحدة ترقد جنبي من كبر السرير حقي... صدق انك فاضي , وبعدين انا ماقلت لك ابي اعرس انت وش محرق رزك.... جيت يوم عندك وجلست اتحكحك عشان تتخذ هذا القرار عني . لايعني انك ابوي قسم بالله ان ماعقلت لاطلع واترك لك البيت اورح خلك تلقى ولد مثلي ,,,,
دارت الايام وكل ماشافني ابوي نزل راسة . كنة مهوب يعرفني وانا تاركة على راحتة ابي اشوف وش نهايتة المخيسة ,, الا يوم مسكني يوم عمي دحيم وجلس ينصح فيني هذا ابوك ولازم تسمع كلامة عشان تتوفق في حياتك وقام يعطيني من الرخيص والغالي لين قامت دموعي تبطبط من كومة الحزن الى حطها قدامي ,
قلت خلاص ياعمي دحيم تراك عورت قلبي ترا والله معاد اتحمل ويخمني ذيك الخمة القوية ويجلس يصيح معي .. واروح اركض للبيت والحزن ماغير يعكرف لي . يبيني بس اوصل واطيح عند ابوي ....

واخش البيت الا ابوي منسدح على بطنة . وماسكة على اغاني وصوتة مطير العصافير من على سور بيتنا ,,
جيت واطب فوق ظهرة واجلس انطط واقولة تراني موافق .. موافق ... الا يوم قام من محلة ويجلس يدور فيني لين دخنا ونطيح على بعضنا ... وهو يقول الحين انت ولدي الحقيقي . قلت خير يابوي لايكون محصلني عند مسجد وانا مدري ,,

جلسنا نرتب الامور ونتفق على منهي بنت الحلال الى باخذها قال لي وش رايك في سوير قلت لايكون اخوها راشد ....الا يوم هز راسة قلت انت صاحي انت تبي توهقني يابوي شف اخوها وسخ وشيفة .. انا يابوي ابي بنت رايقة كلها رقة وحنان وتعرف للقرصان والمطاطيز . مابي بنت شينة قبلها عند المراية تبي تصلح مافسدة الدهر على وجها .. عرفت وش ابي والا اجيب لك صور عشان تفهم ..

قال بس عرفت وش تبي يالملعون .. مالك الا بنت ابو صالح عيالة مشاء الله حمران وشقران . قلت طيب خل نروح يمهم ونشوف كلامك مع اني عارف ذوقك من جنب القدة ,,

جلست ادورفي غرفتي على اطلق ثوب عندي وغترة وطاقية وعقال ,, وادق الشخص واركب مع ابوي الددسن العروى . وننطلق مسيرين للجماعة . نبي نخطب ونعرس مثل ذا الناس .. راحت حياتنا وحنا ماغير فيذا الجلبو الله لايعيدة شقق يدينا ,,
طقينا جرس بيتهم طقتين عشان يقولون منذا الذوق الى جاينا ذا الحزة , الا يوم فتحت لنا الشغالة الا يوم شهق ابوي من زين فيها , الا يوم قالت وس يبي بابا .. قال ابوي وين باباكم الكبير .. قالت سوية ويجي ..

الا ابوي خش وراها نواها الشايب , ما وقعت البيالة الا على جبهتة ,, يوم عرف انة خاش بيت حمايل مهوب بيت كلاب , الا يوم جانا ابوهم يركض وين الحرامي وينه ,,
الا ابوي فتح كشرتة قدامة على بالة يتميلح ويرقعها ,, قال ابوهم ابو حسين وانا احسبك حرامي ,,
وندخل ذاك المجلس الى كلة كنبات وستاير وطربيزات وشغل عدل وتطير عيونا في مجلسهم . الا ابوي صقع ذي النحنحة وقال شف يابو صالح العلم سلامتك حنا نبي بنتك( تهاني) للولد وتراة رجال حطة على يمناك ,,
قال ابوها هذي الساعة المباركة بس وش اسم الولد ,,, قلت حسين بن حسين ,, واشتغل في كبينة اتصالات , الا يوم ابوها ارتاح وانطلق حجاجة يوم سمع اني اشتغل في كبينة الاتصالات قال بس هذا اكيد انة سوبر فايزر وماسك لة شلة شباب وصاير مدير ,,

قال ابوها انا ماعندي مانع بس بنشاور البنت ونشوف رايها ,, قلت شف قبل كل شي ابي اشوف اما شغلة افقش الجحة هذي مهيب عندي , نط ابوي وقال حقك ياوليدي , قال ابوها اجل بندور لك عصير من الثلاجة وبنخليها تجيبة لك . قلت ان بغيت صحن جرجير اهم شي اشوف ,,

والله ياجماعة الخير بدا يدخلني الخوف وجلست اضرب اخماس في اسداس , مدري هل بتطلع زينة والا بتطلع شينة قلت مالي الا الدعاء فيذي الامور ,,

الا يوم نادوني ويدخلوني في غرفة في ملحقهم ,, ويجلس ابوها عند فم الباب الا يوم خشت البنت بذاك الصحن الى فية كاس عصير ماودكم الا تشوفونة وذيك الكيكة الى وانا اكتب الموضوع لكم عجزت اعرف اسمها ,,

الا وش الزين وش الحركات الا يوم حطت الصحن قدامي وتروح تركض من الحياء الى فيها , الا اسمع محطة كن شي طاح الا ابوها يقول اذكر الله .. قلت ماشاء الله ,,

وارجع عند ابوي وانا رافع لة مصبع الابهام واغمز لة , الا يوم طلع الجريدة من مخباة ولاف الجهاز فيها يذكرني بحقين العرق موزيها ,, ويحطها على الطاولة قال هذا جهازنا والعرس نبية في الصيفية نبي الولد يلحق على جو ابها يقولون ذا السنة ابها فيها جو ياخذ العقل ,,

ونطلع من عندهم وانا افكر الحين كيف ابقدر انوم على سريري ومعي احد جنبي ,,

وفي النهاية تراكم كلكم معزومين على زواجي والعلم من الراس للراس مهوب في القرطاس ,,
[color=#FF0000]

الجزء الثاني

عزيزي العضو وبرضوة الزائر عشان لاتقول ناسينك يالحبيب ,,,, هذا الموضوع يحمل مثلث احمر في الزاوية اليسار ,, يعني بالعربي صرف الى عندك عشان لاتقول وشذا الموضوع الى مايتحمل كل المراحل العمريه والسنية

,, امتداداَ لموضوعي السابق (كبينة اتصالات) قلت لازم اكمل لكم السالفة لان فية ناس قامت تفرك يديها يعني متحمسة تبي زبدة الموضوع , وانا عارف السعوديين يقدرون الزبدة واللبن الخاثر ويحبون السوالف الى فيها العاب رياضية ,

الرجاء,,,,, وتراني ماحب اترجاء احد .... لف جهاز الكمبيوتر لفتين لليسار على خفيف مع ترك مسافة مناسبة مابينك وبين الجهاز وهذا خاص للذكور ,, اما الاناث نزلة سريعة وطلة مع الدرج وتشيك على الوضع مع رجفة الباب وقفلة ثلاث قفلات تحسباناَ لاي طارئ من احد الشواكيش ,,

في البداية ومع هذي الليلة المباركة والخاصة فيني طبعا والى مافية احد بيسوي شي الا انا يعني مالكم الا القراية وبس اما الباقي هو لعبتي و
صدقوني ياجماعة الخير ماقدر اسولف عليكم وانا اشوف بعض الاعضاء حاط اذنة على باب غرفتي كن مافية صبر لين اطلع واعلمة وش سويت , ياناس الرجاجيل يروحون لصالة الرجاجيل والحريم يرحون لصالتهم وترانا جايبين لكم طقاقات وصبابات وبوفية مفتوح , عشان نفتك منكم اجل وشولة مسوين ذا الزحمة ومتخسرين ذا الخساير ..

نخش على الموضوع وطبعاَ اليوم الخشة غير,,, على قولتهم جدة غير,,, اليوم الخشة بالبشت وغترة بيضاء تبرق وطالع كنك غرنوق ومن شافك جاك يركض ويقعد يبوس فيك وكنك اطخم واحد في حارتكم , تعرفون كنت اهوجس في صالة الزواج والتفكير ذابحني والخيال وسخ ثوبي ماغير اتخيل ذا الحرمة وش بتجي طخمة والا شينة وكيف ابقدر انوم معها على السرير وانا رجال استحي احد يشوفني نايم بسروال الصريخ ومن دون فنيلة .

قام ذا السفية في نص الصالة وقام يزاعق تقول فية مصيبة والا ان العروس انخطفت والا فية احد خش على الحريم .. العالم طيرت عيونها فيه الا يوم قال اقلطوا حياكم الله علىالعشاء , اطالع في ابو الحرمة هذا صاحي والا مجنون مايعرف يركد والا مسوي فيها طرازن ذا الليلة مايدري ان الطرازن انا والله ,,

قاموا ذا الرجاجيل يتخاطفون من قدامي وركض على الصحون الظاهر ماقد شافوا لحمة حاشي .. وانا جالس اجمع لي مغامرات في راسي عشان اكذب فيها عليها .. الا ابوي يناظرني وانا اناظرة تقول اول مرة نشوف بعض.. قلت خير وشفيك قال وين شنبك يالمبسبس .. قلت حلقتة على الصفر ابي اطلع ورور عند الحرمة وتقول الحمد لله ماخذة واحد في عمري,,,,, اجل لو تشوف الشنب منتفش بوضعة الطبيعي كان تلقط بشتها ولايردها الا بيت اهلها , والله ان تروح لامها واتقول لها انة ياكل العصافير بعشوشها , ولد بن حسين ,, وهمن اجيك البيت منزل راسي واقعد على كبدك ,,

قام الشايب ومسك يدي وقومني وقال الله يلعن من زوجك والله انك تفشل ,, قلت الحين من مزوجني الا انت ,
الا يوم طلعني برا وقال خذ مفتاح السيارة والقط حرمتك من القصر وراح شقتك,,, والله الله بالشغل الزين و الركادة لاتجينا بكرة الحرمة تصيح وتنيح وتقول ولد بن حسين مهوب يعرف شي ... قلت شايفني اعرف كل شي والا كل يوم خميس اطق البشت واعرس عشان تصير عندي خبرة , حتي الجواز ماطلعتة عشان تقول ذا عندة خبرة من السفريات الا محمض من يوم عرفت نفسي ,, وحتي وانا صغير كل ماجيت ارقد معك في الغرفة تطردني مدري ليش ,,

خذت الحرمة وعلى الغرفة حتي ماحسيت بدخلتي في الشقة ماغير ادور باب الغرفة ابي اقضبة وهمن ازلجة واضيع المفتاح , شابة شبوبي ,,, خشينا انا والعروس من باب الغرفة وطبعاَ متماسكين باليدين . تقول خايفين ان نتفرق بكرة , حسيت بحرارة قوية من يدها قلت معقولة انها مشتعفة على العرس مثلي , جلسنا نمشي بشويش فيذا الغرفة تقول مشية عسكر النفس كاتمينة والوجية قدام . قمت وتنحنحت عشان تفك يدي اعوذ بالله معرطه فيها , واروح اشيل البشت واحطة في الباغة لاني عارف والله ان هذي اخر مرة البسة ..

واخش الحمام واتوضى عشان اصلي لي ركعتين واطلب ماعند الله , وانا على السجادة ماغير عيوني عليها يارايحة يمين ويارايحة يسار , اشغلتني قلت التحيات عشر مرات . هي تبي تغير فستان ذا الزواج الى كنة طربال جمس من كبرة , وانا مشغلها الا يوم سلمت من الصلاة وارفع يديني للسماء ابي ادعي كم دعاء حافظة الا يوم شفت ذا القميص الاحمر الى طير عقلي الا يوم صلب راسي يمها ونسيت يدني معلقة في السماء وتطلع مني ذيك الكلمة الى مدري وش تبي ( ياحلوس ياشيخة ) على فكرة ترا اسمها تهاني لاتخلطون , تراني فضيحة اعلم بأسم حرمتي ماعرف اكتم ,,

قمت افكر وش اغير الجو فية عشان تلين ذا الحرمة ونقدر نتفاهم معها , قلت مافية الا عصير وخبزة بالجبن نجيبها لها عشان يصير فية عيش وملح من اول يوم ويمكن تفك الحياء والتشنج ,,
رحت للمطبخ الا وشوف ذيك الحرمة الى مرتكزة في الصالة انا خفت قلت من انتي ,, قالت انا ( الربعية) قلت وش ربعيتة الله ياخذ عقلك قومي انقلعي لابوس لابو من جابس , شايفتنا بنتذابح يومك تجين واطردها من الشقة ,

وارجع الغرفة وانا ازبد الا الحرمة يوم نزلت راسها واقرب يمها واحط يدي على راسها عشان اقول دعاء العرس معاد فيني صبر ابي اخلص من الى انا فية الا واصقعها بموال عراقي حزين الايوم بطبطت دموعها واقوم واحظنها واجلس اصيح معها وانا شغال في الموال , يوم خلصت وشافت وضعها وتدفني وتقوم وتجلس على السرير وتتلحف , واقوم واقط الفنيلة واجي جنبها وانسدح واعطيها ظهري ,, قلت خل انوم لي شوي واذا توقضت داهمتها وسويت الى ابي هذي حرمة معاندية يبلها مسايس وشغل على خفيف ,

وانا نايم الى اسمع تمتمة خفيفية من الحرمة واركز ابي اسمع وش تقول ,, الا اسمعها تقول ليش انا كذا وليش وليش . من جد ضاق صدري عليها واقوم اطفئ اللمبة واسحب الستارة ,,
واقرب منها بشويش الا يوم زانت الامور وعرفت ان العوق من اللمبة الله لايبارك فيها , وانا اقول كل مامريت من البيوت في الليل اشوف اللمبات كلها مطفيئة اثر الحريم مايحبونها شغالة في غرف النوم ,,
شكلهم يستحون والا انهم يخافون من بيان الشحوم والخ والخ ,,

والى عندة تفسير من الاعضاء يعطيناة عشان نقدر نشوف سر طفيئة اللمبة في حجر النوم ,

واتمني الموضوع ,,

فتـــــــMـــــــو · 16-06-2007, 02:08 AM

قسسم شكله فله الموضوع

حياااااك شرقاوي

ماعلي منك

%%اتعبني غروري%% · 16-06-2007, 09:04 PM

اخوي شرقاوي والله مره ودي اقرا الموضوع
بس تعرف توني معطله=(((( وحده فرحانه
وان شاء الله اقراه قريبا بس ودي اريح عويناتي=(((اللي يشوفني يقول ذي مقطعه عمرها قرايه

شـرقاوي · 18-06-2007, 03:46 AM

فتو

نتظرك يالغالية ,, وبعدين وش معني فلة ( الولد هذا على نياتة مايعرف شي)

هذا ana انا · 18-06-2007, 05:34 AM

هههههههههههههههههههههههههههههههههههههههههههههههههه هههه والله من الصرقعه يا شرقاوي هههههههههههههههههههههههههه والله موضوعك روووووعه ابيك تشوف لي اختها هي مخطوبه ولا اجي اخطبها ههههههههههه

دارت الإيام · 18-06-2007, 08:48 AM

اخوي شرقاوي ياليتك فصلت الموضوع

لانه كذا مافيه امل اقراه

مثلاً حط الحين الجزء الاول وبعد اسبوع الجزء الثاني

يالله سوهااااااا انتظرك ..

شـرقاوي · 18-06-2007, 04:42 PM

اتعبني غروري

اجل توك معطلة ,, بس ياخوفي انك راسبة وبترجين تدرسين بعض المواد بعد كم اسبوع ولاعاد يمديك اصلا تقرين الموضوع , بس انصحك اقرئ الموضوع وتراة بينفعك في الامتحان لانة اغلب صح وغلط تجي من موضوعي ,

خخخخخخخخخخخخخخ

%%اتعبني غروري%% · 18-06-2007, 05:44 PM

اقتباس

الكاتب : شـرقاوي [عزيزي الزائر يتوجب عليك التسجيل لمشاهدة الرابط للتسجيل اضغط هنا]


	اتعبني غروري اجل توك معطلة ,, بس ياخوفي انك راسبة وبترجين تدرسين بعض المواد بعد كم اسبوع ولاعاد يمديك اصلا تقرين الموضوع , بس انصحك اقرئ الموضوع وتراة بينفعك في الامتحان لانة اغلب صح وغلط تجي من موضوعي , خخخخخخخخخخخخخخ

فال الله ولا فالك تراني فهالعطله ماتهنيت كل دقيقة افتح النت احتري النتايج

بعدين عادي لو احمل تطلع معي المستوى اللي بعدة يعني مايهم =(( وحدة ترقع لعمرها
وشي ثاني اذا تبيني استفيد ترجمه عشان تخصصي انجليزي ورني شطارتك
يالله احتري الترجمه من جد

من عيوني كم عندنا من شرقاوي اقراه وارد لك الترم الجاي ان شاء الله

شموخ المها · 18-06-2007, 07:36 PM

شكل الموضوع فللله بس مو وقته يبيلي اقراهـ وانا مرووقه ..

انا بعد توي مخلصه ختبارات ماودي اقرا شي كثييير <<هههههههه اخاف يأثر علي ..

بس لي عوده انشالله ...شرقااوي ..

ومثل ماقال ..دارت الايام لو الموضوع على جزئين كان ازين ...

............الطــــاغيه

فتـــــــMـــــــو · 20-06-2007, 11:10 AM

هههههههههههههههههههههههههههاي

الجزء الاول ماعليه كلاااااااام

وقسم بالله تحفه انت وابوووووووووك

اما الجزء التحتاني فيه قبايل

هههههههههههههههههههههههههههههههههههاي بس شي وقسم

ياخي كله كوم و

هي تبي تغير فستان ذا الزواج الى كنة طربال جمس من كبرة

يوم شفت ذا القميص الاحمر الى طير عقلي
الا يوم صلب راسي يمها ونسيت يدني معلقة في السماء

هههههههههههههههههههههههههههههههههاي حلووووووووووه من جد

شرقاوي مشكوووووووووور على اجتهادك دايما
في نقل صور من الواقع المر

وصرقع يامصررررررررررررررررررررررررقع بس لاعاد تعودها

مواضيع ذات صلة
الموضوع	الكاتب	المجلس	المشاركات	المشاركة الأخيرة
الجانب العاطفي فى حياة الرسول صلى الله عليه وسلم الزوجية	الحمررري	المجلس الإسلامي	3	26-04-2007 03:57 PM
لماذا يرى الحمار الشياطين ويرى الديك الملائكه؟؟	اابوعمر العتيبي	المجلس الإسلامي	18	24-04-2007 11:36 PM
~¤ô§ô¤~ انبياء الله~¤ô§ô¤~	الجادل الاصيله	المجلس الإسلامي	4	07-04-2007 08:55 PM
ان للموتـــــــــــــــ سكراتـ ..	العزيزه الغاليه	المجلس الإسلامي	18	04-03-2007 06:32 PM

كبينة الاتصالات ( الله لايخلينا منها) + ليلة الدخلة

حـفـل زواج [ نـواف & noon ] يــمــنع دخول لمغاتير و الغزوبيـه ..!!

( عمصيص ورحلة تايلندا 3 )

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق