يوميات فتاه عربجيه ...

أجّودي · #1

السلام عليكم ورحمة الله وبركاته

قصة مثيره حقاً وماهي إلا بعكسها حقيقه

[ يعني اللي يبي يقراها يبي يفهم إنها العكس ]

أم وليد شابه في عمرها الخمسة والعشرين تمتلك سيارة ددسن [ نيسان غمارة ] موديل 85 ومركبة لها كفرات خط ومنزلتها شوي وحركات فيها تدل على العربجة بحق وحقيقه .. وكاتبه على القزازة
[ نجد فيها ثائر المجد ]
وصاكتها بتظليله بلاك وحركات من داخل كأنها غرفة نوم
.... البنت هذي ماكملت دراستها وطردوها من المدرسة لأنها كانت توزع دخان وتهرب للطالبات فصفص وحركات مالها داعي على الشله بالمدرسه وصفقت المديرة بالكعب على الدميجة وذبت عليها كلمتين وقضبت الباب .
.... مرت سنتين على فصلها من المدرسه وهي ياحرام بس دوجه وتفر بالشوارع ومذية عيال خلق الله اللي تذب عليه الرقم واللي تطرده من شارع لشارع وأنواع الكلام اللي لا يليق بشبابنا الأبرياء
[ ياحلو أركب أوصلك ] والعيال عاد أبرياء مره والواحد منهم في مقتبل عمره في العشرينات وماتزوج وخايف على نفسه من البنات ولا يعطي أم وليد وجه ويفركون منها الشباب خوفاً على سلامتهم << احلى يا السلامه
ومعاقبه هالشباب وغاثه لها ولد واحد من الجيران كل ماطلع من المدرسه يمر من قدام بيتهم وهي اللي تكشخ وتوقف عند الباب تفضل ياحلو خلنا نتغداء سواء [ ومن بعدها ماتشوف إلا غبرته والشنطه يسحبها من الخوف اللي صار بسببها ] " حسبي الله عليها خوفت عيال خلق الله "
.... سنه وتوظفت البنت وأفتكوا الناس من أذاها لعيالهم وأمنوا عليهم شوي من هاللي ماتستحي على وجهها كل يوم مذيتهم وتهدد سلامة الشباب بحركاتها البناتيه بالسيارات تصدقون بغت تدعس واحد
.. المهم نكمل لكم .. وتشتغل الحين في إدارة تعليم البنين [ عاد الشباب مايقدرون يجون هذي الدائره كلها بنات بس بالتلفون يستفسرون عن معاملاتهم وين راحت ووين جت ] .
واللي يكلم يسأل عن راتبه وأول ماتعطيه أي بنت الجواب يقفلون من الخوف لا تسحبهم أي بنت وتسوي علاقه معهم
[ تعرفون الشباب يخافون على أنفسهم ] " الله يستر علينا ويحمينا من هالبنات المجرمات بس "
ومره يدق التلفون وأم وليد حاطه رجل على رجل وتدخن إل أم وهي ماصدقت خبر تكفخ بالسماعه على إذنها هلا والله << ما أمدانا
الولد : الو السلام عليكم
أم وليد : هلا والله يالله حي هالصوت وعليكم السلام
الولد :الله يخليك أبي أسأل عن حركة نقل المعلمين وش صار عليها .
أم وليد :والله ياعمري ماصار شيء لهالحين بس إذا صار شيء أرد لك خبر
الولد : وشوووو وش لون تردين لي خبر
أم وليد : أكلمك وأعلمك
الولد : لا لا خلاص مشكوره ولا تدرين مالي إلا الله ثم أنتي [ وهو يعطيها الرقم مسوي مستحي " فرقني هالحياء " ]
أم وليد : أبي أدق عليك من جوالي ..
الولد : لا مو الحين شوي اهلي عندي كخخخخخخخخخ
أم وليد : خلاص أبي أكلمك متى مافضيتي الرقم عندي .. هاه شفته بالجوال عندك ترى دقيت عليك وقفلت حتى يكون عندك الرقم اذا بغيت شيء ولا شيء لا يردك إلا لسانك وأنا أم وليد أفا عليك بس ترى أنا تحت امرك
الولد : أيه شفته أكلمك الليله باي أهلي جو .. كخخخخ
---------------
بالليل يدق الولد على أم وليد ويقفل أم وليد كانت نايمه بعد الدوام ساحبتن لها نومه ولا صحت غلا على الجوال أفففف إتصل وأنا مادريت عنه خلوني أكلمه .. طرررن طررن
الولد : هلا عمري ماهو لله علشان حركة النقل أمحق مصالح ياشيخ
أم وليد : أم وليد هلا بك حياتي أبي اروح أخذ لي دش وبعد ما أصحصح أكلمك .
الولد : أوكي حياتي باي
أم وليد : باي

أم وليد راحت تتفسح وتآخذ لها لفتين وتشتري بكتين دخان من البقالة اللي بآخر الحارة وتمر على السوق وتقز عيال خلق الله ومن هالكلام اللي مايصلح ويجرح مشاعر هالشباب الأبرياء

والولد يتصل على أم وليد كالعادة حركات الشباب مايخلونها يدق دقه ويقفل وأم وليد تعرف الباقي تتصل عليه تعرفون جوالات الشباب كلها بطاقات سوا ولا عائليه وإذا سوا يدق ويقفل وإذا عائلي الجوال يرسل رساله فاضيه وعاد أم وليد تعطيه من هالسوالف والنصب وتقول والله إني ما أعرف غيرك ياعمري ولا تعرفت على أحد أبد غيرك [ والله من التسذب ] ولا فكرت في غيرك [ تسحيب عيني عينك ] وتصدق حبيبي إني من الإدارة للبيت ونوم وبالإستراحة مع شلتي من خوياتي بالعمل
والضعيف مصدق ومآخذ مقلب على نياته يحسبها صادقه ...
تداوم أم وليد من الساعة 8 حتى الساعة 10 الصباح وبعدها تنقز تآخذ لها كم لفة وتفر على السوق [ مافيه غير الشياب يتقضون مقاضي البيت ] وهي معاقبتهم وتدخل السوق رافعة صوت المسجل ياليل دانا ياليل دانا واللي يحذفها واللي يدعي عليها واللي يقول أنا أعرف أبوك يا اللي ماتستحين على وجهك والله لأتصل عليه وهو عند أبو فلان في زواج أبو محمد وأعلمه عليك يا اللي ماتستحين تغازلينا شياب كبر أبوك

وإذا جاء وقت خروج الطلاب مسكت الشارع طول وعرض وتفحيط وأنواع الإستهبال والتنطيل وتجي مسرعه وتسحب الددسن بإثنين وتردها بجلنط وتسوي حركة الريوس وخرابيط أشوى إنا يا العيال مانعرف الحركات هذي ولا نعرف نسوق ولا رحنا فيها
[ وعاد العيال ياويلي يمه يبه ياوك وأنواع المصارخ والصياح من الخوف منها لا تدعسهم ] .
[ وتجي الهيئة فيها أم عباس أم دفرنس ] ويطردون وراها وتفرك أم وليد بأعجبوه منهم بسلام بس المصيبه أن الولد كان مدرس بالمدرسه اللي تفر عندها أم وليد ومايدري عنها ولا شافها بس هالشغاله اللي توديه من البيت للمدرسه بالفان العائلي [ باص عائلي ] .
وتجي أم وليد مسرعه وتفحط وتبتلي هالشغاله الضعيفه في نفسها وتصدمها وتنزل الشغاله أنتي مافي شوف أنتي مجنون والولد يصارخ من هول الصدمه والحادث وأنواع البكاء والشغاله تجي وتهديه لا يموت عليهن بس لا حياة لمن تنادي وتجي أم وليد العربجية وطاقة العباية على الكتف وتمشي وتذب عليه الرقم وهو ينقز من الخوف ويوم شاف الرقم عرف إنها أم وليد اللي بإدارة تعليم البنين ولا ومغيره إسمها بعد لأم فادي [ يقال لها رومنسيه هالشيفه ]
وبعدها إتصلت أم وليد على الولد وهو يستلمها من راسها لساسها ويقول لها لا أشوف رقمك يااللي ماتستحين ترقمين زميلي وأنتي مسويه حادث معه [ مايبي يقول أنا ] وهي تحلف وأنواع التصريف لكن لا حياة لمن تنادي والولد يزعل على أم وليد ولا عاد رد عليها ولا هي إتصلت عليه ..
وتمضي الأيام والليالي وتتعرف أم وليد على واحد ثاني " ضحيه سهله الإفتراس << أروح وطي على التعبير ياشيخ
وتحاول فيه لين أقتنع [ عاد الولد الثاني توه يدرس بس أم وليد قدرت عليه لما شغلت له شريط أصاله ما أبآش أنا والولد يضيع معها ومع الأغنية وهو يآخذ الرقم منها بس بعد أيش بعد مانشف ريق أم وليد ]
وبعدها تواعده عند المدرسه تبي توقف عند الباب ولما يطلعن يطلع معها بسيارتها على إنها أخته الكبيره جايه من السفر وتبي تجي تآخذه بدال أخته الصغيره لأنها مشغوله <<< حركات
وهي تمشى فيه وتفر ارجاء المنطقة بالولد الضعيف البريء وهو يقول الله يخليك تأخرت على البيت وهي تقول لا ماعليك نبي نرجع بسرعه .. أيه هين بسرعه
والولد تورط وراح فيها [ وأم وليد مواعده شلتها تقول متعرفه على واحد شكله كمخه وشكله طلع أكثر من مره بس أنا قدرت عليه وبجيبه لكن ]
وبعدها تفاجأ الولد بإستراحة وينفتح الباب يبي ينزل ويهج بس هيهات وين رايح بس ماقدر ويتجمعن عليه الشريرات المجرمات ويحاولن فيه بالعنف بس تمكن الولد من الهرب والفرار وشقوا شماغه ووصخوا الطاقيه اللي فيها نقط زري [ الزري بقع تلمع << توصيف حاره حشى ]
فكه الله راحت الشماغ وتوصخت الطاقيه ولا يروح الشرف ثم من تتزوجه بعدين مسكين ويكسر الخاطر
[ ليه كذا يا البنات تسوون فينا كذا حرام عليكم كلنا براءه ]
المهم نرجع للموضوع : وسلم من براثن أم وليد وشلتها وهو ينشر السالفة عنها وعن سالفتها مع واحد من زملائه على إنه يستر عليه مايبي يقول إنه هو ولا راح فيها وراحت سمعته بين أخوياه الشباب ويعطيهم مواصفات سيارتها ورقم اللوحة ورقم جوالها حتى ما أحد من الشباب يتورط معها ويروح فيها بسبب مكرها وخداعها ودهائها ... << أقعد
.. المهم أم وليد نست الموضوع اللي صار وعقلت
وبعدها صارت تجمع لها كم راتب من رواتبها ونوت تروح تسافر خارج المملكة " مهيب هينه " ومسكت مع أم وليد إلا تروح سوريا وقالت مافيه براسي إلا سوريا وقالت اللي معها وزميلتها الثالثه خلاص سوريا سوريا وش ورانا ..
بس على حسابك قالت أم وليد على حسابي <<< كريمه ذا المره
وعاد أم وليد توها مطلعه لها كامري أول مانزلت موديل 2004 وهي تطقها بقراطيسها أقساط من شركة عبداللطيف جميل المحدوده " إعلان عسى ماينسانا بس عبداللطيف جميل ويمحطنا بفي اكس ار "
ويروحون لسوريا وهم مشغلين أغنية [ ياواد مالك ومال الشام هيا معاي للسعوديه ]
وأستهبال وخبال ويتعدون الحدود السعوديه ويطبون سوريا وام وليد تمسك راسها وش ذا الزين وحنا نطرد ورى شهبان بالسعوديه الواحد صايرن أسود من الشموس ويدينه محفيه من الغسيل والطبخ ويروحون لأطلق فندق [ عاد مدري وش أحسن الفنادي اللي راحت لها بس إنها راحت لفندق ]
وأم وليد تعبانه حيل من السفر [ يقولون إنه يعورها راسها وتبلع من البندول ]
[ ومهدئات الصداع اللي يعرفنها البنات عاد حنا مانعرف شيء أبدن عنها ]
وأم وليد أول مادخلت لغرفة النوم سحبتها نومه لآخر الليل وأحلووو السهر وطلعن البنات [ وش ذا الزين ] ويدخلون مرقص يقولون إنه زين عاد تعرفون حنا يا الشباب مانعرف لسوالف البنات اللي يروحون لها خارج السعودية الواحد يالله السوق ولا لزميله إذا جت مناسبه له بالسنه
ويوم دخلت أم وليد المرقص إلا اللي يرقصون أعمارهم يقولون حول الثمانطعش " 18 " وإن صاروا كبار " 25 " وأم وليد تروح وتجلس جنب المرقص وهي واللي معها ويضحكن على الشباب ويذبن عليه كاس ولا فاين ولا ورقة فاضيه ويستهبلن على الشباب وتنقز أم وليد تنقط على واحد يقولون إنه أزين اللي بالمرقص ومعها قارورة بيبسي شوي وتخلص وترنح وتغني وين الملايين راحت فلوسنا على المزايين وأنواع الإستهبال وبد ماطاح مابراسهم من رقص وضحك وقضوا لهم كم يوم في سوريا وتمشوا وأفترت روسهم وطفشوا رجعت للسعوديه وطرب وضحك ومع كل وحده ألبوم صور للشباب اللي بالمرقص وصورهن وهن في سوريا يتمشن وصورة شقتهن والخادم اللي مخوفينه من حركاتهن إذا دخلن وهن مودعات وفاقدات الوعي ..
وبعد مارجعت أم وليد للسعوديه تحن للوطن .........

للقصه بقية من جد تعبت ولا فيني حيل أكمل ولا أكتب أو أفكر وش تكملة القصه

وأنتظر رأيكم على هالقصه من جد تعبت فيها وأنا أكتبها بمنتدى ثاني قبل فتره وحبيت أنقلها لكم وأعدل فيها بعض التعديلات البسيطه وحبيت تشاركوني فيها رأيكم .

واللي يبي ينقلها بنقله بأحد الهجر يدرس هناك [ تراني تعرفت على أم وليد وصارت الواسطه عندي ]
كاتبها ومعدها ومخرجها / أجّودي

مجنونها · 11-02-2004, 03:59 AM

اقتباس

الكاتب : أجّودي


	[ ياحلو أركب أوصلك ]

الله يرجك ياني كعيت ضحك على هالمقطع

اقتباس

الكاتب : أجّودي


	ولا ومغيره إسمها بعد لأم فادي [ يقال لها رومنسيه هالشيفه ]

هههههههه

اقتباس

الكاتب : أجّودي


	ويتعدون الحدود السعوديه ويطبون سوريا

وش لون يطبون في سوريا على طول لازم يمرون الاردن
8
8
8
ياشينه الين قام يدقق

روعه

الله لا يحرمنا منك و تسثر لنا من هالمواضيع اللي توسع الصدر

بس تخيل عاد تنقلب الايه ويصير صدق يانا بنتورط

تحياتي لك

بنت النور · 11-02-2004, 04:37 AM

يعطيك العافيه ياجودي

بس ماكملت القصه

بكملها بعدين

لاني مااشالله تعبت والقصه قصيره مره

وووالله اي كتابه من كتاباتك لازم اقراها بتمعن <======= متعوب عليها هالكلمه

والله لايحرمنا منك

amm@r · 11-02-2004, 09:11 AM

أجودي مشكور على القصة و على ام وليد و الله باين عليها اخت رجال ...

بس يا أخي اختصر شوي .... يعني حسيت حالي عم أقراء روايه ام وليد و سيارتها مو فتاة عربجيه

مشكور على القصه .... و تمنياتي لك بكل الخير و السعادة

ابو مهند · 11-02-2004, 09:14 AM

يسلمووووو اخوي اجودي
على الروايه المهويه
اجل ام فادي
بانتظار الجزء الثاني
لاعد مناك

أجّودي · 11-02-2004, 09:21 PM

السلام عليكم ورحمة الله وبركاته

مجنونها تعرف الاردن مايذكرونها مافيها شيء على حسب ماسمعت

كل من قال رحت لسوريا يقول اول ماطلعت من السعوديه دخلت سوريا مايذكر الأردن تبيه يقص قصة حياته ويعد المسافة بالأميال

كخخخخخخخخخخخخخ وبعدين ترى مالي بالسوالف هذي اسال اي بنت تعلمك تعرف حنا يا الشباب عاقلين مره مانعرف للسوالف هذي ولا نطلع إلا بمحرم << بالحيل

ولا يحرمنا منك ياقلبي << قلبها غزل

وماعليك يابعدي من هالمواضيع لا تخاف ياشيخ لأشق فمك من الضحك << كثر لي منها

ومشكور على تفضلك الكريم وردك على الموضوع

---------------------

هلا بك اختي بنت النور والله يعافيك ويطول بعمرك

القصه ايه مره قصيره يعني الواحد يخلصها بثانيتين وهو يقراها بهدوء واذا هو مستعجل يآخذ فيها نص ساعة

والله يعطيك العافيه على متابعتك لمواضيعي وهذا يزيد من تشجيعي ويزيد من تشجيع بقية الأعضاء بأن يكون هناك من أمثالك بالمنتدى من يهتم بمواضيعهم ويتابعها [ بتمعن ]

والله لا يحرمنا منك بعد اختي بنت النور ومن ردودك

وتقبلي تحياتي وتقديري

---------------------

اهلين عمار هلا والله ياقلبي منور الموضوع ياقلبي

ماراح تكون روايه ولا قصه لو اختصرتها ،، لازم اشدكم وارخيكم << ليه حبل

واشكرك على تفضلك ياقلبي وردك على الموضوع ومتابعتك له .

وتقبل مني تحياتي وتقديري

---------------------

ابو مهند يسلم لي عمرك يابعدي
وبعدين وراك مسكت معك على ام فادي يعني ماشدك الا ام فادي

وان شاء الله عن قريب امحط لكم الجزء الثاني بس استجمع قواي كل ابوها وامها واكتب مابمخباي من حتسي

ولا عدمتك يا ابومهند ولا عدمت الجميع ان شاء الله

وتقبل مني تحياتي وتقديري

أخوكم أجّودي

فهد المهوس · 12-02-2004, 08:56 PM

الله يرجك

مانت بعاقل

<- لي عودة

برب

مملوح الرياض · 13-02-2004, 02:01 PM

هههههههههههههههههههههههههههههههههههههههههههههههههه ههههههه

الله يرجهم من عرابجه غطو على العيال مايبغوون حشيش...

اجل سجاير...هههههههههههههههههههههههههههههههههههههههه
هههههههههههههههههههههههههههههههههههه

لا اوصلك ياحلو..خخخخخخخخخخخخخخخخخخخ

تحياتي
مملوح الرياض

أجّودي · 13-02-2004, 07:58 PM

هلا والله مهاجر لا تسب لا اسبك الحين واقول الله يخضك وش تبي فيني تقول الله يرجك تبي يطلع صوت قرقعه بالدميجه طاقيه وحاشيها هلل اخاف انفضح

وتقبل تحياتي وتقديري

--------------

حي الله مملوح الرياض <<< ممكن نتعرف

حشيش [ اعلاف مواشي قصدك ] << فكنا منك ياشيخ ترا المره هذي صرفتها عنك المره الثانيه ابي ابلغ عليك

وسجاير هذي ابو بس حق الهنود يمديك

والتوصيل بكره الاقيك بالفروه [ تعرف مافيه عبايه ] وداقن لطمه [ بدال اللثمه ] وتركض مع الشارع وسطعش بنت تلاحقك تبي تخطفك عاد رقعها << ودك بس ماهوب حاصلٍ لك

وتقبل مني تحياتي وتقديري

أجّودي

as if u care · 29-07-2005, 06:54 AM

هههههههههههههههههههههههههههههههههههه

وبعدها تواعده عند المدرسه تبي توقف عند الباب ولما يطلعن يطلع معها بسيارتها

خخخخخخخخخخخخخخ اللله يرجك خخخخخخخخخخخخخخخخخخخخخخخخخخخ
والله الهبال
شكلي بصادقها ام وليد وافلها انا وياها

بس المره الجايه مابدهااش روسيا

وعلى حسابي<<مسويه كريمه

خخخخخخخخخخخخخخخخخخخخخخخخخخخخخخخخخ

يوميات فتاه عربجيه ...

:¤- تـعّـلـم الـلـهـجـه الـقـطـيـفـيـه مـع بنــووكــ ــه -¤:

أمثال وحكم محششين!

»

الرئيسية :: الأخبار :: الرياضة :: حواء :: منطقة الرياض :: معرض الصور :: مركز تحميل الصور

زوار هذا الموضوع الآن : 1 (0 عضو و 1 ضيف)

أدوات الموضوع
عرض صفحة الطباعة إرسال هذه الصفحة إلى صديق