أنا فتاه أبلغ من العمر **** أريد الزواج فمن لديه الصفات المطلوبه فليتقدم لخطبتي

أجّودي · #1

السلام عليكم ورحمة الله وبركاته

أسعد الله صباحكم وظهركم وعصركم وليلكم ونهاركم وكل شيء جميعاً بالخير

صدقتوا يا الشهبان كل واحد عاضن ثوبه وماترك لينك بالموضوع هذا إلا ماضغط عليه يبي يلحق يشوف وش السالفة

هذا ماسوف أبدأه في الموضوع الذي رأيته في كثير من المواقع وخصوصاً مواقع الزواج [ والله مدري هو صدز زواج ولا لعب على الأشناب ]

هذا ما خلاني افكر بعمق شديد لدرجة التفحيط [ آسف ] لدرجة أنني فكرت أن أجري لقاء خاص مع الخطابات وغيرهن ..

وما أجريته من لقاء كان في أيام الطفوله يوم إني شخصية وهذي صورتي وأنا أحتسي معهن

وهذي صورتي بعد يوم أنا أكبر من الصورة اللي قبل علشان ما تشوفون واحد يشبهني وأنا صغير وتتلزقون فيه تراني كبرت وتركت الدوجه وصرت عاقل [ أيه هين ]

وحيث أجرينا لقاء مع الخطابه أم صنهات
وقالت لنا والله ياوليدي أنا مالي بذا الأمور اللي تقولها من هروج الانطرنط مالي بها علم بس اللي اعرفه ان عندي بنات حلال اعمارهن مابين السبعطعش [ وسكتت شوي وقالت ] حتى توصل لعمري وش رايك فيني
الصراحه شوي وأهفها بالبيالة على جبهتها اللي كنها ساحة معارض ناويتني بس الله ستر

وإتجهنا لخطابة أخرى الخطابة الكونتيسة صيته
الصراحه ماتنظلم البنت تقول من حين شفتك وقلبي ارتاح لك [ أرتاحت لتس الشياطين ألا ]
وقلت لها مامدى تأثير الإنترنت على الفتيات اللي يسجلن أسمائهن وإيميلاتهن لغرض الزواج ؟
ردت علي وقالت إذا أنت تبي تخطب أدور لك بنت الحلال ماتبي هذا الباب
طيب ياصيتة وش ذا الكلام قالت تبي اوريك صور [ حسبتها توها داخله إنترنت قلت لا شبعت منها ]

وماصدقنا إفتكينا منهن ورحنا لخطابة ثانيه يقولون إن إسمها جهير وأنا أشك بمصداقية ذا المره من حين دخلت عليها وهي طاقة اللثمه

ويوم جيتها مابغت تعطيني وجه يقال لها من كثر اللي تزوجهم
وأخش عرض عليها وأمحطها بكم سؤال حي الله أم جهير قالت خير وش تبي اففف [ تكفين يا اليسا ]
قلت أبد سلامتس بس كم الخطاب اللي يجونك [ في هذي اللحظة بدأت ملامح الرضا قالت والله ياعمري سرى علي بس أنا ما أوافق ] " فهمت غلط ذا الشيفه "
قلت أقصد اللي يجون يخطبون عندتس كم [ قلت هوو وش الكلام هذا ياحافظ انت جاي تكشف أسراري ] راح الكلام الحلو اللي قبل شوي

قلت خلونا نفتك منها ونروح لخطابه ثانيه نكمل لقائنا الصحفي

وأمر لكم مع ذاك الشارع إلا ووحده ياشيخ تهبل مرتزه عند الباب وأسحب جلنط وأدق ريوس

قلت : السلام عليكم مساك الله بالخير هذا بيت أبو فلان
قالت : لا والله
إلا واللي طالع لي مع الباب وينصحني

ياوليدي مايصير الكلام هذا تبي تخطبها تعال بس تبي تلعب بعقلها انقلع عرفت أنها بمرحلة وصلت للعنوسه فيها ومرحلة اليأس فأستغفرت الله ومضيت في طريقي أبحث عن تابع لموضوعي

وأروح لكم لدكتور نفسي وأسدح له كم سؤال على الطاوله وقال أيه ده رشوه [ عرفت أنه يبي أدعس له كم ريال مع الأسئله ومالقيت بمخباي غير ولاعة وريالين وعلكه وقلم ] قلت شكله يبي يزعل ويوم عطيته أخذها وقال ايوه خليك راقل [ الرقوله عنده انعدمت ذا الآدمي ]
وجلس يهذر علي ويتفلسف أعنبوو بليسه كل كلامه سعابيل وغسل وجهي ذا الهدر

والله الحئيئه يابيه ربنا يخليك [ قلت يبي يشحد حشى ماهو مكمل السالفة ]
وأخم أوراقي وأقول الشرهه ماهي عليك على اللي يطب عندك أنت وخشتك اللي كنها شارع بالحاره عندنا كله مطبات

على العموم هذي مواصفات اللي ابي اتزوجها فمن لديها هذه الصفات ترسل لي فاكس << تعقيد كخخخخ

هذا نموذج ما أبيه مطابق فكوني من ذا الرزه الشينه والجسم السايح ولا أحد يرقمها يفكر أنها يتزوجها لأني فكرت قبله ولقيت أني أدور أحسن منها

أن تكون مدرسه << أهم شيء ولا مديرة مدرسة وراتبها واجد
تكون صغيره مره << وش لون تجي [ ولا أقول عادي بس أهم شيء الشرط الأول صغيره ولا كبيره مايهم ]
وتكون حلوه مره [ وإذا حلوه بعد مافيه مشكله ]
وراعية بيت سنعة
وتكون تحبني << وش لون تحبه وهي ماتعرفه أصلا

وسأترككم مع طلبات الفتيات

وحده تقول أنا فتاة سعوديه من بيتنا وأسكن بالشارع اللي جنب الحاره وعمري 19 سنة وفيه إمكانيه أزود عشر سنين وطولي 150 وطويلة مره

والثانيه تقول أنا فتاة رشيقة عمري 25 سنة أرغب بالزواج من شخص يحبني ويكون طوله 180 لأن طولي 176 [ أتفلي بوجه اللي يبي يجيتس ] هذا طولتس ولا نخله

ووحده تقول أنا أحب كرة القدم وأقدس الحياة الدفرنسيه قصدي الزوجيه وأبيه يسكني في قصر ومايكون عنده أم [ وإذا عنده أم أنتي وخشتس تبينه يخليها ويجيتس ] " ماعليتس شرهه "

ووحده تقول أنا أحبه أنسان متفتح ويخليني أتعرف على شباب عادي << ماصار زواج

وحده تقول أنا عمري 40 سنة أبحث عن شاب يكون عمره مابين 17 إلى 30 وموظف ويعيشني بحياة سعيده [ الحين ماتعلميني اللي يطلب كذا الرجال ولا المره لو أنه رجال بالعمر هذا ويطلب الأعمار اللي طلبتيها كان نقول معقوله واحد يتمنى أما أنتي " عشم إبليس بالجنه ] .. [ أقول عندتس دراهم ] << مطفرين والشكوى لله
كخخخخخخخخخخخ

و و و و ..... الخ

هذه الطلبات من دفاتر وكتيبات وكتلوجات الخطابة [ حمامه ] وهذي صورتها علشان ماتعاكسونها يا الشهبان ولا تتكلمون عليها بكلام مهوب زين

ويقولون أعتزلت مزاولة مهنة الخطابة لما فيها من مشقة وغش تجاري

ولهذا أذ نعلن عن عدم مسئوليتنا نحن أجّودي جراء المقابلات التي أجرينها سابقاً
ولهذا جرى التنويه على أنكم ماتتعلقون أبد

[ اللي عندها كتلوج خطابات ترسله على الإيميل لأني الوكيل الرسمي للخطابات أعلاه أخذت وكاله في المحافظة عندنا كخخخخخخخخخخخ ] ترى الراس بخمسة آلآف واللي نعرفه بثلاثة ونص

وأشكر لكم المتابعة وإلى لقاء آخر مع مواضيع جاده غير هزليه البته

وتقبلوا تحياتي وتقديري
أجّودي

بنت النور · 30-01-2004, 03:16 AM

ههههههههههههههههههههههه

الله يرجك اجودي على هالموضوع

مشكور والله يعطيك العافيه

أجّودي · 30-01-2004, 03:36 AM

ويرجك بعد ليش يرجني لحالي

الله يعطيتس العافيه بنت النور

وشاكر لك مرورك الكريم وردك على الموضوع

أجّودي

قصيمي · 30-01-2004, 06:18 PM

خخخخخخخخخخخخخخ انا ابي وحده لاهي نحيفه ولا هي سمينه يعني مليانه اشوي وابي طولها 150 هي هي هي وسمراء اللون ماحب البيض واذا ماعليك امر ابيك تجبيها عند باب بيتنا

يعطيك العافيه على هيك مواضيع اجودي
اخـ قصيمي ـوكـ ...

خالد اليزيد · 30-01-2004, 06:49 PM

هذا المكان محجوز ولي رجعه

أجّودي · 30-01-2004, 08:01 PM

قصيمي خلني انفع نفسي اول انت ووجهك
وترى ماعندي خدمات توصيل للمنازل
وبعدين انا بس واسطه بينك وبين الخطابات يعني لا تقول من وين جبت مرتي من أي خطابه ولا مغشوشه ولا فيها شيء

أرضى بالنصيب
بس لا تعودها تتشرط

تقبل مني تحياتي وتقديري

أجّودي

أجّودي · 30-01-2004, 08:02 PM

يكفينا تشريفك أبو خالد والله لا يهينك

وبإنتظار ردك وتعليقك على الموضوع اللي إندبلت تسبدي لي يومين قسمن أبي أنزله ماقدرت

وتقبل مني تحياتي وتقديري
أجّودي

بنت النور · 31-01-2004, 04:43 AM

سلامة سبدك

هههههههههههههه

أجّودي · 31-01-2004, 09:10 PM

الله يسلمك بنت النور ،، ويطول بعمرك
الحين الحمد لله إنحلت المشكله وطلع عال العال

الله لايهينك

تقبلي تحياتي وتقديري
أجّودي

NIGHTMARE · 01-02-2004, 03:34 PM

ههههههههههههههههههههههههههههههههههههههههههههه

والله طلبات

مشكووووووووووور اخوي اجودي على الموضوع الخطير

مواضيع ذات صلة
الموضوع	الكاتب	المجلس	المشاركات	المشاركة الأخيرة
!! لنا !! عآلم ثآني ..	المليحة	مجلس الجوالات والاتصالات	7	28-01-2007 05:21 AM

أنا فتاه أبلغ من العمر **** أريد الزواج فمن لديه الصفات المطلوبه فليتقدم لخطبتي

صورة لوحده في المنتدى <<<<<<<<ادخل

يوميات ولد ويوميات بنت

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق