فضايح مذهله ودكتور الجامعه !

د. خالد د. خالد د. خالد وآه منك يا د. خويلد

قصتي معاه قصه ومشكلتي وياه مشكله وكان لقاءي الاول معه في القاعه الزجاجيه وبيننا قزاز مظلل

(قزاز جمس طقاقات)

هو الاستاذ المحاضر وانا اول مره احضر معاه محاضره وقلت لازم اثبت وجودي عنده من اولها واجلس في الصفوف الاولى (دفاره الله يكفيني شرها)

جلست انا وصديقتي في الصف الثاني وهو دخل وسلم علينا وارتفعت عيونه باتجاهي وابتسم

(تبي تقول لكم انها طويله)

لا تفهموني غلط انا والله ما اعرفه ولا يعرفني ولا قد شفنا بعض قبل هالمره لكن هو الي ما رفع عينه عني (خافت تشكون فيها)

وانا لاشعوريا غصت في الكرسي لاني حسيت انه فعلا يشوفني بس لا يمكن مستحيل

شلون يقدر يشوف والمكان عندنا مظلم وعنده منور وبيننا تظليل اسود معتم (يمكن التماسيح تشوف بالظلام زي الخفافيش)

قلت هذي مصادفه رقم 1

وزع علينا اوراق فيها خطة المنهج وتوزيع الدرجات ورقمه المباشر ورقم سكرتيره ومدير مكتبه

قريت الورقه وقلت لصديقتي ياااي عنده سكرتيره ناظري مكتوب رقم السكرتيره على باله يكشخ علينا

(من يقول انها منقهره)

قالت صديقتي الله يخلف على امك لا موب مكتوب رقم السكرتيره مكتوب رقم السكرتير والخمسه هذي هي آخر الرقم بوب هاء (يمدحون الركاده)

قلت ولو شوفي عنده سكرتير ومدير مكتب وكاتب ارقامهم عشان نحجز قبل ما نكلمه

معلوم مشغول وعنده زحمة مواعيد وما يبينا نزعجه ما ناقص غير يكتب رقم القهوجي

رفع راسه فجاه كنه سمعني وناظرني مباشره وجها لوجه وابتسم

(وجها لوجه ولا الاتجاه المعاكس يا د.مشاكس)

المره هذي رفعت الورقه قدام وجهي بدون ما احس لاني شكيت انه فعلا يقدر يشوفني

وانذهلت يوم سمعته يضحك

قلت هذي مصادفه رقم 2

طليت عليه من اسفل الورقه لقيته معطينا ظهره وبدا يكتب على السبوره قلت اشواااا

الحين ننزل الورقه وهبطت بكرسيي بعد ما كنت مقلعه وخليت البنت الي قدامي حاجز بيني وبينه

هو يتحرك يمين ويسار وهو يشرح وانا اتحرك يمين ويسار بالكرسي ورا البنت عشان اتخبا وراها

(ما تسمع الا صوت الكرسي يوزوز رايح جاي)

والمشكله انه مازال يبتسم

مليت من قرقرته وكل كلامه كان سواليف اغلبها نعرفها من قبل وما دخلنا في لب الموضوع

وكنت سهرانه من امس وما نمت زين لاني قعدت اشوف نيمو وانستازيا واجتمعت العوامل مجتمعه اجتماع عشان اتثاوب

بس والله بدون صوت فقط رفعت كفي اسد مجرى الهواء الخارج لكتم الصوت وتعوذت من ابليس ومنه بيني وبين نفسي

وقف عن الشرح والبربره فجاه وقال اتمنى ما تكون محاضرتي ممله لدرجة انكم تتثاوبون فيها

وطبعا نظراته كانت مركزه باتجاهي وهو يبتسم

قلت هذي مصادفه رقم 3 والمصادفات ما تتكرر ثلاث مرات لا لا الثالثه ثابته

ثلاثه بالله العظيم اقطع يدي من المفصل بدون ما آخذ مخدر اذا ما كان يشوفنا

(وش عندها المعلمه تفيده مدري رهيفه)

في وسط الشرح سال سؤال عليه بونس يعني درجه زياده للي تحله وانا ما صدقت خبر

(تحب تاخذ الدرجات بالراحه)

ورفعت يدي لاني تعودت على الدكتورات بعدين نزلتها يوم تذكرت انه ما يشوفنا

لكن المرعب انه قال لي ايوه تفضلي جاوبي وابتسم

خلاص طالت وشمخت اكيد انه يشوفنا اكيد اكيد اكيد اكيد

تاتات وارتبكت وطلعت الكلمات بالقوه لكن في النهايه عطيته الاجابه

(ولاده متعسره)

قال ممتاز جدا ممكن اسمك ؟

(جاك الموت يا تارك الصلاه)

قلت في نفسي خوش والله اصلا ولا حتى تحلم بيها

بس الواقع يجبر الانسان على اشياء ما يبيها عشان كذا وبصوت النمله قلت رهف

قال شكرا يا د.رهف

وهو مركز عيونه علي ويبتسم ويبتسم ويبتسم ويبتسم ويبتسم

في نهاية المحاضره عطاني نظره خاصه وقال المره الجايه ما رح تكون المحاضره نظري

رح تكون عملي وفريق التشريح تحت امرتي وانا الي اختار الاسماء بنفسي وابتسم

قلت لروحي ما فيها طقة عصا هو ناويني وحاطني في باله الله يستر علي منه بيستقوي علي وانا ضعيفه

عطانا استراحه خمس دقايق عشان يرتاح في مكتبه وطلعوا البنات من قبل ما ينتهي من كلمة تفضلوا

وهو طلع وانا اصب الدعاوي على راسه وجلست افكر في هالمصيبه الي نزلت فوق راسي بسبته

طلعت اتمشى ورحت جبت سلاح معاي استعمله اذا بدت الجوله الثانيه لان الدنيا خلاص فانيه

خلصت الخمس دقايق ورجع الدكتور وثلاث ارباع البنات ما رجعو

وهو اول ما دخل علطول اتجه بنظره لجهتي واستغرب واندهش لانه ما لقاني لاني غيرت مكاني

لكنه مسرع ماالتفت بسرعه لم جهتي الصحيحه وابتسم

صريت اسناني من القهر والغيظ والكالسيوم تحلل وقلت حسبي الله عليك كانك بتجنني وبتحرني وبتطير عقلي

لكنه يوم شافني فعلا ودقق وعقد حواجبه جلس يضحك ويضحك ويضحك ويضحك ويضحك

لاني كنت لابسه سلاحي والي هو وبكل كبرياء وعزة نفس ووقار وفخر عبايتي ونقابي

وقال لا تنسون اهم قاعده في علم التشريح (نظره وحده تكفي اذا كانت فاحصه)

(لا تلوموني لو مسكته من زمارة رقبته)

وهو في غرقة الضحك اعتذر عن تكملة باقي المحاضره لانه مشغول مع وكيل القسم

وطلع وطلعو باقي البنات وما بقى غيري وصديقتي والصمت الي خيم علينا كنه خيمة بدوي

قطعت الصمت بمشرط الجراح وقلت لها خلاص مافيها بحذف الماده واخليها الكورس الجاي عشان ما احضر عنده

بس يا خوفي انه يترصدني ويدرسني غصب حتى لو اعتذرت هالسمستر

تدرين لازم اتاكد بنفسي اذا كان يشوفنا او لا انا لازم اعرف ولا بموووووت من الحره

لازم نوقفه عند حده (انانيه تبي تشوفه ولا يشوفها)

شوفي هو شي من اثنين يا انه يشوفنا او انه يشم على قفا يده

قالت شبتسوين قلت تعالي وانتي تدرين قالت وش تبينبي قلت ابيبك

(محاوره ولا مراد بين بطتين)

واعلنتها صريحه وبدون رتوش لان الصدمات تمحو المقدمات وقلت باطب من الفتحه الي يعطينا منها الاوراق

ما يحتاج اوصف لكم حالة الهياج الي اصابت صديقتي الي يشوفها يقول فيها صرع ولا جنون سحالي

قالت انتي مجنونه مهبوله لو احد شافك طابه لقسم الرجال يمكن يفصلونك من الجامعه

قلت الموضوع يستاهل ومستعده افدي نفسي عشاني ابي اعرف لان بالي مارح يهدا وما رح اعرف انام الا لما اعرف

قالت اتركي عنك الخيال الكايد والهبال الزايد وتعالي نشرب شاني علشاني

قلت لا تحاولين تغيرين رايي لاني قررت ومستحيل اتراجع بس ابيك توقفين عشان اشوف اقدر اشوفك ولا لا

قربت الكرسي من الفتحه ونقزت عليه وانزلقت من الفتحه بسبب نعومة العبايه للجهه الثانيه وطبيت في قسم الرجال

حسيت باحساس اول واحد وطى سطح القمر برجوله لاني اول بنت وطت قسم الرجال برجولها

واول ما لمست الارض بكعبي انفتح الباب في وجهي ودخل د. خالد وشافني وابتسم

وانا صرخت في وجهه باقوى سيمفونية زعاق سمعها في حياته ولا حتى اوبرا عايده تنافسني

وصديقتي من ورا القزاز في الجهه الثانيه تردد صدى صراخي وشلنا الجامعه شيل وما حطيناها

حتى اللمبات اهتزت وبغت تنكسر والنور قام يؤشر ويطفى ويولع عشان سحبنا منه الطاقه

وبحركه بهلوانيه رميت نفسي من الفتحه اللي دخلت منها وطحت هوباااااا على الكرسي اللي كان مرتكز هناك

الحمد لله ما فيه خسائر في الارواح بس فيه خسائر في كرامة النفس وبعد انكسر كعبي

(انا الي استاهل لاني ما لبست بوت الرياضه)

وهو قعد يضحك ويضحك ويضحك ويضحك ويضحك

عاد انقهرت لانه ما امداني اشوف القزاز المظلل اذا كان يبين وما لحقت اطل على صديقتي من وراه

وما تاكدت هو فعلا يشوفنا او لا يعني تيتي تيتي مثل ما رحتي مثل ما جيتي

وضمن مهرجان الضحك قال آسف نسيت اوراقي هنا وجيت آخذها

وبنبره خاصه قال مع انو مو من عادتي اني انسى اي شي

(يقصد شكلي الله ياخذ شكله)

قمت وتسللت على انامل اصابعي عشان انحاش قبل ما يجي احد على خلفية صوت الصراخ

ثمن يضبطنا بالجرم المشهود وتصير فضيحتنا في جلاجل في القريب العاجل

صديقتي طلعت ووقفت تراقب الاوضاع عند الباب وانا اتحرك بدون صوت باتجاه الباب

وهو يتابعني بنظراته بالضبط في المكان الي امشي فيه ويبتسم

لما وصلت عند الباب قال مره ثانيه لا تلبسين ساعه تنور في الظلام واكسسوارات ليزريه

لانها تنور حولك وتعكس الاشعاع عليك وتصيرين اوضح من عين الشمس

اشوفك يوم الاثنين الجاي يا د. رهف

وغرز عند كلمة اشوفك وابتسم


المهم قررت يوم الاثنين القادم اني البس اسود في اسود عشان اختفي في وسط الظلام

كني المراه العنكبوت ولا زورو عشان ما يبان فيني الا بريق عيوني


انتم شرايكم شسوي ؟



انتم يللي جاي فيكم ويللي رايح صدق من قال انكم شعب تحبون الفضايح

ما جابكم على وجيهكم الاهالكلمه الرديه ومن تشوفونها وانتم تمشون مليون وميه

المهم تابعونا يااهل الخير ترى حنا فضايحنا غير

تطيح من عين السما الطير وتسبب زحمه في السير

لا تسالوني عن مكانها وير تعالو بسرعه شوفوها ذير

لا انسى اني اقول لكم مير لازم تمدحون وتدهنون السير




تشنكراتي للي مازال له نفس يقرا

والي قاعد منشكح ويبتسم



توتال القصه من خيالي لكن فيها ذره من الحقيقه







~ د.رهف وريوف دوت كم ~

وانا بعد توني دريت اني دجه يا حجه

احممممممممممم قصدي يا رجه


د.عديل الروح

(ماش ما يركب عليك هاللقب فور شور 100% بوب انت الدكتور)

يا عبقري يا ذكي تكفى لا تكثر حكي

ما ينفع تسطيح الاوراق من فوق القزاز لانها بتصير كنها مشبوكه عالهزاز

تيب وانت تطامر بين السطور ما مر عليك هالسطر يا شطور ؟

اقتباس الكاتب : مذهله واعلنتها صريحه وبدون رتوش لان الصدمات تمحو المقدمات وقلت باطب من الفتحه الي يعطينا منها الاوراق

او انه من السطور المنقوزه الي مالهاش اي عوزه



سي يو وانت من اهله


وتشنكراتي






~ د.رهف وريوف دوت كم ~