حقوق الرجل وكيده (صوره مع التحيه للمرأه)

بسم الله الرحمن الرحيم



اخواتي اخواني مساء الخير والمسرات ( << يسمع بحقوق المرأه ) ضمن فعاليات صيفنا الحار الي يقطع جلود الحميراحلى تحيه لاعضاء منتديات الرياض وبدعوه من صديق عزيز مانيب قايل اسمه لاتحرجوني فديتكم وهذا اول موضوع لي اتمنى يعجبكم مابي اطول عليكم وابي اسلم على جميع المشرفين الي هنا ( رشوه) خاص وسنع لأن كل هذا تحت بند دهن السير ويقولون المنتدى يوزع شرهات هنا كود اني افوز بموضوعي قلت ما بدهاش خلني اشارك يكود يزيد رصيدي له ثلاثه اشهر شهريا ينقص ثلاثه ريال بسبة هالبنوك شهريا ياخذون علينا ثلاثه ريال وخربتها وصرت يوميا اروح لبنده واشتري من عندهم واسدد ببطاقة الصرافه مره اشتري ولاعه ومره اشتري شطه المهم اني اخلص فلوسي من حسابي قبل لا ياخذونها علي حتى مره شريت لي مارلبورو احمر بخمسه ريال ونص يوم اخذ الكاشير البطاقه بيسحب الفلوس قلت له خلها سته ريال ونص ريال خله لك حلال زلال عليك طالع فيني بنص عين ونطل بوجهي علك غندور ابو نص ريال وقالي اقلب وجهك ومن هنا تبتدي معاناتي المريره :

قدر الله علي وخلصت المرحله الثانويه وتخرجت بنسبه 80% ما خليت ولا جامعه وولا كليه وولا سوبر ماركت الا قدمت ابي اكمل دراسه ولا اتوظف لكن الله ما كتبها لي ! طلع ابوي يعرف واحد يعرف واحد يقدر يدخلني كليه صحيه بس بفلوس يعني خاصه وبعد حب خشوم وعلوم وراها علوم دخلت الكليه حتى يوم دخلت الكليه راس خشمي طلع فيه نفطه من كثر حب الخشوم درست ثلاث سنين اقصد الدراسه بالكليه ثلاث سنين وحبيت اني اطول بالكليه على قد ما اقدر يكود تعلم زين وبعدين لو تخرجت بدري ابرجع عاطل بعد ما كملت ست سنين وبدت السنه السابعه ويستدعيني صاحب الكليه ويعطيني الشهاده ويعفيني من باقي فلوس الدراسه ولا بدرجة ممتاز بعد رجعت للبيت وانا حزين ابوي يسألني وش فيك وانا اناظر فيه بنبرة اسى واقوله بنظره حزينه اقصد اناظر فيه بنظرة اسى واقوله بنبره حزينه انا تخرجت يبه ما يحتاج اقولكم عاد اليوم الثاني وابوي رايح للسوق يشتري اطقم فناجيل شاهي وبليله من الليالي وانا ادور بهالشوارع واشوت الحجار بالهواء ولا لمحت لي قطو رفعت رجلي كني ابشوت بلنتي همن تطير الزبيريه ( وانتم كرامه ) وتصك بخشته الا واشوف لي راعي بانوراما فاتح الكبوت ( من نفس سلالة البنز بس نسخه مطوره ) وانا اقرب وهو يقرب مني واسلم عليه واسأله وش اسمك قال اسمي عبدالعزيز بغيت اطير من الفرحه يوم سمعت اسمه وقلت له تعرف بجلي استغرب وقالي نعم ! قلت له لا لا ولا شئ طلعت سيارته خربانه وداق على السواق يجي يمره بسيارة اخوه الصغير البورش والسواق يجلس عند البانوراما يحرسها الين الصبح والصبح يسحبونها للشركه لكن عزمت عليه وقلت له اركب السياره ولا قلت لك شغل شغل قال طيب وانا الي اقرب من الكبوت ويوم شفت المكينه وانا الي اشهق واجلس اتشهد ! مكبنة سيارته انظف من حارتنا كلها واجلس امسح على المكينه بكل حنيه واقوله شغل يقالي متابع معه الموضوع وهو يشغل وتشتغل سيارته وينزل الرجال بيحب خشمي ويوم قرب من خشمي وشاف النقطه الحمراء الي براس خشمي وينقز يسلم على راسي قالي امر بس وش تبغى مانيب رايح من هنا الا انا محقق لك امنيه من امنياتك قلت له معك جوال كاميرا وهوة يطلع جواله ويقولي فداك قلت له لا يبن الحلال بس ابغاك تصورني جنب مكينة سيارتك وتنشرها بلوتوث قالي هذي بسيطه اطلب غيرها قلت له ابيك تحقق امنية حياتي وتخليني مبدع في المجال الي انا حبيته ودرسته قالي امر بس قلت له ابي اصير كبير حراس الامن في مستودع ادويه لواحد من هالمستشفيات طق صدره وجلس يكحكح ويوم فكته الكحه طالع فيني وجلس يضحك ويقولي وش رأيك في الحركه شكلك خفت وتحسب اني اكح من صدق يقالها بيمشيها علي الدلخ قلت له وش دراك اني خفت انا احسب انك من جد تكح عطيته رقم بيتنا على شان لا لقى لي وظيفه يتصل عليه ويعطيني خبر .

عاد الله لا يوريكم التلفون عندنا تقدر تشبهه مثل الريموت لا طاح في ايدي سعوديين هذاك اليوم ابوي بغى يطلق امي التلفون دق وهو جالس بركن الغرفه ينغف يقالي ما اشوفه ويوم دق التلفون وانا الي اطالع فيه بنظره تحدي مثل الي بالافلام لمدة جزء من الثانيه ونقوم نتسابق على التلفون ويوم قرب من التفون وبينطق كلمة الو من العجله الا امي فديتها تعكرف له ويطيح وارد انا على التلفون ويطلع خوي ابوي بس الحمدلله ما طلق امي وانتهى الموضوع على خير عاد هذاك اليوم جالس اقرط بأظافر رحولي واخوي ماسك مجلة سيدتي بالمقلوب ويقرأ يقاله بيصير مثقف ويدق التلفون ونطالع ببعضنا نفس نظرة التحدي الي بيني وبين ابوي ونتسابق على التلفون ويوم وصلت ومسكت السماعه وينبرش علي اخوي ويمحط برجله بوسط بطني وانا الي ارجع ثمان خطوات ورا ويرد على التلفون ويعطيني اياه يقولي واحد صوته صوت واحد شايف خير وفلوسه كثيره ( << الفقر لاعب بحسبتهم ) واخذ السماعه واتفل الله يكرمكم على يميني يقالي ابضبط الصوت الا ويطلع خويي عبدالعزيز وبعد السؤال عن الحال والاحوال بشرني انه لقي لي وظيفه بمركز طبي والله العالم انهم ما ذكروه بالخير وقال انه وظيفتي في المكان الي انا طلبته منه واتفقنا اننا نتقابل قدام المركز المذكور



وانا الي احوس في البيت تقول قارصني داب وش الدبره وش البس بكره ! وش البس ! وش البس ! واخيرا لقيتها وانا الي اطق البالطو الي يلبسونه الدكاتره ( << طراه الي شغلوه بوزارة المياه اول يوم داوم بسروال سباحه ) وسماعة نوكيا جوال جيراننا نوكيا N70 صحيح مهيب سماعه طبيه بس انها سماعه وهاك البسطار وريحة الكلونيا تلعلع بس المشكله الشعر فضيحه وانا الي اطمر لغرفة اخوي وامحط شعري بهالفازلين الي غدى كنه سعودي بسوريا مرت من جنبه وحدتن طخماء وغرق بسعابيله ومنا احلل هالفازلين استعمله لغرض شريف لو لمره وحده في تاريخ العائله اخوي الله لا يعطيه عافيه يستخدمه لأغراض سريه واوقف لي ليموزين وهو ينزلني عند المركز واقابل خويي عبدالعزيز الصراحه يوم شفت كشخته من جد تحطمت بغيت اصفقه بس الرجال توه مسوي معي جميل اجل من قوة ريحه عطره مريت من جنب واحد مزكوم وهو يطالع فيني ويقولي يخوي خففوا من هالعطور انتم بعياده مهوب بسوق وندخل الرجال ويخلص معه عبدالعزيز ويوم جاء طالع وانا الي اناديه ويوم بغيت احب خشمه ويشوف يلمح النقطه الحمراء ويرجع يسلم على راسي وهو رايح قالي توصي شئ انا طالع بريطانيا سنه ابدري هناك وانا الي افصخ البالطو وانطله بوجهه واقوله يرحم لي والديك وش معنى بجلي وهو يسفهني ويمشي ! بس اني حقدت عليه اخذ البالطو الكلب وانا الي ادخل على المدير واجلس على الكرسي واقوله وين مكتبي طال عمرك ترا ما عندي وقت ويطالع فيني ويقولي ترا جايبينك هنا مهوب حبن بهالنقطه الي على خشمك جايبينك هنا عشان فيه بنتين بمخزن الادويه ويخافون يجلسون لحالهم قلنا نجيبك حارس وانا الي قلبي يرفرف يرفرف وانطل السماعه بوجهه واقوله وين المسدس والله محد يقربهم وهو يطلع لي عصا مكنسه ويقولي خذ هالعصا وانتبه للبنات والمخزن


وانا الي انزل الدرج حبه حبه يقالي ما بزعج البنتين وادخل عليهم بشكل مفاجئ نزلت الدرج وجلست امي بالممر وانا الي اشوف هالطخمات يسولفون وكل وحده بيدها كاس او بالاصح علبة جبن ويوم خلصت قلبوها كاسات ويشربون شاهي وانا الي اقرب منهم وكل مالي اقرب منهم واصك بحاجز زجاجي بيني وبينهم وما افتح عيوني الا بقسم الطوارئ ودمجتي مربوطه بشاش شوي الا داخله علي الممرضه وأأشر على الشاش باصبعي واقولها واااي ( شفت يا بجلي اعرف انجليزي ) طلعت تتكلم عربي مكسر وفهمت منها اني صكيت بجدار زجاجي !! وزارني صاحب العياده وفهمني على الموضوع وان هالجدار حاجز بيني وبين البنات عشان ما يكون فيه علاقات مشبوهه طلعت من المستفى وقررت اني اصير شخص حازم وما اعطي هالبنات وجه ( << الي يشوفك يقول بيدك ما تعطيهم وجه )

رجعت واول يوم داومت فيه بالعياده الا وحده منهم تطق الزجاج ( تحسوني مثقف يوم اقول الزجاج ) طبعا هي تتكلم واشوف فمهايتحرك وشفايفها تلمع بس مدري وش تقول وأأشر لها بيدي يعني اكتبي بورقه وهي تكتب لي بورقه وش اسمك وتطبع الروج الي على فمها بالورقه وانا الي تضيع علومي واخذ لي ورقه واسعبل عليها واكتب عليها قــهــر جعلك ما تحسين فيه !! شوي الا المح خويتها من بعيد والله ياهي صاروخ والله يا هي صاروخ الي بتوقيع البنز ما تجي جنبها شئ وقررت اني اسحب على البنت ام شفايف وطلع اسمها ميساء واحب الطخماء هيفاء وحاولت بكل الطرق اني اشبكها بس ما نفع عشان كذا لازم اخترع طريقه ما تخليها تشك دخلت اليوم الثاني المخزن ولقتني لابس احمر بأحمر وبيجري يدق ابيها تسمه نغمته اتفقت مع واحد من اخوياي يجلس ساعه كامله كل شوي يدق علي عشان يمكن تتأخر يصير اول ما تدخل تسمع نغمة البيجر وهي تطالع فيني واخذ باقة الورد الي شريتها لها واسطرها بكل ما اوتيت بقوه بوجهها يقالي من اولها ابوريها العين الحمراء صار مكان الضربه فيها واضح صار كنه طبعة روج على خد استرالي ! وهي تصيح وتبكي وانا الي احلف عليها الا اعالجها واطمر لأقرب محل خضروات واجيب ليمون وفلفل واخلطها مع بعض وادخله غصب بفمها وهي تقول لا وانا ادخل الفلفل والليلمون ( تم حذف الضمير ها وادخال كلمتي الفلفل والليلمون درءا للشبهات ) طلعت من عندها وانا اقولها بكره ان شاء الله بيكون في جلسات ثانيه بس المشكله بميساء لأنها امس كانت غايبه او بالاصح وهي داخله بيتهم بعد نهاية الدوام صكيتها بشاكوش على رأسها على شان اتفرغ لهيفاء ( << يسمع بالاصابات الطفيفه ) ومشت عليها لكن بكره يمكن تحضر عشان كذا قررت اني اقتلها وارتاح ! بس الصراحه قلبي ما طاوعني لو مهوب عشانها عشان شفايفها الي بصراحه عجزت القى شئ اشبهها فيه لكن اقدر اقول انها احلى من شفايف شيماء قلت يا ولد ما يبيلها بكره وهي داخله للمكتب اسوي نفسها انها تغتصبني ( هالمقطع ماله دخل بموضوع ما ودك تغير جنسك ! ) المهم وهي داخله المكتب وانا الي يوم اشوفها واقطع ثوبي من منطقة الظهر واجلس اصيح واقول لااااا .. لااااا .. شرفي يا حقيره . . شرفي يا عديمة الاحساس . . تجمعوا الناس ووصلت العلوم للهيئه لكن ما عليه اهم شئ يخلى لي الجو مع هيفاء ! صدقوني طبعا خصوصا لما شافوا ثوبي مشقوق من منطقة الظهر قالوا بس اكيد هي سحبته ويوم رحنا للمحكمه وانا الي اروح للقاضي واقوله : يا شيخ انا عارف ان الشيطان لعب على الاخت ميساء وخلاها تحاول تغتصبني لكن دام ان الامور ما وصلت لحد انها تسلبني شرفي وتمنعني من الزواج تكفى يا شيخ سامحها وانا بسامحها وكل واحد يصلح سيكله ويروح ! قدرت اقنع الشيخ ووافق الشيخ وطلعت ميساء براءه ومن يومها بالحاره وكل مكان صاروا ينادوني : حق ميساء !! لدرجة اني مره غبت عن الدوام اودق التلفون وطبعا يوم جيت ابسابق اخوي على التلفون صكني كف وقال انثبر يا حق ميساء ما عندنا اشكال مثلك ترد على التلفون ( << عاش الدور ) كلم اخوي المتصل وطلع من طرف العياده يسأل اخوي ويقوله حق ميساء موجود ! بصراحه كان الوضع لا يطاق لدرجة ان واحد من عيال الحاره صار يجيب وحده من خوياته اسمها ميساء ويجلسها وكل ما شافني يقولها رحي تحرشي فيه وبصراحه بس لحد يدري صار عندي حاله نفسيه صرت اخاف من شئ اسمه ميساء ويجيني حالة هذيان وصرت اخاف بعد من شئ اسمه شفايف لدرجة ان مسلسلات فجر السعيد اهلي قاطعوها منعا لاحراجي عند مشاهدة شفايف المذكوره اعلاه شيماء عشان ما اذكر شفايف ميساء مرت الايام وقدرت الحمدلله اتخطى هالازمه بكل اقتدار وذلك بفضل الله اولا ثم بفضل احد البرامج اللي تستضيف دكاتره نفسيين وكنت دائما اتصل عليهم باسم : ح . م


رجعت لعملي واول يوم رجعت فيه للعمل دخلت على المدير منزل راسي وامشي على استحياء وسلمت عليه وسولفنا شوي وفاتحته بموضوع الرجعه للعمل وهو الي يطالع فيني بنظره خبيثه ويقولي بس بشرط وانا الي القط الاشاره واقوم واطالع فيه واقوله والله العظيم لو ما ترجعني للعمل لا اسوي لك فضيحه لها اول مالها تالي وانت تعرف وش صار بميساء وانا اسوي نفسي ابشق ثوبي من منطقة الظهر ( الي تغلبه العبه ) وهو يقوم ويسلم على راسي ويقولي الله يهديك انت فاهم غلط روح استلم عملك الله يرضالي وما يصير خاطرك الا طيب قلت له بعد اذنك ابطلع ساعه كذا وراجع طلعت من عنده ورحت ادور السياره من شارع للثاني وانا كل همي هيفاء وش اقولها ووش ابعتذر فيه لها عن فترة غيابي ( << الي يسمعك يقول درت عنك ) وقفت السياره وولعت السجاره وبديت اخطط :



راح ادخل عليها وانا ماسك بيدي مفتاح شقتي واقول لها السلام عليكم وترد علي السلام وهي مهيب مصدقه انها شافتني مره ثانيه وانا الي اقرب منها واقولها هيفاء الحب قسمه ونصيب وانا قسمتك ونصيبك اكيد راح تخجل وتحمر خدودها عشان كذا اباخذ معي سطل بويه عشان لا احمرت خدودها ارجع اعدل الالوان وهالمفاتيح الي بيدي مفاتيح شقتي . . ايه وش فيكم شقتي . . شقتي عش الزوجيه . . واخذ يدها ونركب السياره وتسألني عن موضوع ميساء وانا الي اعصب واقول لها انا شرفي الحمدلله ماضاع وموضوع ميساء كان حركه مني بس عشان ازيحها من طريقي ويخلى لي الجو معك ! شفتي وش لون ضحيت بكل شئ عشانك ! ضحيت بشفايف ميساء عشانك ! وانا الي تنزل دموعي وتهل السعابيل من فمي تسنها واحد من شلالات ماليزيا وهي تحط يدها وتتجمع السعابيل بكفها وتبدأ تلحس فيهم بكل استمتاع ( بهاللحظه تحديدا خيالي نزل وعطاني كف وقالي يلعن ابو ام الرومنسيه الي تعرفها ) بعد ما هزأني خيالي قررت اروح لها من غير ما احط ببالي كلام اقوله واخلي البساط احمدي

وصلت للعياده ونزلت الدرج ويوم وصلت عند العازل الزجاجي وانا اضربه بيدي واكسره وادخل والقى هيفاء جالسه ومعها طفل صغير وانا الي ادخل عليهم ويوم جيت ابكلمها وهي تشيل الصغير وتلبس العيابه وتحط رجلها وانا الي الحقها واناديها وهي مسرعه وتبي تقطع السكه وتجي سياره مسرعه وتدعس هيفاء ويموت الولد الي معها وهي تتركه وتكمل ركضها هنا اشتغل تفكيري قلت بس اكيد هي متفقه مع راعي السياره عشان يقتلون هالطفل الضعيف وانا الي الحقها الحقها ويوم قربت منها وانا انبرش عليها وهي تطيح على راسها وتموت وطلعت هيفاء تخطف ورعان صغار ووتتاجر بأعضائهم .

وانا الحين بوحده من زوايا السجن العام مسجون بتهمة القتل بواسطة الانبراش لكني مأمل بمحامي حمد المنتشري يطلعني هالورطه هذاني ابروح للشباب اربع معهم بلوت لأني ان قلت لهم معرف العب بيقولون لي تبي تلعب ولا ندق على ميساء
على فكره الموضوع الفوائد فيه وش كثرها بس لا فضيتوا اقروا الموضوع زين وتلاقونها بين السطور

مكتوب بقلمي