صعوط بنكهة المر والحلتيت لكل هكر (خاص بالمسابقة)

صعوط بنكهة المر والحلتيت لكل هكر((يقولون خاصة بالمسابقة وكتبت خاص بالمسابقة لاني شفت اخويانا في المنتدى كاتبين كذا قلت الحشرة مع الناس عيد))

----------------------------------------------

في البداية كل عام انا وانتم بخير معطره بدهن ودسم لحوم الضحايا ومخلوطة بالبرد اللي يجمد الرجلين .... الآن وانا اطقطقت على الكيبورد وحتى الان لم ارسي على بر وذلك لعدة مشاكل منها سرق ايميلاتي (الله لا يوفق من سرقها) والمشكلة الآخرى بان فكري لازال جامد ولم افكر في أي موضوع... اللهم اني اخترت العنوان لعل وعسى ان ياتيني المضمون منا او منا...

حبايب الموضوع طويل حبتين فاسمحوا لنا على الاطالة...

------------------------------------------------

نبذة تعريفية عن العنوان :

للاشخاص اللي امهاتهم ما صعطوهم يومنهم صغار او انهم عيال هاي هاي ورابين عند خدم.....<<<<< الله لنا

صعوط : ما يتم وضعه على فتحات الخشم (المناخر) يوما انك صغير (بالعربي نونو)لكن يا ترى وش الحكمة من وضعه؟..... الله اعلم<<<< للحين ما يدري
بس اللي سمعته من مصادري الخاصة يقولون يبعد العفنة والعين(من زين اشكالهم) ويقيك شر الامراض.... لونه قريبا جدا من اللون الرمادي واذا كان منذو مبطي(يعني قديم) فيصبح اسود فاقع اللون.... ريحته (الله يجيركم) يفقع الكبد باختصار (مروح – مخيس- شين) بجميع اللغات جبتها علشان ما احد يقول وش ذا المعنى...

نكهة : واضحة ما يحتاج لها تعريف ... واللي يخونه التعبير في الوصف فيقول (حلوه.... منتازة ) جدا...

المر والحلتيت : نوعان من انواع الادوية الشعبية المستخدمة من قبل الشيبان والعجز منذو مبطي، وفي ذا الوقت قل استخدامها من افراد هالجيل ، واذا كنت تبي تتاكد من كلامي فامسك لك اقرب شايب وفتشه او عجوزو فتش شنطتها وانا متاكد بانك بتحصل لك كيسة زرقاء مليانه مر وحلتيت وكل انواع الادوية الشعبية<<<< هذا بس للمصداقية والتاكيد فقط....
مع العلم بان ريحة الحلتيت الله لا يوريكم يوم تشمه تحس انه واصل لسقف المخ ولا يمكن تدوخ لمدة 10 ثواني من صاعقة الريحة... اما المر فاتمنى من الجميع اخذ شوي من المر ووضعه في ماء دافي وشربه علشان تعرفون ان الله حق... والوعد بعد التجربة...

لكل : من ظروف المكان ... <<<< كسلان في القواعد

هكر : انسان خبير في الحاسب وملعون جدف ( تذكرت اللي سرق احلامي مع صقيقاتي في الايميل) وعلشان كذا خاني التعبير....

**********فاصل ونواصل***********

بلادي بلادي منار الهدى****** بلادي بلادي منار الهدى

قلنا هالبيتين لعدم وجود مواد نسوي لها دعاية وفي نفس الوقت من باب المنافسة مع القنوات الفضائية الاخرى فتراهم ماهم اطيب منا...

*********************

في الصباح الباكر من يوم الاربعاء وانا في المكتب لحالي((اول مره في حياتي اروح للعمل بدري)) اصرح وامرح واذا بالجوال يرن (على نغمة علوش) <<<< قديمة ونوع جهازي بعد قديم... الناس تطوروا وانا على ذا الجوال ما فيه امل اتطور.... طبعا المتصل ابو شلاخ.... وانا جالس ارقص على نغمة الجوال وينتهي الاتصال الاول وانا ما رديت... ويعيد الاخ ابو شلاخ (جزاه الله خير) الاتصال مره اخرى وانا استمر في الدبكة <<<< يسمع بالدبكة بلاه من كثر ما يتابع قناة غنوة... وبعد شق الانفس رديت عليه....

ابو شلاخ/ صباح الخير خيوووه <<< مسوي لبناني الاخ
الوافي / اهلين وسهلين خيييوووه ولك صباح النور
ابو شلاخ/ مبروك
الوافي/ على ايش<<<< على طول قلب سعودي... >>>اقول في خاطري عساها زيادة في الرواتب؟
ابو شلاخ/ على سرق ايميلك؟
الوافي/افا... متى يا رجال؟
ابو شلاخ/ البارح... ما دريت الا واحد داخل بايميلك وكاتب تم اختراق الايميل بواسطة الهكر فلان الفلاني...
الوافي/ افا... والله ضاعت الاحلام يا شيخ... هذي والله المشكلة...
ابو شلاخ/ خيرها في غيرها... حظ اوفر << يسمع بها في المباريات بس ما يدري وين المكان المناسب علشان يقولها..
الوافي/ وين حنا فيه... في مباراة يا الحبيب... بس ما قهرني الا اني ما عطيتها الرقم... يا حرام... والله قهر..
ابو شلاخ/ من هي؟
الوافي/حبيبة القلب يا شيخ؟
ابو شلاخ/ يا الملعون... من انت متعرف عليه... ما علمتني؟
الوافي/يا رجال كل شي الا اصدقاءنا...
ابو شلاخ/ من زينك انت ويا اصدقاك.. بعدين احسبك الحين منقهر على الايميل... اثره ما همك الا اصدقاك؟
الوافي/ يا رجال ما همني الا صقيقتي الجديدة والا اصدقائي كلهم اشناب ما وراهم عيشة.
ابو شلاخ/ايوووه... والله لو انها فيفي عبده
الوافي/ يا اخوي حتى التشبية ما تعرف تشبه..
.
.
.
.
انتهت المكالمة (كالعادة واحد منا مسكر في وجه الثاني)

بعد ما سكر ... وانا اعاتب نفسي...(جالس اسولف مع نفسي)>>> ليش... لييش ما عطيتها الرقم... راحت فتاة احلامي<<<< امحق فتاة.... راح ايميلها مع الايميلات...
وانا في المكتب والجو بارد ولا بعد احد جاء من الموظفين وقدامي كنبه طولها مترين... قلت يا ولد وش رايك تسكر باب المكتب وتسترخي لك شوي حتى يجون الموظفين... على بال ما تهدى اعصابك(كلام بيني وبين نفسي) ...

نزلت الشماع على جنب وانسدحت(على الكنبة) ومديت رجولي، وانا جالس انتف شعر خشمي ومره احك راسي..... واذا بي اراها... انها قريبة مني.. انها فتاة احلامي... انها بجانبي(انها صيته هانم) خويتي اللي معي في الماسنجر قبل يومين... اللي كنت اكلمها ونخطط للمستقبل.... <<<< قصدي شريف

انا : صيوتي(اسم الدلع)
صيته: يا لبيه
انا: لبى والله عروق قلبك
صيته: مستحية وخدودها حمر من وراء البرق
انا : يا بنت الحلال لا تستحين... اقربي مني وش فيك بعيده؟
صيته : انا جنبك يا بعد طوايف اهلي
انا : يا لبيه... اروح ملح يا صيوتي على الدلع
انا : عسى ما سوا لك الملعون اللي سرق ايميلي شي؟
صيته: يخسي ملعون الخير... يا انا وريتك فيه...
انا: وش سويتي؟!!!
صيته: عزمته عندي في الخيمة؟
انا : افا يا ذا العلم... تخونيني يا صيوتي...
صيته : انا بنت ابوي... ما هقيتك تشك فيني... انا استدرجه... انت ما تسمع بالاستدراج... الظاهر انك ما اتابع افلام مصرية واجد
انا : ايه اشوا... انا قلت لا يهكر بعد على مخك ويلعب عليك بكلمتين منا او منا.
صيته: لا ما عليك ... انا شقردية مانيب مثلك يوم انت جالس تخوني مع البنات اللي معك في الايميل..
انا: ايه تعجبيني والله....بس وش اخونك الله يهديك... خلي عنك الوسوسة..
صيته: تلعب علي ... اصلن انا يوم عزمت الهكر عندي في الخيمة طلعت اللاب توب وقلت افتح ايميلات خويلد خلني اشوف من يسولف معه... ويوم فتحها اكتشفت انك خاين
انا : افا يا ذا العلم ما بعد وصلنا لذي المواصيل يا بنت الحلال... خلي الشكة على جنب... انا احبس (أبي اقول احبك)
صيته : الا وصلنا ... وبعدين لا تلعب علي بكلمتين حلوه... لكن يا خويلد ما هنت علي... قلت لازم انتقم لك منه...
انا : يا لبى قلبك... والله اني خابر اني مانيب هاين عليك..هاه وش سويتي؟
صيته: طلعت له جدايلي... ومسيت البرقع... وخليته يشوف عيوني..
انا : افا يا ذا العلم... كل ذا الاغراء له... طيب ليه ما تسوين لي ذا الاغراء ؟
صيته: مانيب اقول لك انت ما تعرف الاستدراج... يا بن الحلال تابع افلام مصرية علشان تفهم
انا : هاه... احلى يا استدراج؟؟!!!
صيته: اصبر خلني اكمل لك... بعدين قلت يا الله انبطح..
انا: افا... الدعوى فيها انبطاحة؟
صيته : ايه... وانا اللي يوم شفتهم منبطح.. وانا اللي امسكه واتوطى في بطنه وامردغه لك... واقوم اعتزي... باخوي فيحان... انا اخت فيحان.. وبعد ما تمردغت لك في حوض بطنه... وفقعت وجه اللي صار كانه طماط خربان... صعطته بمر وحلتيت...لا وبعد شربته كاس مليان مر وحلتيت... علشان يعرف ان الله حق..
انا : يا لبى قلبك والله انك تعجبيني... بالاحضان يا حبيبه قلبي بالاحضان... وانا اللي احس بالحضن الدافي الا انا خام مديري وهو يصحيني من النوم...

وفجاة....

الا المدير يقول :
عسى ماشر...صاحي انت...ما بقى الا تاخذ الشفة...لا وبعد نايم في المكتب... مكتب ابوك... يا تحضر بدري وتنام في المكتب او تجينا متاخر...
انا : هاه طال عمرك... والله جايب بدري لكن قلت اخذ لي غفوه حتى يجون الموظفين..
المدير : لا ما شاء الله عليك واضح... المهم الحقني في المكتب وعلى فكرة تراك منقول للارشيف ومن اليوم باشر هناك
انا : افا يا ذا العلم... الارشيف مره وحده...يعني مع الفئران والصراصير... والايميلات مسروق... وش ذا اليوم المشؤووم والاسود...
المدير : خل صيته وصعوطها بنكهه المر والحلتيت ينفعك...
انا: ويني وينها... نهي نهي نهي بعدين وش عرفك فيها...وامسكه مع جيبه؟؟
المدير: وش عرفني فيها... اسالك نفسك ... كل المكاتب اللي حول الادارة يسمعونك وانت تقول صيته صيته...
انا : لا والله اجل جبنا العيد مفلفل...وانا اللي ابوس راس المدير واقول له تكفى استر علي الله يستر عليك...
المدير : خلاص قلت لك بستر عليك واحلامك الجايه خلها في الارشيف علشان ما تفضح نفسك...
انا: موافق موافق... الارشيف في قلوبنا والاحلام القادمة في الارشيف...


ما يستفاد من الموضوع :

1- ترى ما كل شي ينشاف في الحلم حقيقة وواقع... فعلشان كذا الواحد يحاول ينبسط في احلامه...
2- رسالة من القلب للقلب لحبيبة الهواء (صيتة هانم) واهدي لها اغنيه صباح ورولا (يانا يانا)
3- حسبي الله ونعم الوكيل >>> طالعه من صميم القلب لمن سرق ايميلاتي وخرب احلام المسقبل...
4- ترى العمل في الارشيف احسن واصرف يعني جرب نفسك اخي الموظف في كل مكان... فلا يهمك العذال..
5- اكتشف ان مديرنا يشتغل في المباحث والا ليش نقلني للارشيف؟؟!!!
6-اتمنى من الجميع وخاصة في فصل الشتاء بانهم يتصعطون علشان ما يدخلهم البرد...ولا تنسون الحليب ملخوط بالنسكافية وكثروا الزنجبيل علشان تدفون....
7- انا اسف على المصالة لكن صدوركم تسع الكثير والكثير من الماصلييين... لكن وش اسوي لاصار حبيبك عسل فالحسه كله... ومخي مقفل حبتين...


((كل عام وانتم بخير))